Ñim Lo'onatac 'Enauacna naỹamaxate' so David
1'Am Nataxala', nache 'eetai' qome da so'ootac
da la'amaqchec da 'arauotaxanaqtaic,
qataq nache shecto'ot qome da sa'aqtaxaatapeguem,
'enauac ca dalaxaic shiỹaxauapi naua 'aupacchiguilo 'ara'aqtaqa.
2Sa'axattac qome da 'arauotaxanaqtaic
da nache 'eetai', qaica ca loga't,
qataq da sa nqui'c naua 'ara'aqtaqa, 'eeta'am na piguem.
3Qaq 'am qoneta':
«Aỹem ñaỹamaxate' so lleca'aguishec.
Sachaxanapeguem so ỹamaxashec David
da sepacchigui qome da ỹa'aqtac, 'eeta':
4‹Nache 'eetai' qome da sa seraxanai' ca 'am chegoxoguet,
da 'aro'onataxanaxac da 'am nta'a,
nache sanem qome 'enauac ca 'aỹa'alaqpi.›»
5'Am Nataxala', na piguem ỹo'oxoreetac da 'ayo'oxoyec,
qataq da 'aupacchiguilo naua 'ara'aqtaqa,
da ỹalecta'a't na qui'itta da lataxac.
6Cha'aye ¿negue'tom ca neto'ot na piguem
da ishet da 'am qanaloqneguet, 'Am Nataxala'?
Qataq ¿negue'tom ca 'am 'eeta'am nam llalaqpi na 'añaxaicpi?
7'Am maye 'Aro'onatac 'Enauacna
ỹataqta huo'o 'archec
da 'aualectaigui na qui'itta da lataxac,
qataq huo'o da 'ara'amaqchec naqa'en na 'am datato'otpi.
8'Am Nataxala', Atamnaxala' maye Qaica ca 'Auqalanapec,
¿negue'tom cam 'am 'eeta'am?
Cha'aye 'am 'añaxaic qataq 'am coleesop da 'eesa lataxac.
9'Am, 'anala'aguet da 'avia'axaneguet da layeloxo aso auaxai,
qataq ishet da 'avia'axaneguet ana sansatteguet lapaxa asomaye.
10'Am, dapaxañi 'anqa'en co'ollaxa
so 'etaxat le'ec Rajab 'eeta'am 'anqa'en ca leuaxaic,
qataq 'aurolec na 'añaxaic 'arhuaq
da 'aulagaxattac so 'ampa'aguenaxauapi.
11Cha'aye 'aralamaxat na piguem qataq ana 'alhua.
'Aro'onata co'ollaxa ana 'alhua qataq 'enauac na huetalec anamaye.
12Nataqa'en 'aro'onatac da sheu' qataq da la'añaxa.
Qaq añi qasoxonaxa Tabor qataq añi Hermón,
ỹataqta machiyiñi qome da ỹo'ootrac da 'are'enaxat.
13Na 'arhuaq ỹataqta huo'o da la'añaxac,
ỹataqta huo'o da la'añaxac
na 'oiguishec 'arhuaq qataq qaramta.
14Qaq naua nalochiguiñi lataxac qataq ỹaỹamaqchiyiñi lataxaco,
nachenaua na na'attaleguete da 'aro'onataxanaxac da 'am nta'a,
qaq da 'arauotaxanaqtaic qataq da 'eesa lataxac hua'auta'ague da 'icỹaxac.
15Ỹataqta machiguiñi qome ca nhuo' le'ecpi,
maye ỹaỹaten da 'am ỹo'oxoreetac 'Am Nataxala',
qataq quetaigui nam 'are'eraxa,
16cam 'enauaque naua na'axa'te da machiguiñi naqa'en da 'are'enaxat,
qataq ntootapeguec da nalochiguiñi 'aro'onataxanaxac,
17cha'aye camaye 'am ỹachegoxoto'ot
da llo'oxoyec qataq da la'añaxac,
qataq chegoqchigui da no'on 'arqouagaxanaqtaic
da nquictauec da qara'añaxac.
18'Am Nataxala', nache 'am qarpaqtaxanaxat,
qataq nache 'am qarta'a,
'am qui'itta Natamnaxala' na Israel le'ecpi.
19Huo'o co'ollaxa so na'a'q
da huaigui 'anqa'en so nauanaqchec da 'autaqa,
nache 'aua'aqtaxanem na 'aralamaxat nhuo' le'ecpi,
maye ỹataqta 'am ỹalaxaguet, qoneta':
«Mashe sanem da itaunaxanaxac ñim ỹataqta 'añaxaic,
ñim ỹataqta no'on da lataxac ne'ena nhuo' le'ecpi,
maye mashe sanagui da la'amaqchec da nta'a.
20Aỹem sanata co'ollaxa ñi David maye ỹamaxashec,
nache secorelec so qui'itta icoraxanaxat.
21Qaq na ihuaq nache 'eetai' qome da nasoqtañi,
na ihuaq nache 'eetai' qome da ỹa'añaqchettac.
22Nache na mpa'aguenaxauapi,
saishet qome da ique'elaxat da iloquiaxan,
qataq na qauemaicpi saishet da loxonec ñimaye.
23Aỹem, selaxachigui qome ca dataỹa'aguet ñimaye,
qataq seque'emaqchet ca nquiỹatega ñimaye.
