Aso dalaxai 'alhua
1Ime, nache sela'a so piguem dalaxaic qataq aso 'alhua dalaxai, cha'aye so hua'auchiguiñi piguem qataq aso hua'auchiguiñi 'alhua mashe imeuo. Qataq aso auaxai nataqa'en mashe imeuo. 2Nataqa'en sela'a so dalaxaic nỹecpi ỹataqta qui'itta, som dalaxaic Jerusalén anacta chegoqo'ot na piguem maye hueta'a Ñim Lo'onatac 'Enauacna, se'eso nỹecpi sogote da 'enauac imeta, 'eeta'am da no'otaxac aca qa'añole da mashe huotaique da huaroneguet ca nauonaxaua. 3Nache sa'axaỹa so na'aqtac ỹataqta alam, chemqot ye hueta'a aso so'onaxaqui, 'eeta':
«'Ena na hueta'a Ñim Lo'onatac 'Enauacna da hueta'aguet na lalamaxatpi. Ñimaye hueta'aguet namayepi, qaq namayepi nache ỹataqta lalamaxat Ñimaye. Qaq nacheñi Ñim Lo'onatac 'Enauacna maye 'oonolec da Lta'a namayepi. 4Ñimaye iỹore'c naua lache' namayepi. Huaña, nache saishet da ileu, nataqa'en saishet da ỹe'eguelaxalec da nỹeetac, huo'otaq da na'alaqtapiguiñi, huo'otaq da huo'o da nqui'ic, cha'aye 'enauac nam huo'o co'ollaxa qalaq nagui 'enauac da imeuo.»
5Nache Ñim Lo'onatac 'Enauacna maye nso'ootangui aso nso'onaxaqui da nta'a 'eeta' da la'aqtac: «¡Aỹem ñaralaxat 'enauacna!» Nataqa'en 'eeta': «'Iyiñi qome ne'enapi, cha'aye ne'ena na'aqtacpi ỹataqta 'eesa qataq ishet da qaipi'iỹa'a.»
6Ime qaq aỹem 'enapega, 'eeta':
«¡Mashe sogote da ime! Aỹem maye Nachaỹem la'atchiguiñi qataq sepa'atec. Qaq cam ilem na laquip, nache Aỹem sanem ca 'etaxat maye npaxaatasheguem qataq chegaqaigui da nca'alaxa chochaq tatec. Qaq camaye qaca aca lasheue. 7Qaq cam saishet da iqallem na lqalaiguesat qataq nache queto'ot da lpi'iỹaxac Aỹem, nache sami' 'enauac ne'ena, nache camaye ỹataqta ỹalec qataq camaye ỹataqta Aỹem Lta'a. 8Qalaxaye nam colanqaicpi, qataq nam saq pi'iỹa'a Aỹem, qataq nam ỹo'ot nam qauem maye sa saỹamaxaren qataq nam ỹalauat ca lỹa qataq nam huetapeeguet aca sa lhua maye saq qaỹashen da qaỹo'ot, qataq nam napaxagueetega da naconaxanaxac qataq nam ỹo'oxoreetac nam qanatameetacotpi maye saq 'en, qataq nam tenataxanaxaicpi, 'enauac qome namayepi qaỹasaxangui ca lta'araic norec maye huaña da ỹavictaigui na quiquiaxaraic. Huaña, nache chochaq tatec da saishet da nauane' Ñim Lo'onatac 'Enauacna.»
So dalaxaic Jerusalén
9Ime, nache anac so 'oonolec soua siete namaxa'she piguem lashe' maye lasoqta'alo soua siete ỹomaxaqui' maye nlaqchiguilo soua pa'atre'c chaqaiqa napaxaco, nache aỹem 'enapega, 'eeta': «'Aỹala, 'anquigueuo yaqto' 'am sachaxana añim nauonaxaua maye huotaique da lhua Ñim Qagueta Llalec.»
10Qaq can ñaq sootaigui se'eso ỹauanaqchec maye aỹem ỹachaxana So Saqcha'a La'añaxac Ñim Lo'onatac 'Enauacna, nache som namaxashec aỹem ỹaviguisheguemec aso qaỹoqotcheguemec 'alhua. Huaña, nache aỹem ỹachaxana so lta'araic nỹecpi qui'itta le'enaxat Jerusalén, anacta chegoqo'ot na piguem, chegaqa'a cam hueta'a Ñim Lo'onatac 'Enauacna. 11Qaq Ñim Lo'onatac 'Enauacna, nacheñi ñi icoỹattalec somaye. Qaq ne'ena le'eraxa 'eeta'am ana 'otaqte maye ỹataqta no'on, 'eeta'am na coma' le'enaxat diamante qataq ỹataqta chauec 'eeta'am na 'etaxat da ỹataqta qui'itta. 12Qaq na pa'auec somaye huo'o so lpaqtaxat ỹataqta logoraic qataq lta'araic coleesop somaye. Qaq se'eso lcopaqtaxat, huo'oi soua doce laso'omi lta'al maye ñeguereuo; qaq ñi 'oonolec soua ñeguereuo, nache hueta'a so 'oonolec namaxashec piguem le'ec da ilotague'. Qataq ñi 'oonolec soomaye nanettalec ñi 'oonolec nam le'enaxatpi soua doce llalqa so Israel. 13Qaq tres soua laso'omi pa'aregue da yo'oxoñi, qataq tres soua pa'aregue da sheu', qataq tres soua pa'aregue da taguiñi, qataq tres soua pa'aregue da avit. 14Qaq se'eso lcopaqtaxat se'eso nỹecpi somaye no'oxootaleguete qanqa'en soua doce coma'ye. Qaq ñi 'oonolec soomaye, nache nanettaleguete naua le'enaqa'ate soua doce lamaxa'she So Qagueta Llalec.
