Ña 'ano'onaxat da 'armeenaxanaxac da qomi' 'anamata'alo
1'Am, maye 'aulotague' na Israel le'ecpi,
maye 'auauecta'aguet co'ollaxa so José
'eeta'am 'anqa'en ana qagueta.
'Am maye ca 'aro'onataxanaqa' da 'am nta'a,
nache hueta'alo soua ne'enaqtaqa querubines maye huo'oi naua laua't,
ñaq qomi' 'aua'axaỹalo qataq qomi' 'auachaxanalo da 'ara'añaxac,
2Ỹauaachigui 'anqa'en na Efraín, Benjamín, qataq na Manasés,
da 'anlouec qataq 'auanac da qomi' 'anca'alaxatrec.
3'Am Atamnaxala', ñaq qomi' 'anauaxaỹaxayeshegue'm qome,
qataq 'ano'onaxat da 'armeenaxanaxac,
da qomi' 'anamata'alo nache qomi' 'anca'alaxatrec.
4'Am Atamnaxala' maye Qaica ca 'Auqalanapec,
¿chaq laguio' da 'aỹa'axaañi da 'aualematatega
da natamnaxac na 'aralamaxat nhuo' le'ecpi?
5Nda'a't da qomi' 'aỹa'anema da 'eco' qonoq naua qarache',
qataq ñeỹomaqtapiguilo 'anqa'en na qalota qarache'.
6Nache qomi' 'auo'oteque da qomi' ỹe'eeta'ape na qarhuoreuapi,
qataq na qampa'aguenaxauapi qomi' lasheta'ape.
7'Am Atamnaxala' maye Qaica ca 'Auqalanapec,
ñaq qomi' 'anauaxaỹaxayeshegue'm qome,
qataq 'ano'onaxat da 'armeenaxanaxac
da qomi' 'anamata'alo qataq qomi' 'anca'alaxatrec.
8Qaq 'auachegoxotchiguiña co'ollaxa
ye Egipto da 'andoi' aso uva lcheyec,
nache 'auo'orauec na ỹotta'a't shiỹaxauapi,
nache 'aỹa'aañi asomaye.
9'Ano'onaxaalec ne'ena 'alhua da no'oitot 'anqa'en asomaye,
nache asa'aso uva ỹa'alyiñi naua lpa'aye,
nache nlaxalec ne'ena 'alhua.
10Qaq na lpaqal ivira'a da ỹapolec ana qasoxonaxapi,
qataq ana lcouepi napacalec ana qo'oipaqpi maye ỹataqta logorai.
11Qataq ivirauga aso auaxai ana lcouepi,
qataq ivira'a so tala Éufrates ana llaxataxapi.
12¿Ta'ainco' da 'anlaxaañi so lpaqtaxat asomaye,
cha'aye 'enauac na nlectot asomaye nache napoc ana ala?
13Qataq ana ỹolopi qalaq nlaxaañi,
qataq na huauec shiguiỹacpi ỹauta asomaye.
14'Am Atamnaxala' maye Qaica ca 'Auqalanapec,
ña qomi' 'añe'eguelaxalo nagui,
ña qomi' 'anamatañalo ne'ena qoneto'ot piguem,
ña 'anqouaguec da 'aulo'ogue ana'ana uva,
15ana uva maye maiche 'aỹa'aañi co'ollaxa,
qataq ana llaxataxa maye maiche ñaxat 'anqa'en.
16Qaq ca iquesoq qataq ỹavigaxat anamaye,
ñaq 'aurolec da 'ara'añaxac da 'anlaxaañi camaye.
17Qalaxaye 'autauan qome ca ỹale maye 'arca'aguishec,
qataq ca shiỹaxaua maye maiche 'aro'onatac,
18yaqto' saishet qome da 'am saxanaxauec,
ña qomi' 'avi'eguelaxatoto da qarca'alaxa,
yaqto' nache sho'oxorenaqtac qome da 'are'enaxat.
19'Am Atamnaxala' maye Qaica ca 'Auqalanapec,
qomi' 'anauaxaỹaxayeshegue'm qome,
ñaq 'ano'onaxat da 'armeenaxanaxac da qomi' 'anamata'alo,
qataq qomi' 'anca'alaxatrec.
