Romanos 2

₁Da huo'o ca 'oonolec da qoñiita da ỹauo'o ca lasouaxashet ca lỹa, nache camaye maiche ỹo'ottac nataqa'en ca lasouaxashet, cha'aye nataqa'en ỹo'ottac damaye. Qaq ỹoqo'oye camaye sa ỹaỹamaxañi da ỹauo'o ca lasouaxashet ca lỹa huo'otaq da nmittac, ₂na'aictaxa da saỹatenaq da Ñim Lo'onatac 'Enauacna da nmit na lasouaxashetpi 'enauac na shiỹaxauapi, nache saishet da sa iqatchigui. ₃Qaq 'am da 'auauo'o ca lasouaxashet qataq da 'anmittac na 'araỹepi, qalaxaye da nataqa'en 'auo'ottac nam ỹo'ottac namayepi, nache 'am ỹataqta 'ape'enaxan da qonetega da Ñim Lo'onatac 'Enauacna saishet da ỹo'ot ca 'anhuaxanaguec. ₄Ñim Lo'onatac 'Enauacna ỹataqta soxoraic qataq ỹataqta lta'araic da lhualaxavic qataq ishet da lhueneguet 'enauac nam qauempi maye qauo'ocheetac. Qalaxaye saishet qome da qaupicheetega da nam qauo'ocheetacpi qaica ca naigui. Ñim Lo'onatac 'Enauacna ỹataqta huotaxanaqtaqaic, qaq ỹoqo'oye huotaique da ntouen ñi 'oonolec da qoñiita, nache qaỹa'axañiiñi na qauem. ₅Qalaxaye da, nache qoquiito'ot da sa qaualaqai, qataq da saishet da qanaralaxache da qarataxaqui, nache Ñim Lo'onatac 'Enauacna, ỹauo'o ca qanque'eenaxaqui ỹataqta ỹactec. Qaq anata ca na'a'q, qom Ñim Lo'onatac 'Enauacna nmit 'enauac na shiỹaxauapi, nache ỹauo'o qome ca qanhuaxanaguiiqui. ₆Qaq que'eca na'a'q Ñim Lo'onatac 'Enauacna ỹami' ñi 'oonolec cam naigui ca lo'onataxanaxac. ₇Cam ỹo'ot ca ỹaỹamaqchiguiñi, cha'aye huo'o da naquitaxac da ỹaconeguet ca laỹamaxannataxanaxac Ñim Lo'onatac 'Enauacna, nache qoỹami' ca llo'oxoyec qataq ca achaalataxac chochaq tatec, nache Ñim Lo'onatac 'Enauacna hua'axaỹa'a qome da chochaq tatec da lmayaxaua camaye. ₈Qalaxaye na na'amqaanaxaicpi qataq na qauemaicpi maye saishet da huotaique da ỹo'ot ca no'on, namayepi qome ỹauo'o ca nhuaxanaguec. ₉'Enauac na qauemaicpi namayepi qome ỹauo'o ca nhuaxanaguec maye ỹo'ot da nqui'ic qataq da nque'eenaxac; nam hua'auchiguiñi qome nachena na judiopi, qalaxaye nataqa'en nam saishet da judiopi. ₁₀Qaq nam ỹo'ottac nam ỹaỹamaqchiguiñi, Ñim Lo'onatac 'Enauacna ỹami' qome ca ldaqa' maye ỹataqta huo'o da naigui qataq ỹo'oxoraq qataq huo'o da nlagaxayec; nam hua'auchiguiñi qome nachena na judiopi, qalaxaye nataqa'en nam saishet da judiopi.

₁₁Cha'aye Ñim Lo'onatac 'Enauacna saishet da lca'atagui na shiỹaxauapi. _12-13Ñim Lo'onatac 'Enauacna ỹaconeguet nam ỹalaxaguet na lqataxacpi so Moisés, qalaxaye saishet da ỹaconeguet nam choche na'axaỹaxaatega namayepi. Qaq nam ỹaỹaten na nqataxacpi qalaq nachena na nqataxacpi nam qairolec da qanmit. Qaq nam sa ỹauatton ne'ena nqataxacpi qataq huo'o na lasouaxashet, qalaq qaỹauo'o ca nhuaxanaguec na'aictaxa da sa ỹauatton ne'ena nqataxacpi. ₁₄Qaq nam saishet da judiopi qalaq ỹalaxaguet na lamaxasoxonaxacpi Ñim Lo'onatac 'Enauacna, na'aictaxa da sa ỹauatton, qalaxaye namayepi maiche ỹaỹaten cam 'onaxaic qataq ca qauem. _15-16'Eeta'am da nanettalec na namaxasoxonaxacpi ye ntoonaxac. Cha'aye da lataxac, ichoxot da huo'o ye iuennatega qalaq ỹaỹaten da ỹaỹamaqchiguiñi huo'otaq qauem. Da no'on na'axaỹaxac maye sa'axattac dapaxaguenataxanec da Ñim Lo'onatac 'Enauacna nmit qome 'enauac na shiỹaxauapi ỹachegoxotchigui naqa'en So Cristo Jesús. Qaq que'eca na'a'q Ñim Lo'onatac 'Enauacna ivira'a da nmit qome na nhuennataxacpi maye ỹapogoñi.

