Salmos 73

₁Ñim Lo'onatac 'Enauacna, ỹataqta soxoraic,

ichoxoren na Israel le'ecpi, nam qui'itte' naua lquiyaqte.

₂Cha'aye mashe hua'c da souañi,

qataq saxanaqca qapio'olec nache sesalvi.

₃Cha'aye huo'o da iquiỹaxa na na'amqaanaxaicpi,

qataq souaxat da nquictasheguem da lsallaxa na qauemaicpi.

₄Cha'aye namayepi ỹataqta no'oitom da nachaalataxac,

ỹoqo'oye qaica da leetapigui lauel da ileu,

₅saishet da nque'etaxaatapigui da nque'eenaxac na laỹepi shiỹaxauapi,

qataq sa nauane' da huo'o ca nque'eenaxac da 'eeta'am na laỹepi.

₆Qaq ỹoqo'oye da ño'oxonnaxac 'eeta'am da nqolaataña aca nqola,

qataq da qaica ca iren 'eeta'am naqa'en aca lapoto.

₇Naua la'ai'te qalaq npoqtrec souaxat da chaxaraicpi,

da lashiguiỹaxac qalaq yo'oqta na qauem lhuennataxacpi.

₈Qataq 'enaxanaxaicpi qataq qauema

naua la'aqtaqa da ỹo'ot da loquiaxac,

qataq ỹe'enai' ca lỹa, qataq ỹareetalec,

₉da detaqa qalaq quetega na piguem,

naua la'aqtaqa qalaq queuotegueleguete ana 'alhua.

₁₀Ỹoqo'oye na shiỹaxauapi ỹo'oxoreetac,

cha'aye saishet da ỹanata ca lasouaxashet namayepi.

₁₁Qataq ivitta'a da 'enapec:

¿Ca 'eeteco' da ỹaỹaten de'era Ñim Lo'onatac 'Enauacna?

¿De'era saishet qome da ỹaỹaten Ñim Nataỹaña 'enauacna?

₁₂Qaq 'era da 'eetec ne'ena qauemaicpi,

da ỹataqta saishet da nque'eten,

qalaq nquictasheguem da lsallaxa.

₁₃Qaq ỹataqta qaica ca naigui da qui'itta ñaqa'en añi iquiyaqte,

qataq da qui'itte' ñaqa'en naua ihua'q da saishet da ỹashelgui ca qauem.

₁₄Cha'aye imauec ye na'a'q da aỹem qaiuaxaatac,

qataq aỹem qaiuaxaatac ye nte'eta.

₁₅Qaq taxa da se'enaxat da lhuennataxac namayepi,

nache sogote taxa da huo'o ca satenachet na 'aỹa'alaqpi.

₁₆Qaq co'ollaq sauotaique da saỹaten de'era,

qalaq ỹataqta huo'o da lqalaic.

₁₇Qaq co'ollaq sevira da saigui ñi lma' Ñim Lo'onatac 'Enauacna,

nache huaña da saỹaten ye taỹa'a qom imeuo namayepi.

₁₈Qaq cha'aye 'eesa da maiche 'aỹa'anaña co'ollaxa ye ỹataqta salvi,

da yaqto' taỹa'a 'anqa'en da nlaguiñi.

₁₉Qaq choche nque'elaxatta qome da nlaguiñi namayepi,

nache maiche nlaguiñi naqa'en da lcolanaxa namayepi.

₂₀Cha'aye qom ivita da 'anachaañi 'Am Nataxala',

qalaq qoneta'am ca do'ocheta maye cheta'ague da nlouec,

nache ỹataqta 'auo'otan da saq'en lataxac namayepi.

₂₁Aỹem ỹataqta aỹem nlaqchigui co'ollaxa da ñiqui'ic

añi iquiyaqte qalaq ỹataqta daỹalli,

₂₂souaxat da qaica ca saỹaanapec qataq da iualoxonaxac,

nache sheeta'am ca shiguiỹac da 'am ñachatto'ot.

₂₃Qalaxaye aỹem nache 'eetai' naxa da 'am soota'aguet,

nache 'auacoota'a na aỹoiguishec ihuaq,

₂₄qataq naua 'arqataxaco aỹem ỹauecta'agueta,

qaq que'eca pa'atec na'a'q nache aỹem 'auaconeguet,

da aỹem ỹo'oxoraq 'anqa'en.

₂₅¿Negue'tom ca neto'ot ñaqa'en na piguem?

¡Ye nache 'amta!

Qaq da 'am sooto'ot nache qaica ca lỹa ñeqopittega ana 'alhua.

₂₆Qaq da ỹo'ocỹaxac qataq iquiyaqteỹaxac qaica ca la'añaxac,

qalaxaye Ñim Lo'onatac 'Enauacna ỹa'añaqchet añi iquiyaqte.

Qaq Ñimaye nache 'eetai' da aỹem hueta'aguet.

₂₇Qaq na 'am ca'ai qalaq taỹa'a da ileu,

cha'aye 'am 'aulaxachigui qome na saishet da 'am ỹalaxaguet.

₂₈Qalaxaye aỹem ñiquigueua'a Ñim Lo'onatac 'Enauacna,

cha'aye nachera da ỹaỹamaqchiguiñi ñaqa'en.

Cha'aye aỹem sacho'ot da ñaquitaxac Ñim Nataxala',

yaqto' ishet da sa'axatec 'enauac nam lo'onatacpi Ñimaye.