Dam no'on na'aqtac maye qoỹaalec nam itaxaỹaxan ana'ana nere
1-2Ñim Lo'onatac 'Enauacna ỹachaxana So Jesucristo, nam mashe nayeeta'a da yo'oq da yaqto' Somaye ỹaỹaanaxanaxanec na lo'onataxanaxanecpi. Qaq ỹoqo'oye So Jesucristo da'aqtaxanem so Juan maye lamaxashec, ỹachegoxotchigui so lamaxashec piguem le'ec Ñim Lo'onatac 'Enauacna; qaq so Juan, nache ỹiyiñi 'enauac de'era na'aqtaxanaxac maye ỹataqta 'eesa.
3¡Ñim Lo'onatac 'Enauacna ỹami' da nqouagaxa cam itaxaỹaxan de'era na'aqtaxanaxac da ỹalectaigui na laỹepi shiỹaxauapi! ¡Qataq nataqa'en ỹaalec da nqouagaxa 'enauac nam na'axaỹaxaatega de'era na'aqtaxanaxac qataq ỹalaxaguet! ¡Mashe nayeetai' ca na'a'q da Ñim Lo'onatac 'Enauacna ipacchigui naqa'en 'enauac ne'ena ỹa'axattac ana'ana nere!
Da lquinaxanaxac so Juan
4-5Aỹem Juan, samaxa ana ỹere qataq sequiita'ape naua siete 'aleu' maye netaleguete na ỹa'amaqten so Jesús maye netaigui ye 'alhua Asia. Ñim Lo'onatac 'Enauacna, Ñim nache 'eetai' da huo'o, qataq Ñim do'onataxaatac nagui, qataq naỹa'acna. Aỹem ỹataqta huo'o da iyaxa da Ñim Lo'onatac 'Enauacna qataq So Jesucristo qataq soua siete na'añaxaco saqcha'alo maye nachattraua'a añi nso'onaxaqui Ñimaye, da qami' ỹauoteque qataq qami' ỹanema ca qarlagaxayiqui. Sa'amaqtenaq da So Jesucristo qomi' ỹauoteque qataq qomi' da'aqtaxanema da 'eesa na'aqtaguec Ñim Lo'onatac 'Enauacna. So Jesucristo nacheso so la'auaxanec da nca'aleeguesop da nleuaxa, qataq nacheso so ilotague' 'enauac nam nta'alpi maye ilotague' nam 'alhuapi.
Qataq chegoqchigui da l-leuaxa So Jesucristo da Ñim Lo'onatac 'Enauacna ỹapalaxat na qarasouaxashetpi. 6Nataqa'en So Cristo qomi' ỹanema da qaro'onataxanaxac da 'eeta'am da lo'onataxanaxac na nta'alpi maye ilotague' na 'alhuapi qataq qomi' ỹanaguilo da qomi' ltaxaỹaxanaxanaqa naqa'en na shiỹaxauapi da so'onataxanaqot Ñim Lo'onatac 'Enauacna maye Lta'a. Qaq ỹoqo'oye ¡'Enauac da qoñiita qavio'oxoyiñi So Jesucristo, cha'aye 'oonolec Somaye da hueto'ot 'enauac da na'añaxac ana 'alhua! Aja', nache 'eetec.
7¡Ñaq qauloỹa!
¡Na Cristo mashe anacta, netalec na lo'oc na piguem!
'Enauac da qailota'aguet da anacta,
ivira'a nam ỹalauat co'ollaxa;
qataq nataqa'en 'enauac na huetalec ana 'alhua,
nỹen souaxat namaye.
'Era dam 'eetec qome, ¡aja', nache 'eetec!
8Ñim Nataxala' maye qaica ca 'ena'am da la'añaxac, Ñim nache 'eetai' da huo'o qataq Ñim do'onataxaatac nagui qataq Ñim mashe nayeetai', 'eeta' da la'aqtac: [«Aỹem maye Nachaỹem la'atchiguiñi, qataq Nachaỹem pa'atec.»]
