Aso 'alo qataq so shiguiỹac leguemaxaic
1Nache so 'oonolec soua siete namaxa'she piguem lashe' maye lasoqta'alo soua siete ỹomaxaqui', somaye anac. Nache aỹem 'enapega, 'eeta':
«'Aỹala, ñaq 'am sachaxana da nhuaxanaguec maye iuatta'aguet añim 'alo maye ỹataqta lta'araic da lquisheguetaxac maye nso'ooto'ot na loigue na qalota 'etaxat. 2Qaq na nta'alpi maye ilotague' nam huetalec ana 'alhua, nquishestague' añimaye qataq huaxaiguet da yaqto' ỹo'oxoren nam qanatameetacotpi maye saq 'en, qaq nache 'eetec nataqa'en na laỹepi shiỹaxauapi maye huetalec ana 'alhua.»
3Qaq can ñaq sootaigui se'eso ỹauanaqchec maye aỹem ỹanem So Saqcha'a La'añaxac Ñim Lo'onatac 'Enauacna, nache se'eso namaxashec piguem le'ec aỹem ỹauegueuga so toolec 'alhua. Huaña somaye, nache sela'a aso 'alo netalec so shiguiỹac leguemaxaic togaxaraic da lo'oxoỹaxac. Se'eso shiguiỹac leguemaxaic siete naua lqaigo, qataq diez naua lcouel somaye nanettalec 'enauac na lo'oc na ne'enaxatpi maye ỹataqta npa'aguene' Ñim Lo'onatac 'Enauacna. 4Qaq asa'aso 'alo da lo'oxoỹaxac naua alogo, qalaq naueralec da ltogaxa qataq togaxaraic. Qataq na no'otaxatpi ndotec na chegaqaigui na oro qataq na no'on coma' qataq ana perla. Qaq asomaye na lhuaq aloiguishec nasoqta'a aso ỹomaxaqui maye chegaqaigui na oro nlaqchigui na lataxa. Qaq se'eso lataxa naigui na qalota ỹo'ottac qauem qataq da ỹo'oxoreetac nam qanatameetacotpi maye saq 'en. 5Qaq asomaye nanettalec na latap so ne'enaxat maye saqcha'a ca naigui. 'Eeta': «Nam ỹataqta 'amaqtaqaic Babilonia, nachana ana late'e ana quisheguetaxaipi qataq 'enauac nam qauem maye nqaigaxat maye huetalec ana 'alhua.» 6Qaq can ime, nache aỹem ñanoma da asa'aso 'alo nỹomgui se'eso lataxa, nache asomaye taxai. Qaq se'eso lataxa naigui na ltago'q som lalamaxatpi Ñim Lo'onatac 'Enauacna qataq som qaỹalauatpi, souaxat da saishet da ỹaxanec da lpi'iỹaxac So Jesús.
Qaq se'eso ỹauanaqchec ỹataqta ỹo'ot da ỹa'aalaxa. 7Qalaxaye so namaxashec piguem le'ec aỹem 'enapega, 'eeta':
«¿Ta'ainco' ye ỹataqta huo'o da 'are'elaxa? Aỹem nagui 'am sa'axatem dam naigui maye saqcha'a de'era 'arauanaqchec. 'Am sa'aqtaxanem da naigui asa'aso 'alo qataq so shiguiỹac leguemaxaic maye siete naua lqaigo qataq diez naua lcouel maye netalec asomaye.
8Se'eso shiguiỹac leguemaxaic maye 'auauaachigui, nacheso so 'oonolec maye nca'altauec co'ollaxa, qalaxaye nagui mashe saqca. Qaq somaye qaltaq nnoxoosheguem qome da chegaqaña cam laponqa' na leuaxaicpi, qalaxaye nachaqrata da yaqto' ima da qailaxachigui. Qaq na shiỹaxauapi maye huetalec ana 'alhua nam saishet da qoỹettaua'a acam lmalate nam qanca'alaxatecpi chegoqchiguiña co'ollaq saxanaxa da qaỹo'ot ana 'alhua, namayepi ỹataqta huo'o da la'aalaxa qom ỹauaachigui se'eso shiguiỹac leguemaxaic maye nca'altauec co'ollaxa, qalaxaye mashe saqca, qalaxaye qaltaq ỹe'eguelaxalec da nca'alec.
