Salmos 68

₁Da nachaañi Ñim Lo'onatac 'Enauacna,

nache na mpa'aguenaxauapi nlagaxattac,

qataq datauec na nquiỹatega Ñimaye da ila'aguet,

₂nache 'eeta'am na lmala'q da nlagaxat.

Qataq quiguiñi 'eeta'am ana dapic lapa da tangui na norec,

da huo'o Ñimaye nache qanauec na qauemaicpi.

₃Qaq na no'on da lataxac qalaq ntootapigui'

da huo'o Ñim Lo'onatac 'Enauacna,

Qataq ỹataqta nlaqchigui da ntonaxac,

nache dasottac souaxat da ntonaxac.

₄Qauo'onaxañi da qavio'oxoyiñi Ñim Lo'onatac 'Enauacna,

qauo'oñi na no'onec da qavio'oxoyiñi da le'enaxat.

Qavio'oxoyiñi Ñim netalec naxa na lo'oc na piguem,

qantoñiitapeguec Ñim Nataxala'.

Qantoñiitapeguec da Ñimaye qami' hueta'agueta.

₅Ñim Lo'onatac 'Enauacna maye netaña

añi qui'itta lalamaqte atamnaxaqui,

Ñimaye nacheñi ñi lta'a na qaicaua caua lta'al.

Qataq nacheñi ñi iueettapeguelec ana pa'aipi.

₆Ñim Lo'onatac 'Enauacna ỹanem ca lma' ca ndogoñi shiỹaxaua,

qataq huesouec naqa'en ca ncoñeteguishec,

nache ỹanem da qaica ca iueetac.

Qalaxaye ca saỹalaq qalaq netalec naqa'en,

ca 'alhua maye qaica ca ñaxaalec.

₇'Am Ñatamnaxala' co'ollaq 'annoxonec,

nache 'am natataueegue na 'aralamaxat nhuo' le'ecpi,

nache qoquetalec ye toolec 'alhua,

₈nache na 'alhua cholaxan qataq na piguem anacot na auot.

Nache Ñim Lo'onatac 'Enauacna ỹataqta cholaxan naqa'en añi qasoxonaxa Sinaí,

Ñim Natamnaxala' na Israel le'ecpi.

₉'Am Ñatamnaxala' 'auanacot co'ollaxa so lta'araic auot,

nache na 'aralamaxat nhuo' le'ecpi ỹataqta nasamñi co'ollaxa,

nache 'am 'aỹa'anem da la'añaxac.

₁₀Huaña nache ne'ena 'aralamaxat nhuo' le'ecpi nalec yi'iye lma'.

Qaq 'am Ñatamnaxala' souaxat de'era 'arqouagaxanaqtaic,

nache 'aỹa'anem na choxoraqpi na lhuenecpi.

₁₁Ñim Nataxala' ỹan da la'aqtac,

nache qalota na 'alpi na jec da ỹa'axatec de'era la'aqtac, 'eeta':

₁₂«Mashe datauec so nta'alpi qataq so nalleppi.»

Qaq ne'ena 'alpi maye hueta'a ne'ena nỹecpi,

nache ỹanec na nhuotaxanaxat maye chegaqaigui ne'ena pa'aguenaxauapi.

₁₃Nam 'eeta'am ana laua na qoto' maye qalapaxalec na lcat plata,

qataq na laue qalapaxalec na no'on lcat oro.

Qalaxaye da qoñiita huo'o na no'onaigui na 'atetpi.

₁₄Qaq Ñim Qaica ca Ỹaqalanapec

co'ollaq datauec naqa'en so nta'alpi,

nache ana aloñi talec añi qasoxonaxa Salmón.

₁₅Ỹataqta qaỹoqotcheguemec ana qasoxonaxapi ye Basán,

qataq qaỹoqotcheguemec ana lmilo.

₁₆Qami' qasoxonaxal maye qami' qaỹoqotcheguemeque,

¿ta'ainco' da ỹataqta qarquiỹaitega da qauloita'a,

añi qasoxonaxa maye huotaique da netaña Ñim Lo'onatac 'Enauacna?

Qaq Ñim Nataxala', nache 'eetai' qome da netaña añimaye.

₁₇Ñim Lo'onatac 'Enauacna ỹataqta qalota

ana laigonapi maye nalaataxaquipi,

qaq nache chegoqchiguiña añi qasoxonaxa Sinaí

da netangui anamayepi da naỹa añi lalamaqte atamnaxaqui.

₁₈'Am Ñatamnaxala', 'asheguema co'ollaxa

na qaỹoqotcheguema da 'auauec na 'oxonecpi,

nache 'auaconeguet ana lsheetenaxanaqte na shiỹaxauapi,

qataq ivira'a na saỹalaq huo'o 'anqa'en añi isheeten.

