Aso Rut hueta'a so lanaxanaqa' so Booz
1Qaq aso Noemí, huo'o co'ollaxa so lauo' le'ec som lhua Elimelec, qaq somaye le'enaxat Booz. Qaq somaye ỹataqta sallaxanec, qataq ỹataqta huo'o naq 'enec. 2Qaq huo'o so na'a'q nache aso Rut, maye Moab lashe, 'enapego' aso Noemí, 'eeta':
«Aỹem 'auasheetec qome da sauga ye nanaxanaqa', shapegueto' da huo'o ca aỹem ỹasheetem da choche seca'attaueegue da yaqto' ñatota'aguet na naañi ala na nañiguishec maye qanqattac.»
Nache asomaye 'enapeco': «Aja', 'aue, 'am ỹalole.»
3Nache aso Rut jec, tauga so nanaxanaqa', nache natota'aguet ana ala so nañiguishec maye no'onaxatañi som deqataxaatacpi. Qaq so nanaxanaqa' maye tateua'a asomaye, nache lanaxanaqa' so Booz, som lauo' le'ec co'ollaxa ye Elimelec.
Aso Rut nauane' so Booz
4Qaq huaqchigui co'ollaxa da se'eso na'a'q nvirec so Booz, chegaqaua'a ye Belén, nache somaye iquin so deqataxaatacpi, 'eeta':
¡Qami' hueta'agueta qome Ñim Nataxala'!
Nache somayepi ỹasateguet somaye, 'eeta':
¡Da lchoxonnataxanaxa Ñim Nataxala', 'am huetalec qome!
5Ime, nache so Booz inat so ilotague' so deqataxaatacpi, 'eeta':
¿Negue't llale ara'ara qa'añole?
6Nache so ilotague' so deqataxaatacpi 'enapeco':
Qomye ara'ara qa'añole nachara aram chegaqa'ague da Moab, aram nnaictague' aso Noemí. 7Aramaye aỹem iỹaxanot da sasheetem da choche ca'attaueegue na deqataxaatacpi, da yaqto' natota'aguet nam naañi ala na nañiguishec, qaq nache chegoqchiguiña so nte'eta da do'onataxaatac aramaye, qaq cheta'ague nagui da cara'acolec da nmatec.
8Nache so Booz 'enapego' aso Rut, 'eeta':
'Am ỹalole, ñaq aỹem 'ana'axaỹaxana, saishet qome da 'anqo'ona ca lỹa nanaxanaqa' da 'anato na ala ca nañiguishec, nache qoueta'a qome ne'ena, 'aualectaigui ana ỹo'onataxanaxanapi, 9qataq 'analoqteeta qome ca hueta'a anam do'onataxaatacpi, yaqto' nache 'auca'attaigui cam dataigue anamayepi. Cha'aye mashe sheetega nam ỹo'onataxanaxanecpi da saishet da 'am sa ỹalemaxat. Qaq da huo'otaq huo'o na 'araquip, nache 'anqo'ona ca netaña aca naquipiaxaquipi nache 'anỹomgui ca 'etaxat, maye nqatsheguem nam ỹamaxashecpi.
10Nache aso Rut ỹa'alyiñi naua l-llecte, nache iviraxata'aguet naqa'en na latap na 'alhua, nache inat so Booz, 'eeta':
¿Ta'ainco' da aỹem taalec da 'arauotaxanaqtaic, ye aỹem choche sachegaqauec?
11Nache so Booz ỹasateguet asomaye, 'eeta':
Mashe aỹem qaỹa'aqtaxaatapeguem 'enauac nam 'auo'otecpi aso 'arachoro co'ollaq qaica yem 'arhua, qataq da qoca'aisalo caua 'arta'al, qataq ye 'alhua maye 'arañoqo', nache 'auanac da qomi' qonaiguilo, na'aictaxa da sa qomi' 'arauattonataqa. 12¡Qaq Ñim Nataxala', 'am isheeten qome! ¡Ñim Nataxala' maye Natamnaxala' na Israel le'ecpi, maye 'auanaỹa da yaqto' 'am npaxaalec, Ñimaye isheeten qome 'enauac nam 'auo'otpi!