9Qaq da yaqto' qaỹaỹaten de'era, qalaq qaiuen ca naỹaanec: se'esoua siete lqaigo, soomaye naiguilo naua siete qaỹoqotcheguemeque 'alhuaye maye nso'ootaleguete asa'aso 'alo, qataq nataqa'en naiguilo naua siete nta'al. 10Qaq mashe cinco se'esoua nta'al maye mashe ileu, qaq 'oonolec nagui ñi ñaq do'onataxaatac. Qaq ñi lỹa qalaq saxanaxa da do'onataxan nagui, qalaxaye qom ivita da do'onataxan qalaq saqaỹaloq qome da ivirec da lo'onataxanaxac. 11Qaq se'eso shiguiỹac maye nca'altauec co'ollaxa, qalaxaye mashe saqca, somaye nacheso som 'oonolec se'esoua siete nta'al. Somaye ñe'eguelaq qome da yaqto' ỹe'eguelaxalec da do'onataxan, nache ivi' ocho na nta'alpi, qalaxaye nache huaña da imauec da qailaxachigui somaye.
12Qaq se'esoua diez lcoue maye 'auauaachiguilo, naiguilo caua diez nta'al maye saxanaxa da do'onataxa'n; qalaxaye qom do'onataxa'n, nache ivi' una hora da huo'o da la'añaxa'c, qataq ntauneto so shiguiỹac leguemaxaic da do'onataxa'n, 'eeta'am na nta'alpi. 13Qaq se'esoua diez nta'al 'oonolec da lhuennataxa'c, nache ỹanem da la'añaxa'c qataq da lamaxasoxonaxac da yaqto' lataxala' so shiguiỹac leguemaxaic. 14Ime, nache se'eso shiguiỹac leguemaxaic qataq soua diez nta'al deloguito So Qagueta Llalec. Qalaxaye So Qagueta Llalec qataq som ca'attague'pi nauec soomaye. So Qagueta Llalec dauegaxan, cha'aye nacheso so ỹactec da 'amaqtaqaic, saq 'ena'am na laỹepi nataxala'pi qataq nacheso so ỹactec da la'añaxac napacalec na laỹepi nta'alpi. Somaye hueta'aguet nam ca'attague'pi. Ñim Lo'onatac 'Enauacna iỹaxana namayepi qataq lca'aguishecpi, cha'aye nache 'eetai' naxa da ỹalaq.»
15So namaxashec piguem le'ec nataqa'en aỹem 'enapega, 'eeta':
«Ne'ena talapi maye 'aulota'a maye nso'ootalec añi 'alo maye quisheguetaxai, namayepi nachena na ỹotta'a't shiỹaxauapi maye ỹotta'a't na la'aqtacpi. 16Qaq se'esoua diez lcouel maye 'auauaachiguilo se'eso shiguiỹac, qataq so shiguiỹac leguemaxaic ỹataqta nquiỹa qome aña'añi quisheguetaxai, nache añimaye qaỹacona qome 'enauac na hueto'otpi. Nache ỹataqta huetauec qanqa'en, qataq qanallec na lapat, ime nache qaỹasaxangui ca norec da qaỹavigaxat.
17Qaq Ñim Lo'onatac 'Enauacna ỹasheetema se'esoua diez nta'al da ipaqueelec da ỹo'ot da maiche iuennatega co'ollaxa Ñimaye. Ỹoqo'oye ỹo'oteque da 'oonolec da lhuennataxa'c soomaye, da yaqto' ỹanema da la'añaxa'c so shiguiỹac leguemaxaic. Qaq huaña, nache soomaye ỹalaxareguet so shiguiỹac leguemaxaic, choche ivitta'a da ipacchigui 'enauac nam 'eetapeguecpi Ñim Lo'onatac 'Enauacna. 18Qaq asa'aso 'alo maye 'auauaachigui, naigui yem lta'araic nỹecpi, qaq so nta'a maye netaña yemaye, nacheso so ilo'ogue 'enauac nam nta'alpi maye huetalec ana 'alhua.»
