Ñim Nataxala' nacheñi ñi nmit 'enauacna
1'Am Nataxala', maye ishet da 'apalaique ca nvi',
'Am Atamnaxala', ñaq 'anachaxan qome.
2Ña 'anachaañi qome, 'am maye 'anmit na netalec ana 'alhua,
ña 'aỹa'anem ca 'itchiguiñi nhuaxanaguec na na'amqaanaxaicpi.
3'Am Nataxala',
¡Chaq laguio' da ỹaxaañi da le'enaxanaxac na 'etaxaloxoicpi!
4'Enauac ne'ena qauemaicpi ỹataqta na'amqaanaxaicpi,
qataq taxaỹaxaicpi souaxat da na'amqaanaxac.
5'Am Nataxala',
namayepi ỹataqta petapigui na 'aralamaxat nhuo' le'ecpi,
qataq huetaiya' naqa'en nam 'aralamaxatpi.
6Qataq ỹalauat ana pa'aipi qataq na chegaqauecpi,
qataq ỹalauat na qaicaua caua lta'al.
7Qataq ivira'a da 'enapec: «Ñim Nataxala' sa nauaañi,
Ñim Natamnaxala' so Jacob saishet da nanoma de'era.»
8Qaq ỹoqo'oye, qami' maye qaica ca qauaỹaañiỹapec,
ña qauaỹaañiteguet qome de'era cha'aye qami' 'enaqaiqa
¿che laguio' da huo'o ca qauaỹachiñi?
9¿Peta'a sa hua'axaỹa qome de'era Ñim ỹo'o't naua ntela lauaco?
Qataq ¿peta'a sa ila'a qome de'era Ñim ỹo'o't co'ollaxa naua na'ai'te?
10Qataq ¿peta'a saisheto' da ỹo'ot qome ca nhuaxanaguecna,
Ñim ishet da nmit na ỹotta'a't shiỹaxauapi,
qataq ỹapaxaguenec da naỹaanec 'enauac na huetalec ana 'alhua?
11Ñim Nataxala' ỹaỹaten da lhuennataxac na shiỹaxauapi,
da ỹataqta qaica ca naigui.
12Qaq ỹataqta machiguiñi qome ca shiỹaxaua
maye 'auaỹamaxaañi 'Am Nataxala',
cam 'aỹa'anema naua 'arapaxaguenataxanaxaco,
13da yaqto' ỹe'emaqtac da ivita da nvi'
caua na'axa'te maye huaiguilo da nhuogoxo.
Qalaxaye ca qauemaic qaiqataxaatai' aca nshere maye laỹe'.
14Qalaxaye 'Am Nataxala', saishet qome
da qoca'ai na 'aralamaxat nhuo' le'ecpi,
qataq saishet da 'andoxottec nam 'aralamaxatpi.
15Maye nacherata da ca nmit na nasouaxashetpi,
qalaq ỹe'eguelaxa qome da nalochiguiñi lataxac,
qaq 'enauac na no'on da lataxac quelec qome damaye.
16Qaq ¿negue't ca nachaañi co'ollaxa
da aỹem iueelec da nqanaxat na 'etaxaloxoicpi?
Qataq ¿negue'tom ca huetaua'a na ỹaỹe
da aỹem itauan da nqanaxat na qauemaicpi?
17Cha'aye da saishet taxa da aỹem itauan Ñim Nataxala',
nache saqaỹaloq taxa da sootaigui da ntochiguiñi nleuaxa.
18Qaq co'ollaq huo'o so huaña da sheeta': «Naua ỹapia'ate desalvi'.»
Nache da 'archoxonnataxanaxa 'Am Nataxala', anac da aỹem itauan.
19Qataq co'ollaq nquictauec da ỹaquicoxo,
nache da 'ara'añaqtaxanaxac ỹo'ot da aỹem nlaqchigui da ñetonaxac.
20Cha'aye 'am, saishet da 'anauochaxaua na nta'alpi maye cachaxaicpi,
nam ỹo'ot na sa ỹaỹamaxañi da yaqto' dataỹa'aguet na namaxasoxonaxacpi,
21nam dataỹa'aguet na shiỹaxauapi maye no'on da lataxac,
qataq ỹaneguet da l-leuaxa na qaica ca ỹasouaxat.
22Qalaxaye Ñim Nataxala', nacheñi ñim ỹe'eguenaxala',
qataq Ñim Ñatamnaxala', nacheñi ñi coma' maye aỹem mpaxattalec.
23Ñimaye ỹo'ot qome da maiche talec namayepi da lle'etaxaloxo,
qataq nam qauemsat maye ỹo'ottac
maiche nlaxaañi namayepi.
Ñim Nataxala' maye Qanatamnaxala' ilaxachigui qome namayepi.
