Da ño'oxonnataxanaxac maye hua'ague da piguem
1Qaq co'ollaq ime de'era, nache sela'a so lasom, nauattaigui, neto'ot na piguem. Qaq som nvilỹaxac maye hua'auchiguiñi co'ollaxa da sa'axaỹa maye 'eeta'am da l-lamaxa ana nasheere, aỹem 'enapega, 'eeta':
«¡Ñaq Aỹem 'anquigueua'a!, yaqto' 'am sachaxana nam huotaique da yo'oq.»
2Qaq nache saqaỹaloq da souaigui da la'añaxac So Saqcha'a Na'añaxac Qui'itta, nache sela'a aso 'eeta'am ana nso'onaxaqui na nta'a, neto'ot na piguem. Qaq asa'aso so'onaxaqui huo'o so nso'ootangui. 3Somaye ỹataqta qashelectapiguiñi, 'eeta'am da lqashelgaxa na coma' le'enaxat diamante, huo'otaq na coma' le'enaxat rubí. Qaq aso so'onaxaqui coleesop so 'eeta'am na quemoxonalo. Qaq da lqashelgaxa somaye qalaq 'eeta'am na coma' le'enaxat esmeralda. 4Nataqa'en huo'oi soua veinticuatro lỹa't so'onaxaqui', maye coleesopa aso late'erai so'onaxaqui. Qaq soomaye nso'ootanguilo soua veinticuatro nqueroxonqa. Qaq se'esoua nqueroxonqa ỹaatrañi naua alogo maye qaica ca 'ena'am da lapagaqa', qataq naua naro'ol ndotec ana chegaqaigui na oro. 5Qaq asa'aso so'onaxaqui chegoqtapegueua'a na nqashelgaxa, qataq nllimiaxa, qataq datateguet asomaye soua siete ncoỹaraxanaxaqui' 'ettaiguilo, maye nachesoua soua siete saq cha'alo la'añaxaco Ñim Lo'onatac 'Enauacna. 6Qaq yi'iye naloteuga asa'aso so'onaxaqui nataqa'en huo'o so ỹataqta chauec, 'eeta'am na 'etaxat da qui'itta qataq nataqa'en, 'eeta'am aso auaxai ye lcachiguiñi.
Qaq na laiñi soua so'onaxaqui', nache hueta'alo soua cuatro shiguiỹa'c maye nca'altraue'c. Qaq soomaye imauec na lo'oc da huo'o ana la'aitepi dam datata'ague qataq na l-laq. 7Qaq so la'auaxanec se'esoua shiguiỹa'c, somaye 'eeta'am na lỹa quiyoc; qaq so lỹa qalaq 'eeta'am na huaca lhuaraic; qaq so lỹa qalaq 'eeta'am na shiỹaxaua, qaq so lỹa qalaq 'eeta'am na vi'ic da huaỹotac. 8Qaq ñi 'oonolec se'esoua cuatro shiguiỹa'c qalaq ivi' seis ana laua't ñi 'oonolec, qataq nlaxagui ana la'aitepi qataq saishet da ỹa'axaneguet da lo'onaxanaxa'c ye na'a'q qataq ye pe da 'eetra':
«¡Ỹataqta qui'itta, ỹataqta qui'itta,
ỹataqta qui'itta Ñim Nataxala',
Ñim Lo'onatac 'Enauacna maye qaica ca ỹaqalanapec,
maye nache 'eetai' da huo'o,
Ñim nca'altauec qataq mashe nayeetai'!»
9-10Qaq se'esoua cuatro shiguiỹa'c maye nca'altraue'c do'onaxaata'ape qataq ỹaatracot da na'achecỹaxac som nso'ootangui aso so'onaxaqui maye chochaq tatec da nachaalataxac. Qaq so lo'one'c soomaye ỹa'axat da llo'oxoyec qataq da la'añaxac qataq da nacheñi Ñimaye da taiguet da huo'o naq 'enec qanqa'en. Qaq naxa da 'eetec de'era se'esoua shiguiỹa'c maye nca'altraue'c, nache se'esoua veinticuatro nqueroxonqa ỹa'aroto naua l-llectel som nso'ootañi, nache ỹo'oxoreetrac, qataq nqa't naua naro'ol da ỹacho'oto aso so'onaxaqui. Ime, qaq do'onaxa'n soomaye 'eetra':
11«'Am Qarataxala' maye 'Aro'onatac 'Enauacna;
'am maye 'aiguet da 'am qaỹo'oxoren,
qataq da 'am qaiỹaxana qalaq huo'o da 'ayo'oxoyec,
qataq ỹo'ot da na'aalaxa da 'ara'añaxac.
Cha'aye 'am 'aro'onatac 'enauac nam huo'o;
qaq qana'achec cha'aye maiche 'am chegoqchigui namayepi.»
