Salmos 98

₁Qauo'oñi qome ca dalaxaic no'onec da

qauo'onaxañiito'ot Ñim Nataxala',

cha'aye Ñimaye ỹo'ot na huo'o da na'aalaxa,

cha'aye na aloiguishec qataq qui'itta lhuaq ivira'a da doxonaxan.

₂Ñim Nataxala' ỹa'axatec co'ollaxa da lca'alaqtaxanaxac,

qataq ỹachaxaata da nalochiguiñi lo'onataxanaxac,

ỹauaachigui naqa'en na ỹotta'a't shiỹaxauapi,

₃cha'aye sa icoua'ai da lauotaxanaqtaic,

qataq da 'eesa la'aqtac maye ỹanem co'ollaxa na Israel le'ecpi.

Nache 'enauac na hueta'alo naua loga'te ana 'alhua

ỹauaachigui co'ollaxa da lca'alaqtaxanaxac Ñim Qanatamnaxala'.

₄Ỹataqta qauamaichiguiñi da qauo'onaxañiito'ot Ñim Lo'onatac 'Enauacna,

'enauac qami' maye qoñiitalec ana 'alhua,

ỹataqta qanasheñetcheguem da qantonaxaqui,

qataq qauo'oñi na no'onecpi.

₅Qauo'oñi na no'onecpi da qauo'onaxañiito'ot Ñim Nataxala',

qauo'onaxañiita'ai' da l-lamaxa ana nvique arpa

qauauoita'a da ỹotta'a't lavilỹaxac da no'onaxanaxac.

₆Ỹataqta qauamaichiguiñi da qauo'onaxañiito'ot Ñim Nataxala' maye Nta'a,

qauo'onaxañiita'ai' da l-lamaxa ana nasheerepi.

₇Ỹataqta dauaxan qome aso auaxai

qataq 'enauac na huetangui asomaye,

ana 'alhua qataq 'enauac na netalecpi anamaye.

₈Qataq iuaxana't qome naua lhua'q na talapi,

qataq ntonapigui' qome ana qasoxonaxapi,

₉qataq do'onaxaato'ot Ñim Nataxala',

cha'aye mashe anac da nmit ana 'alhua,

irolec qome da nalochiguiñi lataxac

qataq ỹaỹamaqchiguiñi lataxac da nmit na nhuo' le'ecpi.