Ñim Lo'onatac 'Enauacna saishet da imaqa'aguet nam lalamaxatpi
1-2Qaq ỹoqo'oye aỹem ñenatteguela't, sheeta': ¿Peta'a Ñim Lo'onatac 'Enauacna imaqa'aguet nam lalamaxatpi maye maiche lca'aguishecpi? ¡'A'i, saishet! Cha'aye Ñimaye saishet da imaqa'aguet nam judiopi maye maiche lca'aguishecpi chegoqchiguiña co'ollaq cheta'ague da huo'o 'enauacna. Aỹem, nataqa'en aỹem Israel le'ec, aỹem sachegoxoguet so Abraham, qataq sachegoxoigui na llalaqpi so laual Benjamín. Cha'aye qami' mashe qauaỹaañita da ana nere maye huetalec na la'aqtacpi Ñim Lo'onatac 'Enauacna nanettalec da na'aqtaguec so Elías co'ollaq quetapeguelec Ñim Lo'onatac 'Enauacna souaxat nam Israel le'ecpi. 3Huaña, nache so Elías 'enapega Ñim Lo'onatac 'Enauacna, 'eeta': «'Am Nataxala', 'enauac so 'ara'aqtaxanaxanecpi qaỹalauat, qataq qailaxachigui nam huañapi da 'am qanatamnot. Qaq nachaqaỹemtom aỹem 'ara'aqtaxanaxanec da ñaq ñeca'altauec, qaq nataqa'en qanshetaique da aỹem qaỹalauat.» 4Qalaxaye Ñim Lo'onatac 'Enauacna ỹasategueto' somaye, 'eeta': «Ñaqauo'o na siete mil Israel le'ecpi maye saishet da natamnot nam saq 'en lqui'ipi ñim qanatameetacot le'enaxat Baal.» 5Qaq nache 'ena'am nagui. Ñim Lo'onatac 'Enauacna ỹataqta soxoraic qataq lca'ateua'a nam saq 'amaqtaq nam judiopi maye ñaqauo'o da lpi'iỹaxac Ñimaye. 6Qalaxaye Ñim Lo'onatac 'Enauacna lca'aua'a cha'aye Ñimaye soxoraic, qaq saishet da chegoqchigui cam ỹo'ot namayepi cam taiguet da yaqto' qalca'aua'a. Qaq damaye ishet da nache 'eetec de'era, cha'aye Ñimaye ỹataqta 'eesa da soxoraic.
7Qaq ỹoqta 'eesa da som saq 'amaqtaq maye lca'aguishecpi Ñim Lo'onatac 'Enauacna da ỹañoxot da anata dam saq anata na laỹepi shiỹaxauapi. Cha'aye souaxat somayepi da ỹataqta qaramchigui. 8Qaq ipacchigui da 'enapec naua ñiyigui'she maye nanettalec ana nere maye huetalec na la'aqtacpi Ñim Lo'onatac 'Enauacna, 'eeta':
«Ñim Lo'onatac 'Enauacna ỹapogui da ntoonaxac,
qataq naua la'ai'te, qataq naua ltela lauaco,
choche ivitta'a nagui.»
9Nataqa'en setaxaỹaxanaqtac da la'aqtac so David maye 'eeta':
«'Onaxaico' qome da naua laponaxaco namayepi
qalaq ỹe'eguelaxa da 'eeta'am aca nqoinapi qataq ca naleguecpi,
yaqto' Ñim Lo'onatac 'Enauacna qome sa ỹaỹamaxaren,
nache ỹauo'o ca nhuaxanaguec.
10¡Qataq 'onaxaico' qome da naua la'ai'te da 'o'm
yaqto' saishet da nauaañi!
¡Qataq 'onaxaico' qome da nache 'eetai' na l-laq
da saishet da nchelliisheguem souaxat da nque'eenaxac!»
Da 'eetec da lca'alaxa nam saishet da judiopi
11Qalaxaye na'aictaxa da na judiopi da saishet da machiguiñi naqa'en Ñim Lo'onatac 'Enauacna, qalaxaye saishet da 'enauac da huo'o da lsomaxac. Cha'aye souaxat da sa ỹalaq na judiopi, nache Ñim Lo'onatac 'Enauacna nca'alaxatec nam saishet da judiopi. Qaq damaye ỹo'ot da na judiopi ndaqta'aguet namayepi. 12Qaq nagui da souaxat da sa ỹalaq na judiopi, nache 'enauac na shiỹaxauapi maye huetalec ana 'alhua ỹaconeguet da ntaunaguec, ¡qaq ỹoqta 'eesa da ỹaconeguet namayepi da ntaunaguec qom 'enauac nam judiopi da ỹoltaq ỹaỹamaxareeta Ñim Lo'onatac 'Enauacna!