₁₇Da qoñiita huo'o na ño'oxoreetapigui da chegaqaigui na judiopi. Qataq nteetacot da hueto'ot na namaxasoxonaxacpi maye chegoqo'ot so Moisés, qataq ño'oxoreetapigui Ñim Lo'onatac 'Enauacna. ₁₈Cha'aye ipettega da ỹaỹaten dam 'eetapeguec Ñim Lo'onatac 'Enauacna, qaq naxa da napaxaguena na la'aqtacpi Ñimaye, nache ỹaỹaten qataq ỹauatton nam ỹaỹamaqchiguiñi. ₁₉Qataq 'eetega da ỹaỹateeta cam nasaxauec da 'enapega nam huo'o da lasouaxashet, cam iuen namayepi da ỹo'ot da yaqto' ishet da nca'alec. ₂₀Qataq ye hueto'ot ana nere maye huetalec na la'aqtacpi Ñim Lo'onatac 'Enauacna, nache namayepi ipettega da napaxaguenaxala' nam qaica ca ỹaỹaanapec qataq nam qaica ca la'amaqchec, nache namayepi 'eetega da lalamaxat da 'eesa qataq da nauattonaxanaxac. ₂₁Qalaxaye, ¿ca 'eeteco' da qauapaxagueñi ca qarỹai ye qami'ctaxa maye hua'auñi da qanapaxaguiñi? ¿Ca 'eeteco' da qauapaxaguenataxañic da saishet da huo'o ca decache, ye maiche qami' da qaucacheetac? ₂₂Qataq qami' qoñiitega nam huo'o ana lhua, qalaq iuen da ipaqueelec da lasataxac co'ollaq cheta'ague da huaron, qalaxaye maiche qami' da saishet da qaupaquiilec da lataxac damaye. Qanquiỹaitega na qanatameetacotpi maye choche ne'enaqtacpi qataq saq 'en, qalaxaye qaucacheetega da lsallaxa maye huetaigui na lma'pi namayepi. ₂₃Qaño'oxoreñiitapigui da qami' hueto'oto ana nere maye huetalec na la'aqtacpi Ñim Lo'onatac 'Enauacna, qalaxaye saishet da qaualaqailec anamaye. Nache qami' qauasouaxache da saishet da qaiyacnapec Ñimaye. ₂₄Qaq mañaxasaco' naua ñiyigui'she la'aqtaqa Ñim Lo'onatac 'Enauacna da 'eeta': «Nam saishet da judiopi saishet da iyacnapec da detaxaỹa Ñim Lo'onatac 'Enauacna, souaxat da qoñiita.»

₂₅Ỹataqta qaica ca naigui da huo'o ca ỹo'ot ca na'anaxashet na lo'oc da saishet da ỹalaxalec na nqataxacpi maye chegoqo'ot so Moisés. Camaye da sa ỹalaxalec namayepi, nache 'eeta'am da sa nauane' da huo'o ca na'anaxashet na lo'oc. ₂₆Qaq cam saishet da qaỹauo'o ca na'anaxashet na lo'oc, da huo'otaq ỹo'ot 'enauac nam damaxasoxoolec na nqataxacpi, nache camaye Ñim Lo'onatac 'Enauacna ỹaconeguet, na'aictaxa da qaica ca na'anaxashet na lo'oc. ₂₇Qaq ỹoqo'oye cam ỹalaxaguet na nqataxacpi, nacheca ca qami' nmi't qome, na'aictaxa da qaica ca na'anaxashet na lo'oc. Cha'aye qami' na'aictaxa da huo'o na qana'anaxache qataq qami' hueto'oto na nqataxacpi, qalaxaye sa ỹauano' da qaualaqailec. ₂₈Saishet da qami' judío lashe', nache qa'iquiitega damaye, qataq da qoñiitega da souaxat da huo'o na qana'anaxache da yo'oqchigui qaro'ocỹaxaqui. ₂₉Cha'aye ca ỹoqta 'eesa da judío le'ec, camaye ỹataqta ỹalaxaguet Ñim Lo'onatac 'Enauacna, qaq saishet da ỹalaxaguet na nqataxacpi maye lo'onatac ca choche shiỹaxaua. Qaq Ñim Lo'onatac 'Enauacna ỹataqta ỹaỹamaxareeta camaye, na'aictaxa na shiỹaxauapi da saishet da ỹaconeguet.