Salmos 8

₁'Am Nataxala', maye 'am qarta'a,

da 'are'enaxat ỹataqta imattalec 'enauac ana 'alhua,

da 'ayo'oxoyec qalaq npa'axanañi

na ỹataqta qaỹoqotcheguemec piguem.

₂Qaq souaxat na 'ampa'aguenaxauapi,

nache 'auachegoxotchigui da llo'oxonnataxanaxac

na ñaqpiolecpi qataq natai' ñaq lleptacpi,

da 'ano'oxoosheguem ca ñi'iguenaxaqui,

da yaqto' vi'iiguet 'anqa'en da ltaxaỹaxac na sa ỹalaqpi

qataq na depa'aguenataxaatacpi.

₃Qaq naxa da semeteetac na piguem maye 'aro'onatac,

qataq so ca'agoxoic qataq ana huaqaañipi

maye 'aỹa'ano'ot co'ollaxa na piguem,

₄nache aỹem sheeta': «¿Negue'to'

ca naigui ca shiỹaxaua da 'auennatega?

¿Qataq cam shiỹaxaua llalec da sa 'aucoua'ai?»

₅Cha'aye co'ollaq 'auo'ot, qalaq huac da 'eeta'am

'anqa'en na namaxashecpi piguem le'ecpi,

nache 'aỹa'anem da la'amaqchec qataq da llo'oxoyec,

₆qataq 'aỹa'anem da huo'o naq 'enec

da ilo'ogue nam 'aro'onatacpi co'ollaxa,

qataq 'aỹa'anem da imata da ilo'ogue 'enauac namayepi.

₇Qaguetapi, nauegaxanaxala'pi

huaca, shiguiỹacpi maye huauec,

₈qataq na maỹopi maye hueto'ot na piguem da huaỹotac,

qataq na nỹaqpi maye huetangui aso auaxai,

qataq 'enauac na queuotapigui' huetaigui na 'etaxat aso auaxai.

₉'Am Nataxala', maye 'Am Qanatamnaxala',

da 'are'enaxat ỹataqta lta'araic imattalec 'enauac ana 'alhua.