Cantares 5

₁'Am ỹaqaỹole maye 'am ñauonaxaua,

mashe sogote da sootaigui na ỹañiguishe lma',

'am ỹaqaỹole maye 'am ñauonaxaua,

mashe sacona ana mirra qataq na 'amnaxat,

mashe she'egueetac na dapic lli'i,

qataq ñeỹomtapigui na lataxa, qataq na huaca lche'.

¡Nache 'enauac namaye mashe ỹalamaxat!

Qami' qanauochaxau',

qauqui'i qome qataq qanỹomi,

maicheye ca tachiguiña ca qarauotaxanaqtaiqui!

₂Aỹem so'ocheta, qalaxaye añi iquiyaqte saishet da do'oche.

'Eco' sa'aqtega so ỹauotaxat da deỹaxaatac, 'eeta':

«¡Aỹem 'auauateguet, 'am ỹoqopitaqte ỹaqaỹole,

'am qoto'ole maye nalochiguiñi!

¡Ten na 'aỹa mashe ỹapapiaxatta na ỹaqaic!

¡Na 'aỹa maye anactañi da pe qalaq mashe queueegue na ỹaue nache ñettañi!»

₃«Mashe sogote da ñeqa't naua aỹogo,

¿qaq 'eeteco' da qaltaq saayiñi?

Mashe ime da seỹota'ape naua ỹapia'ate,

¿qaq 'eeteco' da qaltaq ỹe'eguelaxalec da seshepaxanaqche't?»

₄So ỹauotaxat ishetoigui na lhuaq so lauac ñi lasom.

¡De'era 'eetec ỹataqta ỹe'elaqchet añi iquiyaqte!

₅Huaña, nache soosheguem da sauateguet se'eso ỹauotaxat.

Qaq naua ihuaxaye qataq naua ỹaxaata ñettrañi na mirra,

nache ana llo'oxo taleguete so lvinaxat so lasom.

₆Sauatoigui so lasom da sauateguet so ỹauotaxat.

Qalaxaye somaye mashe saq hueta'a yi'iye.

Nache ỹataqta nlleuchiguiñi na ỹo'oc ỹasouaxat da mashe jec.

Ñimittaique qalaxaye saishet da sanata,

seỹaxaataique qalaxaye aỹem sa ỹasateguet.

₇Qalaxaye aỹem ilalec so nauaatalec na huaqta'a't nỹecpi,

nache aỹem iuaxaatac nache aỹem ique'emaqchet.

Ỹataqta ncolaxatauec so ipo'

nam nauaatalec ñi lasom yem mpaqtaxanaxat.

₈Qami' 'alpi maye qarma'ai na Jerusalén,

aỹem qaỹa'añim ca qara'aqtaqui:

qom qauloỹalec ca ỹauotaxat,

qalaq ỹataqta qoñiỹapega qome da selem

da lamaic da ỹoqopitaxanaqtaic.

₉'Am maye ỹataqta 'anapacalec da lyacỹaxac na laỹepi 'alpi,

¿peta'a qaico' ca 'eeta'am lỹa ỹale que'eca 'arauotaxat?

¿Peta'a qaico' ca 'eeta'am lỹa ỹale que'eca 'arauotaxat

ye ỹataqta qomi' 'anachoxoreetacoto

da 'am sanaxam ca qara'aqtac?

₁₀So ỹauotaxat ỹataqta 'onaxaic qataq lta'araic

qaica ca 'eeta'am da ỹalectaigui na qalota ỹalleppi.

₁₁Na lqaic qalaq 'eeta'am na ỹataqta no'on oro.

Na laue nqotogoxoic qataq naue' 'eeta'am na teguesan laue.

₁₂Naua la'ai'te 'eeta'ama naua qoto'

da huaqta'ai'salo ca npaxaatasheguem 'etaxat

qataq lapagaxaiqa 'eeta'am na huaca lche'.

₁₃Naua lamelque qalaq 'eeta'ama

ca nañiguishe lma' maye ama da laitaỹaxac ana lauoxo.

Da lamaic na alap 'eeta'am da lamaic

na laita ana lauoxo da nlaqtelec ana mirra.

₁₄Naua lhua'q 'eeta'ama naua loca'ague oro,

lapaqtaua'a na llo'oxoraxat coma'

qaỹachegoxota'a ye Tarsis.

Imauec na lasot, salleeta 'eeta'am na lpi'inec

maye chegaqaigui ana lhue ana qasoxonaxa,

qataq qalapaqtalec na zafiros.

₁₅Naua lchel 'eeta'ama aca nhuoqte mármol,

nachatchiguiñi na'attaleguete na ndotec oro.

Qaq da lataxac ỹataqta qaramta 'eeta'am ana cedropi ye Líbano.

₁₆Ỹataqta huo'o da lamaic na alap,

qataq imauec somaye huo'o da lyacỹaxac.

Nache 'eetec da lataxac so ỹauotaxat,

'era da 'eetec so ỹoqopitaxat,

qami' 'alpi maye qarma'ai na Jerusalén.