Da lquinaxanaxac so Pablo
1Qalota na no'on ỹa'aqtaxanaxac da sa'axat aca qarqaỹa Febe. Cha'aye acamaye huetac naxa qataq nachaqacata 'amqaanataxanaxai da itauaatac nam 'amqaanataxanaxaicpi maye netaña ye ñegaxasom ye Cencrea. 2Acamaye ỹataqta ỹan da nachaalataxac da do'onataxanot So Qarataxala' Jesucristo. Ỹataqta qauloỹeeguet qome acamaye, 'eeta'am qanqa'eñi da qauacoñiiguet 'enauac nam lalamaxat llalaqpi Ñim Lo'onatac 'Enauacna, qataq qatauñic 'enauac cam iuen, cha'aye acamaye qalota na itauan, ivira'a nataqa'en aỹem.
3Samaxa da iquinaxanaxac aca Priscila qataq ca lhua Aquila maye itau' da so'onataxanaqtacot So Cristo Jesús. 4Cha'aye caamaye ỹataqta nañanegueta co'ollaxa da lchec, da yaqto' aỹem nca'alaxatre'c. Qaq ỹoqo'oye saatac da ña'achecỹaxac. Qalaxaye saishet da nachaqaỹemta, nataqa'en 'enauac na 'amqaanataxanaxaicpi maye saishet da judiopi. 5Nataqa'en samaxa da iquinaxanaxac ca qarqaỹañicpi 'amqaanataxanaxaicpi maye laponqa' ye lma' caamaye. Qataq nataqa'en ca ñauochaxaua ỹaqaỹa Epeneto maye nacheca ca la'auaxanec nam lma' ye 'alhua Asia da ỹa'amaqten So Cristo da lca'alaxaqui. 6Nataqa'en samaxa da iquinaxanaxac aca María maye ỹataqta qalota da lo'onataxanaxac da qoñiita. 7Nataqa'en samaxalo da iquinaxanaxa'c caua Andrónico, qataq aca Junias, maye sheeta'ama judío lashe', qataq maiche ñecoñetaxau' co'ollaxa. Caamaye nataqa'en lamaxa'she So Cristo, qataq hua'auchiyiñi co'ollaxa da ỹa'amaqte'n Somaye, qaq aỹem qalaq ñeca'ataxanauo.
8Nataqa'en samaxa da iquinaxanaxac ca Ampliato, cha'aye camaye ỹataqta ñauochaxaua chegoqchigui So Qarataxala' Jesucristo. 9Nataqa'en samaxa da iquinaxanaxac ca Urbano cam qaro'onataxanaxaua da so'onataxanaqtacot So Cristo, nataqa'en ca lỹa ñauochaxaua Estaquis. 10Nataqa'en samaxa da iquinaxanaxac ca Apeles maye ỹataqta qalotacnaxa da ỹachaxaata da lpi'iỹaxac So Cristo, nataqa'en samaxa da iquinaxanaxac 'enauac cam llalaqpi qataq cam hueta'a ye lma' ca Aristóbulo. 11Nataqa'en samaxa da iquinaxanaxac ca Herodión maye sheeta'am judío le'ec, qataq cam llalaqpi qataq nam ỹa'amaqteetac Ñim Lo'onatac 'Enauacna maye netaña ye lma' ca Narciso. 12Nataqa'en samaxa da iquinaxanaxac aca Trifena qataq aca Trifosa maye do'onataxaatracot Ñim Lo'onatac 'Enauacna. Nataqa'en aca ñauochaxaua qarqaỹa Pérsida, maye nataqa'en qalota da lo'onataxanaxac da do'onataxaatacot Ñim Lo'onatac 'Enauacna. 13Nataqa'en samaxa da iquinaxanaxac ca Rufo, cam nauattonatac maye do'onataxaatacot So Cristo, qataq acam late'e maye 'eeta'am naqa'en aỹem ca maiche llalec. 14Nataqa'en samaxa da iquinaxanaxac ca Asíncrito, Flegonte, Hermas, Patrobas, qataq aca Hermas qataq 'enauac cam qarqaỹañicpi maye hueta'agueta caamaye. 15Nataqa'en samaxa da iquinaxanaxac ca Filólogo qataq aca Julia, Nereo qataq aca lqaỹa, qataq ca Olimpas qataq 'enauac ca qarqaỹañicpi qara'amqaanataxanaxauapi maye hueta'agueta caamaye.