₁₉Qaỹo'oxoren qome Ñim Nataxala',

Ñim Qanatamnaxala' qataq qarca'alaxaqui,

maye 'enauaque naua na'axa'te da ỹachetac na qaya'acpi.

₂₀Ñim Nataxala', maye Qanatamnaxala'

Ñimaye Lo'onatac 'Enauacna maye deca'alaqtaxan,

qataq ishet da qomi' nca'alaxateeguesopa da nleuaxa.

₂₁Ñim Lo'onatac 'Enauacna ilaxachigui qome

na lqaic na mpa'aguenaxauapi,

na lqaic na queto'ot da ỹo'ottac na lasouaxashetpi.

₂₂Ñim Nataxala' 'enapec:

«'Auachegoqchiguiña qome ye Basán da 'am ñe'eguelaxat,

qataq 'auachegoqchiguiña ñaqa'en ye ỹataqta qaỹoqchiguiña,

aso auaxai da 'am ñe'eguelaxatsheguem,

₂₃da yaqto' nachilliguilo naua 'arapia'ate

na ltago'q na 'ampa'aguenaxauapi,

qataq na 'arelo pioxoppi, napilec qome ne'ena ntago'q.»

₂₄'Am 'Aro'onatac 'Enauacna, maye Ñatamnaxala' qataq Ita'a,

añi 'aralamaqte atamnaxaqui qailota'a na inoicchiguiñi shiỹaxauapi

maye ỹo'oxoreetac da 'ayo'oxoyec.

₂₅Na do'onaxaatacpi hua'auta

qaq na ivictapigui ana nvique nca'ataxaatauo.

Qaq na qa'ampiolec huetangui na laiñi,

iuaxaatagui ana lasaquiaxanatapi.

₂₆Qavio'oxoyiñi qome Ñim Lo'onatac 'Enauacna da qalapoñiita'a't,

Qavio'oxoyiñi Ñim Nataxala', qami' maye qauachegoqoiguet so Israel.

₂₇Qaq somayepi datataueegue so chegoxoguetpi so Benjamín,

qataq so qalota lataxala'pi ye Judá, Zabulón, qataq ye Neftalí.

₂₈'Am Ñatamnaxala', ña 'auachaxan da 'ara'añaxac,

ña 'avi'eguelaxalec da 'auachaxan de'era 'ara'añaxac,

maye sauanaqchigui co'ollaq qomi' 'autaua'n.

₂₉Qaq souaxat añi 'aralamaqte atamnaxaqui maye naña ye Jerusalén,

añim taỹa naxa na nta'alpi da 'am iroua'a na lachetaqtaxanaxatpi,

₃₀nache 'aviraxato'ot ne'ena shiỹaxauapi,

maye 'eeta'am na shiguiỹacpi da netaigui ana na'aate,

maye 'eeta'am na ỹataqta yeloxoicpi toropi

qataq na ỹotta'a't shiỹaxauapi maye 'eeta'am na huaca llalaqpi.

Qataq 'auo'ot qome da 'am nmanot,

nache 'am ndoua'a na lcat plata, qataq 'aulagaxat qome

na ỹotta'a't shiỹaxauapi maye loquiaxaicpi.

₃₁Qaq ye Egipto le'ecpi namaq qome na ltaxaỹaxanaxanecpi,

qataq ye Etiopía qalaq ỹanot da lhuaqỹaxac Ñim Lo'onatac 'Enauacna.

₃₂Qami' maye qauloitague' na netalec ana 'alhua,

qauo'onaxañiito'ot qome Ñim Lo'onatac 'Enauacna,

qauo'oñi ca no'onec da qavio'oxoyiñi Ñim Nataxala',

₃₃ñim netalec na piguem,

nam piguem maye nache 'eetai' co'ollaxa.

Ñimaye qaỹa'axaỹa naqa'en da lavilỹaxac,

dam ỹataqta 'añaxaic lavilỹaxac.

₃₄Ñaq qauauattoñiita qome da la'añaxac

Ñim Lo'onatac 'Enauacna, da la'amaqchec huetalec na Israel le'ecpi,

qataq da la'añaxac iviro'ot na piguem.

₃₅Ỹataqta huo'o da 'archec 'Am 'Auo'otapecna,

da qoueta'a añi atamnaxaqui maye 'aralamaqte.

Ñim Natamnaxala' na Israel le'ecpi ỹanem da la'añaxac

qataq da lquesaxanaxa na lalamaxat nhuo' le'ecpi.

¡Qaq ỹataqta qaỹo'oxoren qome Ñim Lo'onatac 'Enauacna!