Co'ollaq qaivita da qaỹashiiyigui aso cinco soua siete nasheerel
1Qaq co'ollaq ivita so cinco soua siete namaxa'she piguem lashe' da ỹashiiyigui aso lasheere, nache sela'a aso 'oonole huaqaañi maye chegoqo'ot co'ollaxa na piguem da talec ana 'alhua. Nache asomaye qoỹami' aso lvinaqte ca lasom ca auac maye ñegueuo da taỹaña cam ỹataqta qaỹoqchiguiña ncoñetaqa' nam saqcha'a na'añaxacpi qauemaicpi. 2Qaq co'ollaq asomaye da ỹauatoigui so lasom so ñegueuo maye taỹaña ca ncoñetaxanaqa', nache chegoqchiguingui se'eso auac so 'eeta'am na lmala'q ana late'erai nqatelaxanaxaqui, qaq se'eso lmala'q, nache napalñi naqa'en, cha'aye ỹapolec añi nala'. 3Nache se'eso lmala'q chegoqtoigui aso shiiquioxoipi, nache huaỹolec ana 'alhua ỹataqta imata, qataq qoỹami' da la'añaxac yaqto' da isoc ca shiỹaxaua qalaq 'eeta'am na pe'elaqtoic na lshenataxanaxa. 4Ime, nache Ñim Lo'onatac 'Enauacna ỹamaxalec asomayepi da nachaqnata nam qaica ca la'anaxat na latap aso la'anaxanaqte Ñimaye da ique'emaqchet, qalaxaye saishet da huo'o ca 'ena'ac ana 'alhua qataq ana 'epaqpi qataq ana nañiguishepi. 5Ñim Lo'onatac 'Enauacna ỹasheetem da ique'emaqchet na shiỹaxauapi, ivittre'c caua cinco ca'agoxoiqa. Qalaxaye saishet da ỹashenem da huo'o ca ỹalauat. Qaq na lque'emaxapi na shiỹaxauapi ỹataqta lta'araic da lqui'ic, 'eeta'am da lqui'ic da huo'o na isoc na pe'elaqtoic. 6Qaq qom qanayeetaiguilo que'ecaua cinco ca'agoxoiqa, nache na shiỹaxauapi maye qaisoc co'ollaxa, ỹataqta huo'o da lyaxa da nache ileu, qalaxaye saishet da ileu. Cha'aye da nleuaxa qalaq 'eeta'am da dataueeguesop namayepi.
7Qaq asa'aso shiiquioxoipi, 'eeta'am da lataxac na caaỹo maye alaataxala', ỹataqta lhuotta da taỹa ca loquiaxac. Qaq na lqaic netagui ana 'eeta'am ana naro'o na nta'a maye chegaqaigui na oro, qaq na lashec qalaq 'eeta'am na lashec na shiỹaxaua. 8Qaq na laue, qalaq 'eeta'am na laue ana 'alo. Qaq naua lhue, qalaq 'eeta'am ana lhue lapiataxanaqte na quiyoc lỹa. 9Qaq na lo'oc, qalaq npaxattalec na 'eeta'am ana alaataxaqui lcat, qaq da l-lamaxa naua laua't, qalaq 'eeta'am da l-lamaxa ana ỹataqta qalota naigonapi maye lauegaxala' na caipi da taỹa ca alaataxac. 10Qaq na la'araxashet, qalaq netagui aso 'eeta'am ana la'araxanaqte na pe'elaqtoic, qaq nachaso aso irolec da ique'emaqchet na shiỹaxauapi, iviraxattre'c caua cinco ca'agoxoiqa. 11Qaq som ilotague' cam laponqa' na leuaxaicpi, nacheso so lataxala' aso shiiquioxoipi. Qaq se'eso nataxala', somaye le'enaxat Abadón nam la'aqtac na hebreo le'ecpi. Qaq nam griego le'ecpi, qalaq ỹamata'ac Apolión. Damaye naigui da «Laataxanaxaic.»
