Da taỹa'a na qauemaicpi
1'Am Ñatamnaxala', ña 'aua'axaỹa da ñachoxoc,
'ampaxattalec da nachaalataxac souaxat na chaqaic depa'aguenataxaatacpi.
2Aỹem 'oxocheesop na qauemaicpi,
qataq nam saqcha'api maye lapaqteguiñi,
aỹem 'anca'alaxateeguesop na lapaqtapiguiñi da ỹo'ot ne'ena qauemaicpi,
3maye ỹaxaraic naqa'en ñi lachaxat 'eeta'am ca ỹeelonec,
qataq da nasaxarec naua la'aqtaqa
qalaq 'eeta'ama aca checna maye
huo'o na lshenataxanaxa.
4Qaq nache hueta'alo naua nqañoxotaqa'ate,
da ỹaỹeetac na qaica ca ỹasouaxat,
deque'elaqtaxan da huo'o na ỹaỹen
qataq qaica ca lcolanaxa.
5Ñi 'oonolec namayepi maiche ỹa'añaqchettac na lỹa,
da yaqto' ỹo'ot ca qauem qataq detaqtega't
da ỹo'ot ana lqoinapi maye ỹoxotchiguiñi.
Qataq ipettega da qaica ca ishet
da ỹauaachigui namayepi.
6Qataq da qaica ca ishet da nmit na qauempi maye ỹo'ot namayepi.
Qalaxaye Ñim ishet da ỹauatton ca saqcha'a lhuennataxac ca shiỹaxaua,
Ñimaye ishet da nmit qome namayepi.
7Ñim Lo'onatac 'Enauacna ique'emaqchet qome ỹauota'a aca lchecna,
qataq ique'elaxat qome da ique'emaqchet.
8Namayepi huañi qome souaxat naua maiche la'aqtaqa,
qaq ca ỹauaachigui qome nache ỹe'eetac namayepi.
9Huaña nache 'enauac na shiỹaxauapi
huo'o naq 'enec naqa'en Ñim Lo'onatac 'Enauacna,
qataq ỹa'axattac na lo'onatacpi,
huaña nache qaỹaỹateeta na ỹo'otpi Ñimaye.
10Qaq na no'on da lataxac ntootapeguec Ñim Nataxala',
qataq nmittaique Ñimaye da yaqto' mpaxattalec,
qataq 'enauac na ỹalleppi maye huo'o naq 'enec ỹataqta machiguiñi.
