Da ño'oxonnataguec Ñim Lo'onatac 'Enauacna
1'Am Nataxala', ñeshetaique da imauec
da iquiyaqteỹaxac da 'am sho'oxoreetac,
qataq da sa'axattac da qalota 'ayo'oxoyec.
2'Am maye 'Anataỹaña 'enauacna,
sauotaique da so'on da 'are'enaxat
souaxat da samachiguiñi qataq ñetootapigui',
qataq so'ootac da llo'oxoyec da 'are'enaxat.
3Na ñepa'aguenaxauapi qalaq 'am dataueeguesop,
nache 'auauaachigui da huañi qataq ileu.
4'Am maye no'oiteguelo naua 'auo'o't da 'anmit na nasouaxashetpi,
nache 'anso'ongui aca 'anso'onaxaqui
da aỹem 'auo'otec ca ỹaỹamaqchiguiñi lataxac.
5Qataq 'aviraxato'ot co'ollaxa na ỹotta'a't shiỹaxauapi,
qataq 'anlaxaañi na qauemaicpi, qataq 'auapalaxat,
nache saishet da qaiuennatega.
6So depa'aguenataxaatac qalaq mashe ileu,
qataq somaye nache l-llañe' so lalamaxat huaqta'a't nỹecpi,
cha'aye 'am 'anlaxaañi, nache da na'aqtaguec
somayepi qaica da huo'o ca no'onañi.
7Qaq Ñim Nataxala' qalaq nache 'eetai' da nta'a,
nache ỹa'ayiñi so nso'onqa' da yaqto' nmit na nasouaxashetpi.
8Ñimaye ỹaỹamaxatchiguiñi da 'eetec da nmit na shiỹaxauapi,
qataq da ilo'ogue na ỹotta'a't nhuo' le'ecpi qalaq qaica ca iỹotauga.
9Ñim Nataxala' nacheñi Ñim lle'eguenaxala' na choxoraqpi,
qataq mpaxattalec namayepi da huaigui da nque'eenaxac.
10'Am Nataxala' ỹataqta 'am pi'iỹa'a na 'am ỹauatton,
cha'aye 'am saỹauano' da 'aualat ca 'am nmittaique.
11Qauo'oñi ca qaro'oñiqui da qavio'oxoyiñi Ñim Nataxala'
maye ilotague' na netaña ye Sión,
qataq qaua'axachem na ỹotta'a't nhuo' le'ecpi na ỹo'otpi Ñimaye.
12Ñim Lo'onatac 'Enauacna, saishet da icoua'ai na huo'o da nqui'ic,
qataq saishet da icoua'ai da nnoinaxac namayepi.
13'Am Nataxala' aỹem 'auchoxoren qome,
ñaq 'aumeten na aỹem ỹachoxoreetacpi qataq aỹem nquiỹatega,
ñaq aỹem 'anqateeguesop ñi lasom da nleuaxa.
14Yaqto' da huaña ñi lasom ye Jerusalén,
nache sa'axattac qome da 'año'oxonnataguec,
cha'aye samachiguiñi souaxat da aỹem 'anca'alaxatec.
15Na ỹotta'a't shiỹaxauapi qalaq tangui aca maiche lshere,
naua lchel qalaq lpachiguilo ca laleguec maye ỹoxottañi namayepi.
16Ñim Nataxala' nachaxan da yaqto' qaỹauatton,
souaxat da ỹo'ot na ỹaỹamaqchiguiñi lataxac,
qaq na qauemaicpi qalaq tangui aca lqoina maye maiche lo'onata.
17Na qauemaicpi qalaq taỹa'a da tangui aca huachiqui,
qataq 'enauac na ỹotta'a't shiỹaxauapi
maye icoua'ai Ñim Lo'onatac 'Enauacna.
18Cha'aye saishet da nache 'eetai' da qaicoua'ai na choxoraq,
qataq saishet da nache 'eetai' da deqat da naquitaxac namayepi.
19Ñaq 'anachaañi 'Am Nataxala',
saishet qome da 'aua'aqta'a da na'amqaanaxac ca ỹale,
ñaq 'am dataỹot qome da yaqto' 'anmit na ỹotta'a't shiỹaxauapi.
20'Am Nataxala' ñaq 'auauo'o qome da lcolanaxa namayepi,
yaqto' namayepi ỹaỹaten da choche shiỹaxauapi.