Da nmeenaguec da llo'oxoyec So Cristo
9Aỹem Juan, maye maiche aỹem qarỹai da sa'amaqtenaqtac So Cristo, cha'aye qami' qataq aỹem huo'o da qarpi'iỹaxac Somaye. Qaq souaxat da ỹataqta huo'o da ipi'iỹaxac Somaye, nache ñeuanaua'a da lo'onataxanaxac Ñim Lo'onatac 'Enauacna 'eeta'am 'enauac da qoñiita: Qataq nataqa'en huo'o da ñeqalanaxac da satata'aguet na lqalaic, sheeta'ama qami'. Qalaxaye nataqa'en huo'o da ỹa'añaxac maye aỹem ỹami' Ñim Lo'onatac 'Enauacna da yaqto' ñala'aguet ne'ena que'eenaxacpi. Qataq souaxat da sa'axattac da la'aqtac Ñimaye qataq da sa'axattac So Jesucristo, nache aỹem qaỹamaxauga ana ỹaqa'ata 'alhua maye le'enaxat Patmos. 10Qaq huetoigui so na'a'q maye laloxoqui da qaỹo'oxoren So Qarataxala', co'ollaq aỹem souaigui da la'añaxac So Saqcha'a Na'añaxac Qui'itta. Nache sa'axaỹa co'ollaxa so lta'araic nvilỹaxac, chemaxague na ilaq, 'eeta'am da l-lamaxa ana nasheere. 11Qaq se'eso nvilỹaxac aỹem 'enapega, 'eeta': «'Auauo'o aca 'ere da 'iyiñi nam 'aulota'api, ime, qaq 'auamaxalo naua siete 'aleu' maye hueta'alo nam ỹa'amaqten So Jesús maye huetaigui ye 'alhua Asia, yem nỹecpi ye Éfeso, Esmirna, Pérgamo, Tiatira, Sardis, Filadelfia, qataq ye Laodicea.»
12Qaq can ñamata'ague na ilaq da sechemaxata som aỹem detaqtacot, nache sela'alo soua siete ncoỹaraxanaxaqui' maye chegaqaiguilo na ndotec oro. 13Qaq na laiñi se'esoua siete ncoỹaraxanaxaqui' sela'a so 'eeta'am So Jesús Som Shiỹaxaua Llalec. Qaq soua alogo ỹataqta ivildañi, qataq so nsaataxaqui maye chegaqaigui na oro qalaq ivirasheguema ana ltogue. 14Qaq na laue somaye qaica ca 'ena'am da lapagaxa, 'eeta'am da lapagaxa na qagueta laue, qataq ivira'a da 'eeta'am da lapagaxa ana aloñi. Qaq naua la'ai'te qalaq 'eeta'am na le'eraxa na norec. 15Qaq naua lchel ỹataqta qashelectrapiguiñi, 'eeta'am da lqashelgaxa na lcat le'enaxat bronce da mashe ime da nqatelaguec. Qaq da lavilỹaxac 'eeta'am da l-lamaxa ana lapaxa aso auaxai. 16Qaq na lhuaq maye aloic nasoqta'alo soua siete huaqaañi. Qaq na alap chegaqaigui so ỹeelonec ỹataqta shetteguet qataq dos naua ala'api. Qaq na lashec qalaq ỹataqta 'eroigui, 'eeta'am na le'eraxa añi nala' da mashe laiñi ye na'a'q.
17Qaq can sela'a, nache souañi, ñalo'oto naua lchel Somaye, 'eeta'am da seleu. Qalaxaye Somaye ỹauota'a na lhuaq aloic da aỹem ỹashel-lec, nache aỹem 'enapega, 'eeta':
Saishet da 'añi'i. Aỹem maye Nachaỹem la'auaxanec, qataq Aỹem maye Nachaỹem sepa'atec, 18qataq Aỹem ñeca'altauec. Aỹem co'ollaxa seleu, qalaxaye nagui chochaq tatec da ñeca'altauec, qataq huo'o da ỹa'añaxac da ñataỹaña da la'añaxac da nleuaxa.
19'Iyiñi 'enauac nam 'auauaachigui: nam mashe yo'oq qataq cam ñaq taỹa'a da yo'oq. 20Aỹem 'am sa'aqtaxanem dam saqcha'a naiguilo soua siete huaqaañi, maye 'auauaachiguilo da huetaiguilo na ihuaq qataq dam saqcha'a naiguilo soua siete ncoỹaraxanaxaqui' maye chegaqaiguilo na oro. Soua siete huaqaañi, naiguilo naua lamaxa'she Ñim Lo'onatac 'Enauacna maye ilotagueto nam ỹa'amaqten So Jesús maye netaleguete naua siete 'aleu'. Qaq soua siete ncoỹaraxanaxaqui' naigui na 'amqaanataxanaxaicpi maye netaleguete naua siete 'aleu'.
