Qana'achec da ñeca'alaxauec, chegoqchigui So Cristo
1Qaq nagui ¿ca 'eetec ca lỹa qara'aqtac? ¿Peta'a qolaqto'ot da qaye'etaxaloxo, yaqto' Ñim Lo'onatac 'Enauacna nquigaxattec da lauotaxanaqtaic da shenaqta? 2¡'A'i, saishet! Cha'aye qomi' mashe saishet da saỹaqapegueua'a da ñe'etaxaloxo, qaq ỹoqo'oye saishet da qolaqto'ot damaye. 3Qami' qauaỹachiñiita da chegoqchigui da achelaxac, da ña'araxaua'a da l-leuaxa So Cristo. 4Co'ollaq qomi' qanachelaxa'n, nache seleuaq qataq qarỹachiguiñi' Somaye da qomi' qailalyiñi. Qalaxaye seleuaq da yaqto' qomi' qanca'alaxatre'c. Qaq 'eeta'am co'ollaq Ñim Lo'onatac 'Enauacna maye Qarta'a da irolec da lta'araic la'añaxac da nca'alaxatec So Jesús, nache nataqa'en 'eetec de'era da qomi' ỹanema da achaalataxac maye dalaxaic maye ishet da qolaqto'ot.
5Co'ollaq qomi' qanachelaxa'n, nache salegaxaua'a da l-leuaxa So Cristo, nache nataqa'en salegaxaua'a da dalaxaic nachaalataxac Somaye. 6Huo'o da ỹataqta ỹataqtegue, 'eeta': Co'olloxocheye maye qomi' 'etaxaloxoiqa, qalaxaye co'ollaq So Cristo da qaiuaxaneguet so npe'enaxaqui, nache qomi' qarleuaxaua Somaye. Qaq ỹoqo'oye de'era ñe'etaxaloxo mashe saishet da qomi' ỹamaqta'ape. 7Cha'aye da mashe seleuaq chegoqchigui da achelaxac, nache da ñe'etaxaloxo saishet da huo'o ca la'añaxac da queta da qomi' ỹamaqta'ape. 8Cha'aye da chegoqchigui da achelaxac da qarleuaxaua So Cristo, nache ỹataqta 'eesa da nataqa'en qarca'alaxaua Somaye. 9Qaq saỹaanaq So Cristo da mashe nca'alec qanqa'en, nache saishet da qaltaq ỹe'eguelaxalec da ileu, cha'aye da nleuaxa mashe qaica ca la'añaxac da qaltaq ỹalauat Somaye. 10Co'ollaq ileu So Jesucristo, nache da ñe'etaxaloxo deqat da la'añaxac maye netalec Somaye. Qaq da nachaalataxac maye nachattaigui nagui, damaye nachera da lalamaxat qataq ỹaỹamaxareeta Ñim Lo'onatac 'Enauacna. 11Qaq ỹoqo'oye nataqa'en de'era ñe'etaxaloxo mashe imeuo da la'añaxac da qami' ỹama'q, cha'aye So Cristo qami' ỹanema da qarca'alaqai. Qaq nagui da qarca'alliiuec, nache da qanachaalataxaqui, iuen da qauo'oche cam ỹo'ot da ntonaxac Ñim Lo'onatac 'Enauacna.
12Qaq nagui no'on da saishet da qauashiñim da ñe'etaxaloxo da qami' ilo'oguelo qataq da qami' ỹamaqaleguete da qaualaqaiguet na qauem 'eetapeguecpi da qaro'ocỹaxaqui. 13Qami' mashe qarellivi co'ollaxa qarỹaichiguiñi' da ñe'etaxaloxo, qalaxaye nagui qaltaq qarca'alliiuec. Qaq ỹoqo'oye saishet da qanashiñiiguet da ñe'etaxaloxo da qami' ỹo'onataxanaxaneque na qauem. Nachaqrata da qanañañiỹot Ñim Lo'onatac 'Enauacna qataq qauo'oche cam ỹo'ot da ntonaxac Ñimaye. 14Yaqto' de'era ñe'etaxaloxo qaica ca la'añaxac da qami' ỹama'q, cha'aye mashe saishet da qami' l-lataqa na namaxasoxonaxacpi. Nagui nache qauo'onataxañiiteguelec da lsoxoyec Ñim Lo'onatac 'Enauacna.