16Qaq ñi 'oonolec da qoñiita da nquine' ca lỹa la'amqaanataxanaxaua, nache ỹataqta ỹachetoigui da lta'araic lauotaxanaqtaic. Qataq 'enauac nam 'amqaanataxanaxaicpi maye quetague' So Cristo qami' ỹamaxalo da lquinaxanaxac.
Da pa'atec nqataxac
17Qami' ỹaqaỹañicpi, qami' ñachoxoreetoiguilo da ỹataqta qarvichiỹa'aguet qome nam colaxagui naqa'en na 'amqaanataxanaxaicpi. Namayepi ỹataqta dataỹa'aguet 'enauac nam qami' qaỹapaxagueneque. Qoquiỹa'ai qome namayepi, 18cha'aye ne'ena shiỹaxauapi saishet da do'onataxaatacot So Cristo maye Qarataxala', nachaqrata da maiche nmittaique ca maiche laỹamaxa. Qataq namayepi iroleguete naua la'aqtaqa isotta'ape na shiỹaxauapi da da'aqtaxan, qalaxaye namayepi ỹataqta tenataxanaxaicpi qataq ỹatenachet nam shiỹaxauapi maye saxanaxa da ỹaỹaten ca ỹoqta llec de'era na'aqtaxanaxac. 19'Enauac qaỹaỹaten da qami' ỹataqta qaualaqaiguet Ñim Lo'onatac 'Enauacna, ỹoqo'oye aỹem ỹataqta samachiguiñi. Qaq ñeshetaique da ỹataqta qauachaxañi da ỹataqta sa qanqalache da qauo'oche ca no'on, qalaxaye saishet da qauo'oche ca qauem. 20Yaqto' Ñim Lo'onatac 'Enauacna maye chegoqo'ot da nlagaxayec saqaỹaloq da dauegaxan da nauec so pa'aguenataxanaxaic, nache qami' ỹanema da nataqa'en qauauegaxañi. ¡Qaq So Qarataxala' Jesucristo queto'ot da qami' ỹachaxaategalo da lsoxoyec!
21Qami' ỹamaxalo nataqa'en da lquinaxanaxac ñi Timoteo maye ỹo'onataxanaxaua. Nataqa'en qami' ỹamaxalo da lquinaxanaxa'c ñi Lucio, Jasón qataq ñi Sosípater, nam judío lashe' 'eeta'ama aỹem.
22-24Nataqa'en qami' ỹamaxalo da lquinaxanaxac ñi Gayo maye sootaña na lma', nam nataqa'en laponqa' na 'amqaanataxanaxaicpi maye hueta'a ne'ena nỹecpi. Qataq nataqa'en qami' ỹamaxalo da lquinaxanaxac ñi Erasto, ñim ilotague' ana alom na shiỹaxauapi ne'ena nỹecpi, nataqa'en ñi qarqaỹa Cuarto. Nataqa'en aỹem samaq da iquinaxanaxac souaxat da lsoxoyec So Cristo. Aỹem ỹe'enaxat da Tercio, qaq ñi Pablo qalaq nacheñi ñi aỹem leraxanaxanec ana'ana nere.
So Pablo ỹo'oxoren Ñim Lo'onatac 'Enauacna
25Ñim Lo'onatac 'Enauacna ishet da qami' ỹo'oteque da ỹataqta qami' 'añaxaiqa da qoviitaigui da dalaxaic achaalataxac maye qomi' ỹanema So Jesucristo. Qaq ỹoqo'oye ¡sho'oxorenaq Ñimaye! 'Era da ỹa'aqtac co'ollaq qami' sa'aqtaxaateguema da no'on na'axaỹaxac qataq co'ollaq qami' sa'aqtaxaateguema So Jesucristo. Qaq damaye nateeteguet dam 'eetapeguec Ñim Lo'onatac 'Enauacna maye qomi' ỹaỹaanaxanaxaneque dam saqcha'a co'ollaq saxanaxa da ỹo'ot ana 'alhua. 26Qaq nagui saỹatenaq da 'eetapeguec Ñimaye chegoqchigui nam ỹiyiñi som na'aqtaxanaxanecpi. Qaq Ñim Lo'onatac 'Enauacna maye nache 'eetai' da nca'altauec maiche lamaxasoxonaxac damaye, yaqto' 'enauac ana 'alhua qaỹa'amaqten qataq qaỹalaxaguet Ñim Nataxala'.
27Qaq nagui chegoqchigui So Jesucristo, da chochaq tatec qome da qayo'oxonnataxanaxa Ñim 'oonolec qataq ỹaanaxanaxaic maye Lo'onatac 'Enauacna. Aja', nache 'eetec.