15Qaq som namaxashec piguem le'ec maye aỹem da'aqtaxaatapeguem, somaye nasoqta'a so laloqnaxanaxat maye chegaqaigui na oro, da yaqto' naloqten se'eso nỹecpi qataq naua laso'omi qataq som lcopaqtaxat. 16Qaq se'eso nỹecpi, somaye cuatro naua laỹel. Qaq ye lalogaxa nache 'eeta'am ye lcachiguiñi. Nache se'eso namaxashec naloqten se'eso nỹecpi daloqnaxana so laloqnaxanaxat maye chegaqaigui na oro. Qaq ivi' dos mil doscientos kilómetros ye locta, qataq ye lcachiguiñi, qataq ye lalogaxa na pa'asheguem.
17Ime, qataq naloqten so lcopaqtaxat. Qaq somaye ivi' sesenta y cuatro metro ye locta. Qaq yi'iye ivi', nacheye ye laloqñiguishec som laloqnaxanaxat na shiỹaxauapi maye iueetac so namaxashec piguem le'ec.
18Qaq se'eso npaqtaxanaxat, somaye lo'oxonaxat na coma' le'enaxat diamante. Qaq so nỹecpi lo'oxonaxat da ndota't oro ỹataqta chauec, qataq ỹataqta yo'oqtelec. 19Qaq na coma' maye llo'oxoraxat se'eso npaqtaxanaxat, namayepi ỹataqta ỹotta'a't da lo'oxoỹaxacpi: qaq so hua'auchiguiñi coma' le'enaxat diamante; qaq so lỹa coma' le'enaxat zafiro; qaq so lỹa coma' le'enaxat ágata; qaq so lỹa llo'oxoraxat na coma' le'enaxat esmeralda; 20qaq so lỹa llo'oxoraxat na coma' le'enaxat ónice; qaq so lỹa llo'oxoraxat na coma' le'enaxat rubí; qaq so lỹa llo'oxoraxat na coma' le'enaxat crisólito; qaq so lỹa llo'oxoraxat na coma' le'enaxat berilo; qaq so lỹa llo'oxoraxat na coma' le'enaxat topacio; qaq so lỹa llo'oxoraxat na coma' le'enaxat crisoprasa; qaq so lỹa llo'oxoraxat na coma' le'enaxat jacinto; qaq so pa'atec qalaq llo'oxoraxat na coma' le'enaxat amatista. 21Qaq soua doce laso'omi, qalaq chegaqaigui ana perla. Qaq ñi 'oonolec lasom, qalaq ndotelec ana 'oonole perla da qaỹo'ot. Qaq so nqa'aic ye nỹecpi maye laiñiguishec, qalaq ndotec na oro, ỹataqta chauec, 'eeta'am na 'etaxat da ỹataqta qui'itta.
22Qalaxaye saishet da huo'o aca sela'a no'onaxanaxaqui se'eso nỹecpi, cha'aye Ñim Lo'onatac 'Enauacna maye Nataxala' maye qaica ca ỹaqalanapec, Ñimaye nacheñi ñi 'eeta'am da no'onaxanaxaqui, nataqa'en Ñim Qagueta Llalec. 23Qataq se'eso nỹecpi, somaye saishet da iuen añi nala' qataq ñi ca'agoxoic da huo'otaq icoỹarelec. Cha'aye na le'eraxa Ñim Lo'onatac 'Enauacna qataq Ñim Qagueta Llalec nache icoỹattalec. 24Qaq nam ỹotta'a't shiỹaxauapi maye huetalec ana 'alhua, na le'eraxa se'eso nỹecpi nache huetaigui namayepi. Qaq nam nta'alpi maye huetalec ana 'alhua nache ndotega qataq ỹami' da lsallaxa. 25Qataq naua laso'omi yemaye saishet da ỹapotaguilo ye na'a'q, qataq saishet da huo'o ca pe. 26Qaq nache ndotega yemaye da la'amaqchec qataq da llo'oxoyec nam ỹotta'a't shiỹaxauapi. 27Qalaxaye saishet da inoxoneua'a yemaye ca nshepaxan maye sa ỹaỹamaxaren Ñim Lo'onatac 'Enauacna; qataq saishet da inoxoneuo nam ỹo'oxoreetac nam qanatameetacotpi maye saq 'en, nachaqnata na nanettaua'a aso lere Ñim Qagueta Llalec. Asa'aso nere nanettaua'a na le'enaxatpi nam ỹaconeguet cam nca'alaxa maye chochaq tatec.