12'Era da hua'auchiguiñi que'eenaxac, qalaxaye ñaq natai'salo caua lỹa't dos.
Co'ollaq ivita da qaỹashiiyigui aso seis soua siete nasheerel
13Qaq co'ollaq ivita so seis soua siete namaxa'she piguem lashe' da ỹashiiyigui aso lasheere. Nache sa'axaỹa so na'aqtac chemaqchiguingui na laiñi soua cuatro lcoue aso nca'atoxonaxalate maye chegaqaigui na oro maye netaña ye naloteuga Ñim Lo'onatac 'Enauacna. 14Qaq se'eso na'aqtac 'enapega se'eso namaxashec piguem le'ec maye ỹashettapigui aso lasheere, 'eeta':
«'Asore'c qome ñeua cuatro namaxa'she piguem lashe' maye qaicoñettai'salo, huetra'a ye loigue aso tala late'erai le'enaxat Éufrates.»
15Huaña, nache se'eso namaxashec piguem le'ec isore'c soua cuatro namaxa'she, da yaqto' ỹalauat so 'oonolec naua tres lpa'axaco nam shiỹaxauapi, cha'aye Ñim Lo'onatac 'Enauacna, maiche iqataxanai'salo qataq mashe ivita ye laloqo' qataq na'a'q qataq ca'agoxoic qataq vi'i da isore'c.
16Ime, qaq sa'axaỹa ye lcata so alleppi maye nalaataxala' na caaỹo, qaq ivi' na doscientos millones.
17Qaq so alleppi maye netalec so caipi lapaqtaleguete naua ltogue naua alaataxaqui' lcat togaxaraic da lo'oxoỹaxac, 'eeta'am na norec, malaxaraic 'eeta'am na coma' maye le'enaxat Zafiro qataq ỹoqovi da lo'oxoỹaxac 'eeta'am na coma' maye le'enaxat azufre. Qaq se'eso caipi naua lqaigo 'eeta'am na lqaic na lỹa quiyoc, qaq naua ala'api natapoiguilo na norec, qataq na lmala'q, qataq na 'eeta'am na quiquiaxaraic. 18Huaña, nache ileu so 'oonolec naua tres lpa'axaco nam shiỹaxauapi, souaxat se'eso norec qataq so lmala'q qataq na 'eeta'am na quiquiaxaraic maye chegoqtapoigui na alap so caipi. 19Qaq na la'araxashetpi se'eso caipi 'eeta'am na na'araxanaq, ỹoqo'oye ishet da ique'emaqchet na shiỹaxauapi. Qaq damaye 'eeta', so caipi huo'o da la'añaxac huetaigui na alap qataq na la'araxashet.
20Qaq nam no'onañi shiỹaxauapi maye saishet da ilem so norec qataq so lmala'q qataq so 'eeta'am na quiquiaxaraic namayepi ñaq 'eetalec, saishet da ỹaxaañi da ỹo'ottac na qauem, qataq saishet da ỹaxaañi da ỹo'oxoreetac nam saq cha'api qauemaicpi, qataq nam lqui'ipi nam qanatameetacotpi maye saq 'en. Nachaqrata da nache queto'ot da ỹo'oxoreetac nam nqui'ipi maye saq 'en maye chegaqaigui na coma', qataq huo'o na 'epaq qataq huo'o na chegaqaigui na lcat le'enaxat oro qataq na lcat plata qataq na bronce. Ne'ena ne'enaqtacpi sanauaañi, qataq saishet da hua'aqa, qataq saishet da queuoỹapigui'. 21Nataqa'en ne'ena shiỹaxauapi saishet da ỹaxaañi da lalaataxanaxac, qataq saishet da ỹaxaañi da ldanaxanaxac; nataqa'en saishet da ỹaxaañi da lcachaxac, qataq da ncachetague' aca sa lhua.
