Zacarías 10

₁Ñaq qauỹaxañiỹot qome Ñim Nataxala' da namaq ca auot ye nauoxo,

cha'aye Ñimaye nacheñi ñi ỹo'ot na napo, qataq namaq na auot,

qataq nacheñi ñim ỹo'ot da lañaxataxac 'enauac ana huoue maye huetalec na no'onaxa.

₂Cha'aye na ne'enaqtac atamnaxala'pi, saq 'e'n naua la'aqtaxanaxaco,

qataq na huo'oi l-loxoco, qalaq saq 'e'n naua lauanaqcheco.

Nam ỹa'axata'api qalaq qaica ca naigui, qataq naua la'aqtaqa,

da huotaique da da'añaqtaxan qalaq qui'itchiguilo.

Qaq ỹoqo'oye na shiỹaxauapi choche tata'acra', 'eeta'am aca qaguetapi,

qataq huo'o da nque'eenaxac souaxat da qaica ca ilo'ogue.

₃Qaq ỹoqo'oye Ñim Nataxala', 'enapec: «Aỹem ỹataqta 'eroigui,

da ỹalemataic souaxat da salemataