Soua siete ỹomaxaqui'
1Nache sa'axaỹa so nvilỹaxac ỹataqta alam chegoqtoigui aso no'onaxanaxaqui, da 'eetegalo soua siete namaxa'she piguem lashe', 'eeta': «Qoqui, nache qaucoyeelec ana 'alhua nam huetagui naua ỹomaxaqui' maye naigui dam qaica ca 'ena'am lalemataic Ñim Lo'onatac 'Enauacna.»
2Nache jec som hua'auchiguiñi namaxashec piguem le'ec da icorelec ana 'alhua som huetagui aso ỹomaxaqui, nache 'enauac nam huo'o na na'anaqte maye chegoqo'ot so shiguiỹac leguemaxaic qataq ỹo'oxoreetac so ne'enaqtac maye lqui'i somaye, namayepi nasheguem na lo'oc na lquesaxa maye ỹataqta qaica ca 'ena'am da lqui'ic.
3Qataq jec so lỹa namaxashec da icorelec aso auaxai so huetagui aso ỹomaxaqui, nache nam le'ec 'etaxat asomaye nañigui na ntago'q, 'eeta'am na ltago'q na nalaatac shiỹaxaua. Huaña, nache ileu 'enauac nam huo'o da lca'alaxa maye huetangui aso auaxai.
4Qataq jec so lỹa namaxashec piguem le'ec da icorelec so huetagui aso ỹomaxaqui anam talapi qataq anam npaxaatasheguem na le'ec, nache na 'etaxat nañigui nataqa'en na ntago'q. 5Ime, qaq sa'axaỹa som namaxashec piguem le'ec maye hueto'ot da na'añaxac da ilotague' na 'etaxat, 'eeta':
«'Am maye 'Aro'onatac 'Enauacna, 'Am maye ỹataqta 'am qui'itta,
qataq chochaq tatec da 'anca'altauec
qataq ỹaỹamaqchiguiñi da huo'o ye 'arhuaxanaxanaxac.
6Nam 'am ipa'agueetacpi qalota so ỹalauat
nam 'aralamaxatpi maye ỹataqta qui'itta,
qataq nataqa'en so 'ara'aqtaxanaxanecpi.
Qaq ỹoqo'oye, 'am nagui
'aỹa'anem da nỹomgui na ntago'q namayepi,
¡cha'aye ỹataqta 'itchiguiñi da talec namayepi de'era!»
7Nataqa'en sa'axaỹa so nvilỹaxac chemaqteua'a aso nca'atoxonaxalate, 'eeta': «Aja', 'am Ỹataxala' maye 'Aro'onatac 'Enauacna, qataq qaica ca 'auqalanapec, ne'ena 'arhuaxanaxanaxacpi ỹataqta ỹaỹamaqchiguiñi qataq 'eesa.»
8Qataq jec so lỹa namaxashec piguem le'ec da icorelec so huetagui aso ỹomaxaqui añi nala', nache qoỹami' añi nala' da la'añaxac da yaqto' na le'eraxa ishet da ỹavigaxat na shiỹaxauapi. 9Nache ỹataqta 'enauac da ỹavic na shiỹaxauapi, qalaxaye ñaqaiyeta saishet da ỹe'egueloqot Ñim Lo'onatac 'Enauacna qataq da yaqto' ỹo'oxoren. Nachaqrata da dalemataỹa Ñim Lo'onatac 'Enauacna maye huo'o da la'añaxac da ishet da ỹa'axaneguet se'eso qaica ca 'ena'am da lchec lhuaxanaxanaxac Ñimaye.
10-11Qataq jec so lỹa namaxashec piguem le'ec da icorelec so huetagui aso ỹomaxaqui so nso'onqa' so shiguiỹac leguemaxaic, nache da lo'onataxanaxac somaye ỹataqta napalñi. Nache na shiỹaxauapi ỹataqta inaiguilo naua lachaqa'ate, souaxat da nqui'ic, cha'aye na lquesaxa nachena na ỹo'ot da lta'araic nqui'ic. Qalaxaye ñaqaiyeta saishet da ỹaxaañi da ỹo'ottac na qauem, nachaqrata da dalemataỹa Ñim Lo'onatac 'Enauacna, souaxat da nqui'ic; ¡ỹataqta sa iyacnapec da detaqtega Ñim Lo'onatac 'Enauacna maye neto'ot na piguem!
12Qataq jec so lỹa namaxashec piguem le'ec da icorelec so huetagui aso ỹomaxaqui so lta'araic tala le'enaxat Éufrates. Huaña, nache 'em na le'ec 'etaxat se'eso tala da yaqto' so nta'alpi maye chegaqa'ague da nala' lliguisheguem, ishet da ỹa'axasoxoolec somaye.
13Huaña, nache sauaachigui na alap so shiguiỹac leguemaxaic maye 'eeta'am na na'araxanaq, qataq na alap som lỹa shiguiỹac leguemaxaic, qataq na alap som 'eetega da la'aqtaxanaxanec Ñim Lo'onatac 'Enauacna qalaxaye saq 'en da chegoqtoiguilo soua tres na'añaxaco saq cha'alo maye qauema, 'eeta'ama ana miỹo. 14Qaq soomaye nachesoua soua saq cha'alo na'añaxaco maye qauemaiqa, maye ỹo'ottac na na'anecpi maye ỹo'ot da na'aalaxa. Qaq soomaye huenoxoore'c, da yaqto' laỹona't 'enauac na nta'alpi maye huetalec ana 'alhua, da yaqto' delogui' Ñim Lo'onatac 'Enauacna maye qaica ca ỹaqalanapec. Qaq damaye ỹo'ot qom ivita que'eca na'a'q da Ñim Lo'onatac 'Enauacna nmit 'enauac na huetalec ana 'alhua.
15Qaq ỹoqo'oye Ñim Nataxala' 'eeta' da la'aqtac:
«Aỹem ñe'eguelaq qom saishet da Aỹem qaỹauotaique, sheeta'am ca cachaxaic da decache ye pe da huo'otaq saishet da qaỹauotaique. ¡Qaq Ñim Lo'onatac 'Enauacna ỹaalec da nqouagaxa cam nache 'eetai' da nlotauec qataq ỹaatrañi naua alogo da yaqto' saishet da qaỹauanalec da huetauec! ¡Qataq qaica ca ncoqtaique!»
16Nache se'esoua saq cha'alo na'añaxaco maye qauemaiqa lapona't na nta'alpi, huaña naqa'en ye 'alhua maye na hebreo la'aqtaqa le'enaxat Armagedón.
17Qataq jec so pa'atec soua siete namaxa'she piguem lashe' da icorelec na pa'asheguem so huetagui aso ỹomaxaqui, huaña, nache chegoqoolec aso so'onaxaqui maye netaña aso no'onaxanaxaqui late'erai so nvilỹaxac ỹataqta alam, 'eeta':
«¡Mashe sogote da ime!»
18Nache huo'o so nqashelgaxa, qataq so nvilỹaxac, qataq so nalataxa qataq huo'o so lta'araic qalagoxoñi 'alhua, somaye ỹataqta napacalec 'enauac nam nacholaxanaxapi maye huo'o co'ollaq cheta'ague da huo'o na shiỹaxauapi ana 'alhua. 19Nache se'eso qalagoxoñi 'alhua, somaye tres soua lpoxoỹaqa'ate naqa'en ye lta'araic nỹecpi ye Babilonia, qataq na hueta'a na lta'araic nỹecpi 'enauac ana 'alhua qalaq qalagoxoñi. Ñim Lo'onatac 'Enauacna saishet da icoua'ai ye nỹecpi ye Babilonia, nachaqrata da ỹauo'o so nhuaxanaguec ỹataqta qaica ca 'ena'am da lchec qataq imatalec da layeloxo. 20Qataq 'enauac ana ỹaqa'ata 'alhuapi qataq ana qaỹoqotcheguemec 'alhuapi qalaq deqat. 21Qaq na piguem qalaq chegoqo'ot aso late'erai lache, nache talec na shiỹaxauapi. Ana lache 'eeta'am da lsallaxa na coma', ỹoqo'oye da lsallaxa ivi' cuarenta kilos añi 'oonole. Qaq na shiỹaxauapi qalaq dalemataỹa qataq isheueetac Ñim Lo'onatac 'Enauacna, souaxat aso lache, cha'aye ỹataqta lta'araic da nque'eenaxac naqa'en somayepi.
