Salmos 92

₁¡Ỹataqta 'onaxaic da 'am sho'oxoreetac 'Am Nataxala'!

Ỹataqta 'onaxaic da so'ootac da 'are'enaxat,

'am maye 'Anataỹaña 'Enauacna,

₂qataq da sa'axattapeguec da lta'araic 'arauotaxanaqtaic ye nte'eta,

qataq ye pe, sa'axattac da 'arsoxoyec maye sa nquic,

₃sauota'a ana nvique qataq nasheere,

qataq da huesotta l-lamaxa ana arpa qataq ana lira.

₄'Am Nataxala', 'am 'auo'ot da ỹataqta samachiguiñi souaxat na 'auo'otpi,

nam 'aro'onatacpi ỹo'ot da aỹem nlaqchigui da ñetonaxac.

₅'Am Nataxala', ỹataqta ỹapac lta'araic na 'aro'onatacpi,

qataq ỹataqta qaỹoqotchemeque naua 'arhuennataxaco.

₆Qaq ca qaica ca ỹaỹaanapec qalaq saỹaỹate'n,

qataq saishet da ỹaỹaanegueta namaye.

₇Qaq na'aictoxo' da 'eeta'am na 'auaqpi da ñaxat na qauemaicpi,

qataq da ñaxatec 'enauac na 'etaxaloxoicpi,

qalaxaye namayepi taỹa'a da qailaxachigui.

₈Qalaxaye 'Am Nataxala', nache 'eetai'

da qonetasheguema nam ỹataqta qaỹoqotcheguema.

₉'Am Nataxala', ỹoqta 'eesa qome da imeuo na 'ampa'aguenaxauapi,

qataq nlagaxattac qome 'enauac na qauemaicpi.

₁₀Qalaxaye 'am, 'anquigaxattauec qome

da ỹa'añaxac sheeta'am ca huaca no'onaxa le'ec,

qataq aỹem 'aucorelec ca 'arcoraxanaxat

maye ỹataqta no'on da laitaỹaxac.

₁₁Qataq sauaachigui qome da huañi na ñepa'aguenaxauapi,

qataq sa'aqchigui qome da la'alaxac

na qauemaicpi maye aỹem ipa'agueetacpi.

₁₂Qaq ca no'on da lataxac qalaq dasovi

'eeta'am ana chaic,

qataq nquictasheguem da lañaxataxac 'eeta'am ana cedro ye Líbano.

₁₃Qataq ñaxattalec ye lma' Ñim Nataxala',

qataq dasovi da netaña ye nqasoxoc Ñim Qanatamnaxala'.

₁₄Qaq na'aictaxa da mashe togoshaapec qalaq huo'o da alaỹaxac,

qataq nache 'eetai' da la'añaxac qataq daralata.

₁₅Da yaqto' ỹa'axattac da Ñim Nataxala' maye ipaqtaxanaxat,

Ñimaye ỹataqta no'on da lataxac,

qataq saishet da hueto'ot ca sa nalogoñi lataxac.