13Dam shenapec nagui, damaye qami' tachiguilo maye saishet da qami' judío lashe': Ñim Lo'onatac 'Enauacna aỹem ỹamaxaiguilo qami' da so'onataxan. Qaq aỹem de'era ỹo'onataxanaxac, damaye ỹataqta huo'o naq naigui ñaqa'en. 14Qaq huo'o da ñaquitaxac na saq 'amaqtaq na maiche ỹalamaxat ihuo' le'ecpi maye qami' ndaqta'agueta da Ñim Lo'onatac 'Enauacna nataqa'en ishet da nca'alaxatec namayepi. 15Cha'aye Ñimaye da huo'otaq imaqa'aguet nam judiopi, nache ỹaconeguet nam laỹepi shiỹaxauapi maye huetalec ana 'alhua, nache ¡chaq 'eetec qome que'eca na'a'q na judiopi qom ỹoltaq ỹaconeguet! ¡Damaye qome ỹataqta 'eeta'am ca leuaxaicpi da ỹaconeguet ca nca'alaxa maye chochaq tatec! 16Qaq huo'o da saloqnaxana: Aca hua'auchiguiñi nauole 'ayiiña maye chegaqaigui ca ndaqnec, da qoỹanot Ñim Lo'onatac 'Enauacna, nache naigui nataqa'en da 'enauac que'eca ndaqnec lalamaxat Ñimaye. Qataq cam lpa'a' aca qo'oipaq, da qoỹanot Ñim Lo'onatac 'Enauacna, nache nataqa'en 'enauac ana lcouepi imauec da lalamaqte Ñimaye.
17Qaq co'ollaq Ñim Lo'onatac 'Enauacna huo'o na imaqa'aguet nam judiopi, nache ỹaconegueta qami' da qanmiñiiguet namayepi, huaña nache qauallicỹoigui na lalamaxatpi Ñimaye qataq qauacoñiiguet da nca'alaxa maye chochaq tatec. 18Qalaxaye saishet qome da qaupi'itaxañiitega da qanapacỹalec nam judiopi maye qaimaqa'aguet. Nachaqrata da qauennachiỹa'a da qami' qauacoñiiguet de'era nca'alaxa chegoqchigui namayepi. Qaq saishet da taỹot da nca'alaxa namayepi da ỹachegoxotchiguilo qami'.
19Qaq saiuena'a da qarhuennataxaqui da namayepi qaỹamaqauec yaqto' qami' ỹaconegueta Ñim Lo'onatac 'Enauacna da ỹauo'o qami' lalamaqa'ate. 20Qaq damaye ỹataqta 'eesa. Qalaxaye namayepi qaimaqauec, cha'aye saq pi'iỹa'a Ñim Lo'onatac 'Enauacna. Qaq qami' qalaq qami' ỹaconegueta souaxat da huo'o da qarpi'iỹaxaqui Ñimaye. Qaq ỹoqo'oye saishet qome da qaño'oxoreñiitai', nachaqrato' da qanchelỹañi. 21Cha'aye Ñim Lo'onatac 'Enauacna, da imaqauec nam judiopi, nache nataqa'en ishet da nache 'eetec naqa'en da qoñiita. 22Qaq ñaq qauloỹa da lsoxoyec Ñim Lo'onatac 'Enauacna maye qami' taleguete. Qalaxaye nataqa'en qauennachiỹa'a da Ñimaye ỹataqta ipagaqchiichigui cam talec nam huo'o da lasouaxashet, qalaxaye Ñimaye ỹataqta qami' ỹauoteque. Qataq Ñimaye nache queto'ot de'era da qami' qauo'oche dam 'eetapeguec Ñimaye. Cha'aye qom saishet da nache qoñiitec de'era, nache nataqa'en qami' imaqraue'c. 23Qaq na judiopi da huo'otaq naralaxat da lhuennataxac qataq ỹe'eguelaxalec da ỹa'amaqten Ñim Lo'onatac 'Enauacna, nache namayepi ishet da qaltaq ỹe'eguelaxaigui nam lalamaxatpi Ñim Lo'onatac 'Enauacna, cha'aye Ñimaye huo'o da la'añaxac da ỹo'ot damaye. 24Cha'aye saishet da ỹaỹamaxañi da qaỹacona cam ỹataqta 'onaxaic, nache qaỹalecneguet ca ỹataqta qauem. Qalaxaye Ñim Lo'onatac 'Enauacna ỹaconegueta qami' maye saishet da qauachegoqỹaigui nam ỹataqta lalamaxatpi Ñimaye. Qaq ỹactec qone' da 'eesa da ỹe'eguelaxalec da ỹaconeguet nam judiopi maye ỹataqta lalamaxatpi.
