Da na'alaxac da huo'o da naquicoxo
1Ñaq aỹem 'anca'alaxatec 'Am Ñatamnaxala',
cha'aye mashe yaqta'a da aỹem 'ogaxaic,
2qataq huotaique da seyiiñi, sootangui na qaỹoqchiguingui nshaxa,
maye saishet naqa'en da huo'o ca sapelec.
Qataq sootaña na qaỹoqchiguiña pa'aguiñi na 'etaxat,
qataq aỹem ỹaỹoxonaqchet na la'auaxac.
3Qataq mashe ñequi'iteeguesop da iỹaxanaxac,
qataq mashe seuet ana ỹoqoichiqui,
qataq mashe nasamyiñi naua ỹa'ai'te,
souaxat da seuattaique ca ltaunaxanaxac Ñim Ñatamnaxala'.
4Ỹataqta napacalec ye lcata na laue na iqaic na aỹem nquiỹatapega,
ỹataqta qalota na choche aỹem npa'agueetega,
nam huotaique da aỹem nlaxaañi,
qaq ¿ca 'eeteco' da she'eguelaxat ca saishet da secachiỹa?
5'Am Ñatamnaxala', 'am 'auaỹateeta da aỹem 'enaqaic co'ollaxa,
qataq saishet da 'am soxocheesop na ỹasouaxashetpi.
6'Am Nataxala', maye Qaica ca 'Auqalanapec,
saishet qome da huo'o da la'aloxo na 'am pe'etega.
souaxat na ỹasouaxashetpi
'Am Natamnaxala' na Israel le'ecpi,
saishet qome da huo'o da la'aloxo 'anqa'en nam ỹataqta 'am nmittaique.
7Cha'aye souaxat da qoneta,
nache ñeque'etaxangui da ñesheunaguec,
da ỹa'aloxo qalaq ỹapolec da ỹashiguiỹaxac,
8sheeta'am ca chegaqauec da salectaigui na ỹaqaỹañicpi,
sheeta'am ca ỹaqa'a ca chegaqa'ague,
da salectaigui na llalaqpi aso ỹate'e.
9Da ỹauoche ñi 'arma' ỹataqta aỹem ỹalauat,
souaxat da aỹem talec 'enauac da lsheunaxanaxac na 'am isheueetac.
10Da ivita da ñeỹeetac qataq da ñeqouaqchet,
nache namayepi aỹem isheueetac.
11Qataq da saayiñi naua anogo nasouaxaqui',
nache aỹem qane'eetapigui.
12Qaq na nso'ootaña ñi ñegueuo 'enauac da aỹem na'aqtaxaatapigui,
na nỹomaxaicpi qalaq ỹo'ot na lo'onecpi da aỹem ỹe'eetac.
13Qalaxaye aỹem 'am seỹaxaatacot 'Am Nataxala',
'Am Ñatamnaxala' aỹem 'autauan nagui souaxat da 'arsoxoyec,
nache aỹem 'auasateguet qome
souaxat da nache 'eetai' 'artaunaxanaxac,
nache aỹem 'anca'alaxatec qome.
14¡Aỹem 'anqateeguesop qome na nshaxa!
¡Saishet da aỹem iyiiñi naqa'en qome!
¡Qataq aỹem 'anca'alaxateeguesop qome na aỹem nquiỹategapi,
qataq na qaỹoqchiguingui 'etaxat!
15Saishet qome da aỹem 'aua'aqta'a
da aỹem ỹaỹoxonaqchet na la'auataxa na 'etaxat,
qataq saishet da sangui 'anqa'en ana qaỹoqchiguingui lle'eguelaxaso,
ten qom nache aỹem ỹapogoña.
16Ñaq aỹem 'auasateguet 'Am Nataxala'
souaxat da 'arsoxoyec qataq da 'arqouagaxanaqtaic,
qataq da 'archoxonnataxanaxa,
nache aỹem 'anamata'a qome.
17Saishet qome da aỹem 'anqañoxocheesop,
qataq sa 'anaỹaloxon qome da aỹem 'auasateguet,
cha'aye sootaigui da ñiqui'ic.