13Nache asomaye 'enapeco':
'Am ỹataxala', 'onaxaico' qome da nache 'eetai' de'era 'arauotaxanaqtaic. Cha'aye naua 'ara'aqtaqa aỹem ỹa'añaqche't, cha'aye aỹem 'ano'onaxatta da aỹem 'autaxaỹa, na'aictaxa da saishet da sheeta'am ana 'aro'onataxanaxanapi.
14Nache so mashe ivita so laloqo' da nquia'axac, nache so Booz iỹaxana aso Rut, nache 'enapego', 'eeta':
'Aỹala, 'auacona na nauole laỹe, nache 'ilchiiñigui na 'euaxaic qanauoltenaxat.
Nache aso Rut nso'ooñi, huaqta'ai' so 'onataxanaxaicpi. Huaña nache so Booz, ỹami' asomaye aso ntoñiguishepi ala na cebada. Nache asomaye deque'etac, choche ivitta'a da icoma', qataq huo'o so lli'iỹoxot. 15Qaq co'ollaq qaltaq ỹe'eguelaxauec aso Rut, da yaqto' natota'aguet na ala so nañiguishec, nache so Booz 'enapega so lo'onataxanaxanecpi, 'eeta':
Qauaqaita'a qome aramaye da nataqa'en ỹaconoigui ana naqta da nqat ana ala na cebada. Saishet qome da qauauo'oi la'aloxo. 16Qataq maiche qauauo'oi qome ca naañi na ala na qarapoñiguishiqui, da yaqto' natosheguem aramaye. ¡Qalaxaye qauaqaita'a qome, saishet da huo'o ca sa ỹalemaxat! 17Nache aso Rut, huetalec so lanaxanaqa' so Booz da datoxootac, choche ivitta'a so mashe napalchiguiñi. Qaq co'ollaq nasola so latoc asomaye, nache somaye napactelec so veinte kilos.
18Qaq co'ollaq ỹe'eguelaxaua'a so huaqta'a't nỹecpi, nache ỹataqta pa'atañi na lla'ac ala na cebada, nache ỹachaxana aso lachoro. Qataq nqatsheguem som lli'iỹoxot co'ollaq mashe icoma' asomaye, nache ỹanem aso lachoro.
19Nache aso Noemí inattaco' aso late, 'eeta':
¿Chaq hua'ague ca qoueta'ague da 'auo'onataxaatac so na'a'q? Qataq ¿chaq hua'ague cam 'auachegoxota'ague ana qalota 'arato? ¡Ỹataqta huo'o qome da nchoxonnataguec ca shiỹaxaua maye 'am itauan!
Nache aso Rut ỹasateguet aso lachoro, 'eeta':
Som ỹale maye so'onataxaatacot le'enaxat Booz.
20Nache aso Noemí 'enapeco':
«¡Ñim Nataxala' ỹanem qome da nqouagaxa camaye! Cha'aye Ñim Nataxala' saishet da ỹaxaañi da qomi' ỹachaxaategalo da lchoxonnataxanaxa, 'eeta'am da 'eetec co'ollaxa so mashe ileupi. Qaq que'eca shiỹaxaua camaye maiche qaralamaxat qarhuo' le'ec, qaq ỹoqo'oye nacheca qome ca ishet da qomi' ntela'alo.»
21Nache aso Rut maye Moab lashe, 'enapeco':
Somaye nataqa'en aỹem 'enapega da nache shecto'ot da salectaigui aso lo'onataxanaxanapi, nache ivitta'a da ime da qanqattac na ala na lañiguishec.
22Nache aso Noemí 'enapega aso late Rut, 'eeta':
'Am ỹalole, ỹaỹamaqchiguiñi da nache qonetai' da 'aualectaigui aca lo'onataxanaxanapi camaye, nache saishet qome da 'aỹa ca lỹa nanaxanaqa', yaqto' saishet da huo'o ca 'am sa ỹalemaxat.
23Qaq aso Rut, nache queto'ot da deqataxaatac ỹalectaigui so lo'onataxanaxanapi so Booz, choche ivitta'a da ime da qanqattac na ala so cebada, qataq so trigo. Qalaxaye asomaye nache neto'ot aso lachoro.