24Qaq da ỹauotaxanaqtaic ñimaye,
nache 'eetai' qome da hueta'aguet ñaqa'en,
qataq chegoqchigui da ỹe'enaxat da nquictauec da la'añaxac.
25Qataq sanem da la'añaxac da ilo'ogue aso auaxai,
qataq da ilo'ogue na talapi.
26Nache ñimaye aỹem iỹaxana qome, 'eeta':
‹'Am, nache 'am ita'a, 'Am Ñatamnaxala',
qataq coma' maye ica'alaxaqui.›
27Qaq Aỹem, sanem qome da 'eeta'am da 'enec ca na'auaxanec ñalec,
qataq da nataỹaña na nta'alpi maye netalec ana 'alhua.
28Da ỹauotaxanaqtaic nache 'eetai' qome da huetalec ñaqa'en ñimaye,
qataq nache 'eetai' qome da hueta'aguet da ñaỹamaxataxac.
29Qataq saishet da imeuo qome da lo'onataxanaxac da nta'a,
qataq nache 'eetec ñaqa'en qome cam chegoxoguetpi ñimaye.
30Qalaxaye que'eca llalaqpi da ca'ai na iqataxacpi,
qataq da saishet da ỹo'ot na ỹamaxasoxonaxacpi,
31qataq da ỹe'enai' na iqataxacpi
qataq da sa ỹalaxaguet na ỹamaxasoxonaxacpi.
32Nache serolec aca ỹashelte da seuaxan souaxat da sa ỹalaq,
qataq sauota'a ca iuaxanaxanaxat da seuaxan souaxat da lle'etaxaloxo.
33Qalaxaye saishet qome da ñeqateeguesop da ỹauotaxanaqtaic so David,
qataq saishet da sa sepaguelec da ỹa'aqtac.
34Qataq saishet da sa sepaguelec da ñaỹamaxate' co'ollaxa somaye,
qataq sepacchiguilo naua ỹa'aqtaqa.
35Cha'aye 'oonolec co'ollaxa da maiche aỹem da ñallegoxottela't da sanem so ỹa'aqtac,
ỹoqo'oye saishet da satenachet ñi David.
36Ca chegoxoguetpi ñimaye nache 'eetai' qome da nca'altauec,
qaq da lo'onataxanaxac da nta'a 'eeta'am añi nala' da aỹem nachatto'ot.
37Qataq 'eeta'am ñi ca'agoxoic da saishet da deraỹapigui',
qataq nache 'eetai' da neto'ot na piguem.»
38Qalaxaye 'am 'aumaqauec qataq 'auo'otan ñi 'arcoyiguishec co'ollaxa,
qataq ỹataqta 'aualemataỹa ñimaye.
39Sa 'aupaigui da 'anaỹamaxataxac co'ollaq
'anaỹamaxate' ñi 'aramaxashec,
qataq aso naro'o da nta'a 'auasaxaguet na 'alhua.
40Qataq 'auamaxauec 'enauac so lpaqtaxanaxat,
nache 'aulaxachigui so lle'eguenaxaquipi.
41Nache 'enauac na nlectelec yemaye nache decachiỹa na huo'o,
nache na lauoreuapi ỹataqta ỹe'eetac yemaye.
42Ỹataqta nquiguec 'anqa'en da la'añaxac na mpa'aguenaxauapi,
qataq machiguiñi 'anqa'en na ipa'agueetacpi.
43Qataq 'anqat da llaxa so lainec,
qataq saishet da 'autauan da huo'o da alaataxac.
44Qataq deqat 'anqa'en da llo'oxoyec,
qataq aso nso'onaxaqui da nta'a 'auasaxaguet na 'alhua.
45Qataq nquiga't 'anqa'en naua vi'iye da nachaalataxac,
nache nlaqchigui 'anqa'en da la'aloxo.
46'Am Nataxala', ¿che laguio' da 'axaañi da 'anqañoxottapiguiñi?
¿Peta'a nache 'eetai' da 'ettaigui da 'arayeloxo 'eeta'am ca norec?
47Ña 'auennata'a taxa da ỹataqta saqaỹauec da ñachaalataxac,
qalaq ¿ta'ainco' co'ollaxa da 'auo'ot na shiỹaxauapi?
48Cha'aye ¿negue't ca huo'o da lca'alaxa, nache sa ileu?
qataq ¿negue't ca ishet da dataueeguesop da la'añaxac añi huachiqui?
49'Am Nataxala', ¿hueta'ague ca hua'auchiguiñi 'arauotaxanaqtaic,
maye 'auachaxanapecot co'ollaxa so David da saishet da 'anaralaxat?
50'Am Nataxala', ñaq 'auennata'a da ne'enaguec na 'aramaxashecpi,
cha'aye aỹem huetalec da le'enaxanaxac ne'ena qalota nhuo' le'ecpi.
51'Am Nataxala', na 'ampa'aguenaxauapi ỹataqta qomi' ỹe'enai'salo,
cha'aye da lqauaxac ne'ena 'arca'aguishec nache 'eetai' naxa da qaỹe'eetac.
52Ỹataqta nache 'eetai' qome da 'am qaỹo'oxoreetac 'Am Nataxala'.
¡Aja', nache 'eetec, aja', nache 'eetec!
