So Pablo ỹamaxa aso lere so Tito
1Aỹem Pablo, aỹem l-latac Ñim Lo'onatac 'Enauacna qataq aỹem lamaxashec So Jesucristo, da setauan da lpi'iỹaxac na lca'aguishecpi Ñim Lo'onatac 'Enauacna, yaqto' namayepi ỹauattoota da 'eesa lataxac dam qara'amqaanataxanaxac, 2qataq ỹaỹateeta da aquitaxac da achaalataxac maye chochaq tatec. Qaq Ñim Lo'onatac 'Enauacna maye sa datenataxan, Ñimaye ỹachaxanapec co'ollaxa de'era achaalataxac co'ollaq saxanaqaca ana 'alhua. 3Qaq nagui mashe ivita ye laloqo' da qaỹaỹaten da 'eetapeguec Ñimaye, ỹachegoxotchigui da ỹa'aqtaxanaxac maye aỹem ipataxalec Ñim Lo'onatac 'Enauacna maye Qarca'alaxaqui. 4'Am Tito, 'ena'am da 'am ỹalec, cha'aye aỹem 'auachegoxoto'ot da 'arpi'iỹaxac dam qomi' hueto'oto nagui. 'Am samaxa ana ỹere, cha'aye ñeshetaique da 'auaconeguet da nqouagaxanaqtaic, nataqa'en da nchoxonnataxanaxa, qataq da nlagaxayec maye chegoqo'ot Ñim Qarta'a maye Lo'onatac 'Enauacna, qataq So Qarataxala' Jesucristo maye Qarca'alaxaqui.
Dam iuen da ỹo'ot so Tito co'ollaq netaña añi ỹaqa'ata 'alhua le'enaxat Creta
5Se'eso na'a'q 'am ño'onaxataña añi ỹaqa'ata 'alhua maye le'enaxat Creta, cha'aye ñeshetaique da 'auaỹamaxaañi nam saxanaxa da sematpi, qataq da 'ereuo na lataxala'pi na 'amqaanataxanaxaicpi maye netañalo naua lỹa't nma'ate. Qaq no'on qome da 'aupagaqchiichigui de'era ỹa'aqtac, 6da ca lataxala' na 'amqaanataxanaxaicpi saishet da huo'otaq sa ỹaỹamaxañi ca na'aqtaguec, qataq 'oonole aca lhua naqa'en, qataq caua llalqa iue'n da ỹa'amaqte'n So Cristo, qataq ỹala'q. 7Cha'aye ca qaipataxalec da ilo'ogue na 'amqaanataxanaxaicpi, camaye ilo'ogue 'enauac na lo'onataxanaxacpi Ñim Lo'onatac 'Enauacna. Ỹoqo'oye, iuen da qui'itta naqa'en da nachaalataxac. Saishet da na'amqaanaxaic, qataq saishet da qauemaic, saishet da taxaic, saishet da sa ncherapec, qataq saishet da quetaigui da latenataxanaxac da nmitta'a ana anom. 8Nachaqrata da nlosheguem, saishet da sa ilo'oguet ca lỹa da namaxasoxoic, qataq nqopita da ỹo'ot ca ỹaỹamaqchiguiñi. Qataq iuen da hua'auñi da deuennataxaalec da huo'o ca ỹo'ot, qataq no'on da lataxac, qui'itta, qataq ilotegue da nachaalataxac. 9Qataq ỹataqta na'añaxatec da na'aqtac maye 'eesa lataxac dam mashe qaỹapaxaguenec, yaqto' nataqa'en ishet da ỹa'añaqchet ca lỹa da irolec da no'oita napaxaguenataxanaxac, qataq nloqtenec ca depa'aguenataxaatac.
10Cha'aye mashe qalota na sa ỹalaq, qaq namayepi nachena nam chegaqaigui da la'amqaanataxanaxac na judiopi. Namayepi naua ltaxaỹaxaco ỹataqta qaica ca naiguilo, qataq ỹatenachettac na shiỹaxauapi. 11Namayepi iuen da qaỹapoguilo naua ala'api, cha'aye ỹataqta sa nhuoona't naqa'en na nhuo' le'ecpi, souaxat da dapaxaguenataxaatapeguec na sa lataxac, cha'aye choche nshetaique da nauec ana anom da ỹachegoxotaigui da latenataxanaxac.
12Huo'o som da'aqtaxan co'ollaxa maye maiche lma' añi ỹaqa'ata 'alhua Creta. Somaye co'ollaq 'eeta' da la'aqtac:
«Nam Creta le'ecpi ỹataqta tenataxanaxaicpi,
qataq yeloxoicpi, 'eeta'am na shiguiỹac,
qataq saq llalcolec na chec, qataq hualaicpi.»
13¡Qaq 'eesa de'era la'aqtac! Ỹoqo'oye nagui ỹataqta 'ana'axannec da qonapega namayepi, yaqto' ishet da no'oita da lpi'iỹaxac, 14qataq nale'en da sa iqocha'a na choche na'aqtaxanaxacpi maye chegaqaigui na judiopi, qataq na lamaxasoxonaxac nam saishet da ỹaconeguet da 'eesa lataxac.
15Ca shiỹaxaua, da ỹalaxaguet qataq ỹa'amaqten So Cristo, qaq qui'itta naqa'en 'enauac na chochena lataxaguesat. Qalaxaye nam sa ỹalaxaguet qataq sa ỹa'amaqten Somaye, nache namayepi qaica ca qui'itta naqa'en. Cha'aye da lhuennataxa qataq da ntoonaxac ivira'a da ỹataqta qauem. 16Namayepi 'eetega da ỹauatton Ñim Lo'onatac 'Enauacna, qalaxaye semetenaqtac nam qauem maye ỹo'otpi, nache saỹaanaq da saishet da 'eesa. Ỹoqo'oye namayepi ỹataqta quiỹaxanaqtaqaicpi qataq sa ỹalaq qataq sa ỹaỹaten da ỹo'ot ca ỹaỹamaqchiguiñi.