Ñim Lo'onatac 'Enauacna nca'alaxatec nam lalamaxatpi
25Qami' ỹaqaỹa't, maye qaua'amaqchiñiitac So Cristo, ỹataqta qalota nam saxanaxa da qauaỹaañi. Ỹoqo'oye sauotaique da qami' sa'aqtaxanema dam saqcha'a 'eetapeguec Ñim Lo'onatac 'Enauacna. Huo'o nam judiopi nam ivitta'a da ỹataqta qaramchigui qataq sa ỹaỹamaxaren da ỹa'amaqten So Jesucristo. Qalaxaye namayepi, nache 'eetec de'era da lataxac choche ivitta'a da nam saishet da judiopi ỹalegoigui namayepi. 26Qaq qom mashe ime de'era, nache Ñim Lo'onatac 'Enauacna nca'alaxatec 'enauac nam Israel le'ecpi cha'aye, nache 'enapec naua ñiyigui'she maye nanettalec ana nere maye huetalec na la'aqtacpi Ñim Lo'onatac 'Enauacna 'eeta':
«Ca Nca'alaxaqui chegaqaña qome ye Jerusalén,
qataq camaye ỹapalaxat 'enauac nam lasouaxashetpi
na Israel le'ecpi.
27Aỹem sachaxanapec da so'ot de'era,
qom ivita da sapalaxat na lasouaxashetpi namayepi.»
28Qaq nagui Ñim Lo'onatac 'Enauacna ỹataqta dataỹa'aguet nam judiopi da 'eeta'am ca npa'aguenaxaua. Qalaxaye ỹo'ot damaye da yaqto' qami' huo'o ye qardaqa'ai da qaua'amaqchiñi da no'on na'axaỹaxac. Ñim Lo'onatac 'Enauacna queto'ot da lauotaxanaqtaic na judiopi, cha'aye lca'aguishec som hua'au lta'alpi da ỹauo'o lalamaxatpi. 29Ñim Lo'onatac 'Enauacna saishet da ñe'eguelaxaala't cam mashe ime da ỹan, qataq saishet da icoua'ai cam shiỹaxauapi maye lca'aguishecpi. 30Soua hua'au' vi'iye, qami' saishet co'ollaxa da qaualaqaiguet Ñimaye. Qalaxaye nagui nam judiopi da saishet da ỹalaq, nache Ñim Lo'onatac 'Enauacna huo'o da lchoxonnataxanaxa da qoñiita. 31Qaq de'era 'eetec Ñim Lo'onatac 'Enauacna da qami' ỹachaxanalo da lchoxonnataxanaxa, nache nataqa'en nache 'eetec da ichoxoren namayepi. 32Cha'aye Ñimaye ỹo'otec 'enauac na shiỹaxauapi da sa ỹalaq, da yaqto' huo'o da lchoxonnataxanaxa 'enauac namayepi.
Ñim Lo'onatac 'Enauacna taiguet da nachaqñita sho'oxonnaqtac
33¡Ñim Lo'onatac 'Enauacna ỹataqta lta'araic da lsallaxa! ¡Da laỹaanec qataq da lauattonaxanaxac ỹataqta saishet da qaivi' da qanaloqten! Qaica ca ishet da ỹaỹate'n naua lhuennataxaco, qataq qaica ca ishet da ỹa'axat nam ỹo'otpi. 34Cha'aye ana nere maye huetalec na la'aqtacpi Ñim Lo'onatac 'Enauacna 'eeta':
«¿Huo'o peta'a ca ỹaỹate'n naua lhuennataxaco Ñim Lo'onatac 'Enauacna?
Qataq ¿ishet peta'a da huo'o ca ỹapaxaguen Ñimaye?
35Qataq ¿huo'o peta'a ca ishet da ỹauo'o
ca nme Ñim Lo'onatac 'Enauacna,
da yaqto' Ñimaye iuen da ỹe'eguelaxateguet
camaye da ỹauo'o ca ỹanem?»
36Ỹataqta 'eesa da Ñim Lo'onatac 'Enauacna, ỹo'ot imauec nam qaila'a qataq nam saqcha'a, qaq 'enauac na huo'o, nache chegoqchigui Ñimaye qataq lalamaxat. Qaq ỹoqo'oye, ¡chochaq tatec qome da qayo'oxonnataxanaxa Ñim Lo'onatac 'Enauacna! Aja', nache 'eetec.
