Ñim Lo'onatac 'Enauacna nca'alaxatec nam lalamaxatpi
1-3Qaq can ime de'era, nache sela'alo soua cuatro namaxa'she piguem lashe', nachattrañi. Qaq ñi 'oonolec soomaye hueta'alo naua cuatro lleco na la'at. Soomaye nlletrañi naua la'a'che, da yaqto' saishet da ỹasheerelec ana 'alhua, qataq aso auaxai, qataq ana 'epaqpi. Se'esoua cuatro namaxa'she piguem lashe' ỹaconegueta da la'añaxa'c da yaqto' huo'o ca 'ena'ac ana 'alhua qataq aso auaxai. Nataqa'en sela'a so lỹa namaxashec piguem le'ec chegaqa'ague da yo'oxoñi somaye nasoqta'a aso la'anaxanaqte Ñim Lo'onatac 'Enauacna maye chochaq tatec da lca'alaxa. Qaq asa'aso na'anaxanaqte nachaso aso qaỹa'anaxana da qaỹa'an 'enauac na lalamaxatpi Ñim Lo'onatac 'Enauacna, da yaqto' npaxattalec. Nache se'eso namaxashec piguem le'ec ỹataqta na'axannec da la'aqtac da 'enapegalo soua lỹa't cuatro namaxa'she, 'eeta': «¡Saishet da huo'o ca qoñiỹa'ac ana 'alhua qataq aso auaxai qataq ana 'epaqpi, cheta'ague qom semataq da sauoqo'o ca la'anaxat na latap nam do'onataxaatacotpi Ñim Lo'onatac 'Enauacna!»
4-8Ime, qaq aỹem sa'axaỹa da qanasaqtauec na le'enaqa'ate soua doce llalqa so Israel soomaye nachesoua soua Judá, Rubén, Gad, Aser, Neftalí, Manasés, Simeón, Leví, Isacar, Zabulón, José, qataq so Benjamín. Qaq ñi 'oonolec se'esoua doce ñalqa, nache qaỹa'an so doce mil nam chegoxoguet soomaye, yaqto' da ima'a't, nache ivi' ciento cuarenta y cuatro mil.
So qalota shiỹaxauapi maye lapagaxaiqa naua alogo
9Qaq can ime de'era, nache aỹem sela'a so qalota shiỹaxauapi maye ỹotta'a't na chegaqa'a 'alhuapi, qataq ỹotta'a't da lo'oxoỹaxac, qataq ỹotta'a't naua la'aqtaqa. ¡Somayepi ỹataqta qalota, qaica ca ishet da naloqten! Qaq somayepi nachattaua'a ye hueta'a aso so'onaxaqui qataq So Qagueta Llalec, ỹaatrañi naua alogo lapagaxaiqa, qataq lasoqta'a ana chaic laue. 10Qaq somayepi ỹa'alaqtagui, 'eeta':
«Qomi' nca'alaxatre'c Ñim Qarta'a maye Lo'onatac 'Enauacna,
maye nso'ootangui añi so'onaxaqui,
qataq Ñim Qagueta Llalec.»
11Qaq 'enauac som namaxashec piguem le'ecpi nachattañi, coleesop aso so'onaxaqui, qataq soua nqueroxonqa, qataq soua cuatro shiguiỹa'c maye nca'altraue'c. Nache somayepi ỹa'alyiñi naua l-llectel, ỹataqta iviraxata'agueta naua lata'api naqa'en ana 'alhua, nache ỹo'oxoreetac Ñim Lo'onatac 'Enauacna, 12'eeta':
«¡Sho'oxonnaqtac Ñim Qarta'a maye Lo'onatac 'Enauacna!
¡Aja' nache 'eetec!
Ỹataqta huo'o da qara'aalaxa da na'aqtaguec qataq da laỹaanec,
qataq da lamaxasoxonaxac, qataq da la'añaxac.
Sanqot Ñim Qarta'a maye Lo'onatac 'Enauacna
da qana'achec, souaxat dam qaica ca loga't llo'oxoyec.
¡Aja', nache 'eetec!»
13Nache so 'oonolec soua nqueroxonqa aỹem inat, 'eeta':
–¿Negue't ne'ena shiỹaxauapi maye lapagaxaiqa naua alogo? ¿Chaq hua'ague ca chegaqa'ague?
14Nache aỹem sasateguet somaye sheeta':
–'Am ỹataxala', 'am maye 'auaỹaten.
Nache somaye 'eeta':
–«Qomye ne'ena, nachena nam saishet da ileu co'ollaq huaigui so lta'araic que'eenaxac ana 'alhua. Namayepi ỹataqta huo'o da lpi'iỹaxac Ñim Lo'onatac 'Enauacna. Qaq Ñimaye nache ỹapalaxat na lasouaxashetpi, chegoqchigui da l-leuaxa Ñi Qagueta Llalec.
15Qaq ỹoqo'oye nagui namayepi datataua'a añi nso'onaxaqui Ñim Lo'onatac 'Enauacna,
qataq ima'ape naua na'axa'te qataq naua pesa'ache,
da do'onataxaatacot Ñimaye da huetaua'a añi lo'onaxanaxaqui.
Qaq Ñim Lo'onatac 'Enauacna hueta'aguet namayepi,
qataq npaxattalec.
16Qataq mashe saishet da ilem na lqouaxa qataq na laquip;
qataq da ỹavigaxat na le'eraxa añi nala',
qataq da iqalleeteguem na napaxaỹaxa.
17Cha'aye Ñim Lo'onatac 'Enauacna iỹouec 'enauac na lache' namayepi,
qataq Ñi Qagueta Llalec maye netangui na laiñi añi so'onaxaqui,
nacheñi ñi ilotague' namayepi,
'eeta'am ca ilotague' ana lalopi qaguetapi
qataq ỹauega ca laỹe' na 'etaxat maye npaxaatasheguem
maye chegaqaigui da nca'alaxa.»