Da qaỹo'onataxanot Ñim Lo'onatac 'Enauacna
15Qaq huo'o ca ishet da 'eeta' da la'aqtac: «Nagui mashe saishet da qomi' l-lataqa na nqataxacpi, nachaqrata da qomi' so'onataxanaqteguelec dam lsoxoyec Ñim Lo'onatac 'Enauacna, ỹoqo'oye qaica camachaqca da qolaqto'ot da qaye'etaxaloxo.» Qalaxaye damaye saishet da nache 'eetec. 16Qami' qauaỹachiñiita da ca nache 'eetai' da ỹalaqtapeeguet ca lỹa shiỹaxaua, nache ivira'a da l-latac camaye. Qaq nache 'eeteque qomi' seshetaq da salaxasoxoguet da ñe'etaxaloxo, nache seviraqa'a da seleuaq. Qaq da huo'otaq salaxasoxoguet Ñim Lo'onatac 'Enauacna, nache qomi' ỹaỹamaxareete' qataq saconaxaguet da lchoxonnataxanaxa. 17Co'olloxocheye da qoñiita qami' l-lataqa da ñe'etaxaloxo. Qalaxaye sanaqot da qana'achec Ñim Lo'onatac 'Enauacna souaxat da qaualaqaiguet ỹataqta imauec da qarquiyaqteỹaxaqui da lapaxaguenataxanaxac maye qami' ỹanema. 18Qaq nagui mashe qami' huesochiyiñi saishet da qami' l-lataqa da ñe'etaxaloxo, nache qauo'onataxañiitacot Ñim Lo'onatac 'Enauacna da qauo'oche ca ỹaỹamaqchiguiñi. 19Cha'aye qami' ñaq 'eetalec da sa qauaỹaañi de'era, nache aỹem saconalo naua na'aqtaqa maye ỹataqta ỹataqteguelo qataq nauattonataqa. Qami' co'ollaxa qami' l-lataqa na qauem, qataq qauo'ocheetac da ñe'etaxaloxo maye nachera da qancachetague' aca saishet da nhua qataq na ỹotta'a't qauempi. Qalaxaye nagui iuen da qanalemaqaite' da qauo'onataxañiỹot Ñim Lo'onatac 'Enauacna.
20Co'ollaq ñaq qami' l-lataqa da ñe'etaxaloxo, nache qami' saishet da ishet da qauo'oche cam ỹataqta ỹaỹamaxareeta Ñim Lo'onatac 'Enauacna. 21Qaq ¿negue't cam qauachegoxochiỹaigui damaye? Nachaqrata da qauachegoxochiỹaigui da qara'aloqoi qataq da nache 'eetai' da qami' qaỹoqtalo Ñim Lo'onatac 'Enauacna. 22Qalaxaye nagui mashe saishet da qami' l-lataqa da ñe'etaxaloxo. Nagui mashe qauo'onataxañiitacot Ñim Lo'onatac 'Enauacna. Qaq damaye ỹataqta 'onaxaic, cha'aye da 'oonolec Ñim Lo'onatac 'Enauacna da qauo'onataxañiitacot, nache ỹataqta 'itchiguiñi da qauacoñiiguet ca achaalataxac maye chochaq tatec. 23Cha'aye cam nachaqrata da ỹo'ottac da ñe'etaxaloxo, nache camaye ỹaconeguet ca nhuaxanaguec, qaq damaye nachera da nleuaxa. Qalaxaye Ñim Lo'onatac 'Enauacna qomi' ỹanema da qanme da nca'alaxa maye chochaq tatec chegoqchigui So Cristo Jesús maye Qarataxala'.
