Ñim Lo'onatac 'Enauacna chochaq tatec
1'Am Nataxala', nache 'am da qomi' 'ampaxattaleguete,
'enauaque naua vi'iye.
2Co'ollaq saxanaxa da huo'o ana qasoxonaxapi,
qataq saxanaxa da yo'oq ana 'alhua qataq 'enauac na huetalec,
chegoqchiguiña co'ollaq la'atchiguiñi 'enauacna,
qataq ivitta'a ca pa'atec na'a'q, da nache 'amta da 'Am Atamnaxala'.
3Qataq ca shiỹaxaua 'auo'otec da ỹe'eguelaxa da lsoche na 'alhua,
da ivita da qoneta': «Qami' shiỹaxauapi,
qavi'iguelaqỹa da qami' lsoche na 'alhua.»
4Cha'aye caua mil vi'iye qalaq 'am,
'eeta'am 'anqa'en so na'a'q maye ỹoxogue shecait.
Qataq 'eeta'am 'anqa'en ye 'oonolec pe.
5'Am, ỹataqta sa 'auren da 'auauogoleetac na shiỹaxauapi,
namayepi 'eeta'am ca choche nchoxonaxac,
6'eeta'am ana huoue da ñaxat
nache ye nte'eta ñaxatec ana lauoxo,
qalaxaye da avit nquictañi da la'añaxac
nache ivitta'a da deqaqa.
7Da 'arayeloxo ỹataqta qomi' icolanaqche't,
qataq da 'aralemataic ỹataqta qomi' imetreuo naqa'en.
8Na qauemsat maye so'otaq qalaq 'auaỹateetac,
qataq 'enauac na saqcha'a qarasouaxashetpi yo'oqta 'anqa'en.
9Qaq souaxat da 'aralemataic nache imeuo 'enauac da qanachaalataxac.
Naua vi'iye da qanachaalataxac
'eeta'am da 'oonolec qancosaueegue na na'at.
10Da qanachaalataxac qalaq ivi' naua setenta vi'iye.
Qaq na ỹoqta 'añaxaicpi qalaq ivi't naua ochenta vi'iye,
qalaxaye da ño'oxonnaxac ca shiỹaxaua
da qaỹoqtec da nachaalataxac, damaye ỹataqta qapa'atta
qataq ỹauo'o da ndaxac qataq da no'onataxanaxac.
Naua vi'iye sa qaỹaloq da imereuo,
nache 'eeta'ama qomi'.
11Qaq ¿negue'tom ca ỹauatton da la'añaxac da 'aralemataic?
Qataq ¿negue't ca ỹauatton da 'arayeloxo maye ỹo'ot da qarcolanaxa?
12Qaq ñaq qomi' 'auapaxagueneque qome
da saỹatenaq da ñaloqtena'q naua qana'axa'te,
yaqto' da qarauattonaxanaxac ishet da ivi' da naỹaanec.
13'Am Nataxala', ñaq qomi' 'añe'eguelaxalo,
ña 'auchoxoren qome ne'ena 'aralamaxat 'aramaxashecpi.
14Ñaq qomi' 'anlaxatchiguilo qome da 'arauotaxanaqtaic da ñaq nte'eta,
yaqto' 'enauaque naua na'axa'te da qanachaalataxac
da so'onaxanaqtai' da qantonaxac.
15Ña qomi' 'aỹa'anema qome
caua vi'iye maye huaiguilo da qaramaicỹaxac,
maye 'eeta'ama soua vi'iye maye huaiguilo da qanque'eenaxac.
16Ña ỹauaachigui 'anqa'en da 'aro'onataxanaxac na 'aramaxashecpi,
qataq da 'ayo'oxoyec ỹauaachigui 'anqa'en qome
cam chegoxoguetpi namayepi.
17Qaq da lsoxoyec Ñim Nataxala'
maye Qanatamnaxala', qomi' huetaleguete qome.
Qataq nache 'eetai' qome
da na'attañi naqa'en de'era qaro'onataxanaxac,
Aja', nache 'eetai' qome na'attañi naqa'en
de'era qaro'onataxanaxac.
