Ñim Nataxala' nacheñi ñi nataỹaña 'enauacna
1Ñim Nataxala' nacheñi ñi Nta'a,
añi nso'onaxaqui Ñimaye
netanguilo soua ne'enaqtaqa le'enaxa't querubines,
qaq na ỹotta'a't shiỹaxauapi ỹataqta iviloxol,
qataq ana 'alhua ỹataqta cholaxan qome.
2Da la'amaqchec Ñim Nataxala' ỹataqta imattalec ye Sión,
qataq nataỹaña 'enauac na nhuo' le'ecpi.
3Ỹataqta qaỹo'oxoren qome da lta'araic
qataq chaqaic le'enaxat Ñimaye.
¡Ñimaye ỹataqta qui'itta!
4'Am Nta'a 'añaxaic maye 'auauotec da nalochiguiñi lataxac,
'am, 'alapaxañi co'ollaxa da 'eeta'a't lataxac,
qataq so Jacob 'auo'otec da nalochiguiñi qataq ỹaỹamaqchiguiñi lataxac.
5¡Qavio'oxoyiñi qome Ñim Nataxala' maye Qanatamnaxala',
qataq qaua'ayiỹoto naua qarllectelli'!
¡Ñimaye ỹataqta qui'itta!
6So Moisés qataq Aarón nache ỹalectaiguilo co'ollaxa so ntaxaỹaxanaxanecpi,
qataq so Samuel ỹalectaigui co'ollaxa som ỹo'oxoreetac da le'enaxat Ñimaye.
Qaq naxa somayepi da iỹaxanot Ñim Nataxala',
nache Ñimaye ỹasateguet da lỹaxanaxac.
7Ñimaye huetaigui co'ollaxa so lo'oc da detaqtague' somayepi,
nache somayepi ipacchigui co'ollaxa nam lamaxasoxonaxacpi Ñimaye,
qataq na lqataxacpi maye ỹanem somayepi.
8'Am Nataxala' maye Qanatamnaxala',
'am, 'auasateguet co'ollaxa da lỹaxanaxac somayepi.
Qaq somayepi nache 'Am Natamnaxala' maye 'auchoxoren somayepi,
na'aictaxa co'ollaxa da 'auo'ot da nhuaxanaguec souaxat na lasouaxashetpi.
9Qavio'oxoyiñi qome Ñim Nataxala' maye Qanatamnaxala',
qataq qaua'ayiỹoto naua qarllectelli'
qom qoviita'a añi qui'itta nqasoxonaxa,
cha'aye ỹataqta qui'itta Ñim Nataxala' maye Qanatamnaxala'.
