Ñim Nataxala' qomi' npaxattaleguete
1Ca shiỹaxaua maye huetaigui da
ltelaqtaxanaxac Ñim Nataỹaña 'enauacna,
nache Ñim Qaica ca Ỹaqalanapec ipelteetalec camaye.
2Qaq camaye da detaxaỹa Ñim Nataxala', nache 'eeta':
«'Am, nache 'am ñaquitaxac, qataq 'am ỹe'eguenaxala',
'Am Ñatamnaxala', maye sepe'etega.»
3Qaq nacheñita Ñimaye da ishet da 'am isoueeguesop aca nqoina maye saqcha'a,
qataq naua napaxaco maye dalaataxana'ape,
4cha'aye naua laua't Ñimaye 'am ỹapoleguete qome.
Nache da qoueto'oto naamaye, nache ỹataqta 'avi'imaqtac.
Qataq da 'eesa lataxac Ñimaye, nachera da 'am ntela'a
qataq 'am npaxattalec.
5Nache saishet qome da 'aye'etega na lcheeguesat ye pe,
qataq ana checnapi maye huaỹotega't ye na'a'q,
6qataq naua napaxaco maye quetaiguilo na napalaxa,
qataq na napiina maye deque'emaqtaxan ye laiñi ye na'a'q.
7Cha'aye na'aictaxa da mil ca ileu na pa'aỹa'ague na 'ane'emaq,
qataq diez mil ca pa'aỹa'ague na 'oic,
qalaxaye da qoneta ỹataqta qaica ca machaqca.
8Nacherata da naua 'ara'ai'te ỹauaachigui qome
da 'eetec da ỹaconeguet da nsheetenaguec na qauemaicpi.
9Cha'aye mashe 'auo'ot da 'aye'eguenaxala' Ñim Nataxala',
qataq da 'am npaxattalec Ñim Nataỹaña 'enauacna.
10Nache saishet qome da 'am talec ca sa ỹaỹamaxañi,
qataq ca nalolaxa saishet da nviraua'a ca 'arma',
11cha'aye Ñimaye 'am namaxa qome ca lamaxashecpi piguem le'ecpi,
da yaqto' ntela'a 'enauac da 'icỹaxac.
12Nache ỹauota'aisalo naua lhua'q da 'am nachesheguem,
yaqto' saishet da 'auquia'aqaisop ca coma'.
13Qataq ishet da 'auapigui ca llon, qataq ca na'araxanaq,
qataq ishet da 'auque'emaqchet ca shiguiỹac lta'araic qataq aca na'araxanaq late'e.
14«Cha'aye ỹataqta Aỹem ỹauotec nache ñeca'alaxatec qome,
qataq ñepaxattalec cha'aye ỹauattoota da ỹe'enaxat.
15Qataq qom aỹem iỹaxana, nache sasateguet,
qataq soota'aguet qom huo'o da nque'eenaxac,
qataq ñeca'alaxatec qome qataq sanem da ño'oxonnataguec.
16Qataq sanem da qaỹoqtec da nachaalataxac,
qataq da ntootapeguec da ica'alaqtaxanaxac.»