18Saishet qome da aỹem 'auỹotaique,
qataq aỹem 'anca'alaxatec,
qataq aỹem 'anqateeguesop na ñepa'aguenaxauapi.
19'Am 'auaỹateeta da ñesheunaguec,
qataq da icoxo qataq da ñe'enaguec,
maye ñeque'etaxaatapigui qataq 'am 'auauattoota na aỹem ipa'agueetacpi.
20Da ñesheunaguec ỹataqta ilaxatta añi iquiyaqte,
nache ỹo'ot da ñelauchiguiñi qataq qaica ca ỹa'añaxac,
qataq qaica ca naigui da ñimittaique
ca aỹem icochaq qataq ca aỹem ichoxoren.
21Da huo'o na iqouaxa qalaq aỹem qaiquia'axanec
na deshenataxan qataq da huo'o na ỹaquip
qalaq aỹem qanỹomaxangui na 'euaxaic lataxa.
22Qaq ỹoqo'oye 'auo'otec qome namayepi,
da maiche que'emaxam da lquia'axac.
23Qataq ñaq 'auo'otec qome da sanauaañi namayepi,
qataq nache 'eetai' da iviloxo'l 'anqa'en naua lchel.
24Ỹataqta 'auasaxalec namayepi da 'aralemataic,
qataq da 'ettaigui 'arayeloxo ivirauga qome namayepi.
25Qataq tooleguete 'anqa'en naua lanataqa'ate,
qataq qaica da huo'o ca netaiguilo naua lma'ate.
26Cha'aye namayepi icaatac na 'auo'ot da nque'eenaxac,
qataq ỹe'eetac da nqui'ic na 'auo'ot da lque'emaxa.
27'Anquigaxattec qome da 'aỹa'anem na ỹo'ottac saỹaỹamaxañi,
qataq saishet da nhuanaua'a 'anqa'en da 'arca'alaqtaxanaxac.
28'Auapalaxat na le'enaxatpi maye nanettalec
aca lmalate da nca'alaxa, saishet da 'aualecnoigui
aca le'enaxat lmalate na no'on da lataxac.
29Qaq aỹem maye salola qataq huo'o da ñeque'eenaxac,
ñaq aỹem 'anachalataxaañi 'Am Ñatamnaxala',
qataq aỹem 'anca'alaxatec.
30Qaq aỹem qalaq so'onaxan da sho'oxoren
da le'enaxat Ñim Lo'onatac 'Enauacna,
sho'oxoren Ñimaye qataq saatacot da ña'achecỹaxac.
31Qaq Ñim Nataxala' ỹataqta ỹactec da machiguiñi qome naqa'en de'era,
qaq saishet da 'eeta'am naqa'en da qaỹavigaxat
ca huaca da qoỹanot Ñimaye, huo'otaq ca huaca llalec
maye lỹatreuo naua lcoue qataq naua nna'ache.
32Qaq da ila'a de'era na huo'o da nque'eenaxac,
nache machiguiñi qataq na'añaxatapigui' da lquiyaqteỹaxac,
da nmittaique Ñim Lo'onatac 'Enauacna,
33cha'aye Ñim Nataxala' hua'axaỹa na choxoraqpi,
qataq saishet da ỹo'otan na lalamaxatpi maye qaicoñettai'.
34Qaq ỹo'oxoren qome Ñimaye na piguem, 'alhua, auaxai,
qataq 'enauac na huo'o da lca'alaxa maye netaleguete naamaye.
35Cha'aye Ñim Lo'onatac 'Enauacna nca'alaxatec qome ye Sión,
qataq no'oxoosheguem na huaqta'a't nỹecpi ye Judá,
qaq nache naña yemaye na nhuo' le'ecpi,
da ỹauo'o lalamaxat yi'iye 'alhua.
36Nache na llalaqpi so lamaxashecpi,
nalec qome yemaye da ỹauo'o lalamaxat.
Qataq na ỹauotec da le'enaxat Ñimaye nache netalec yemaye.
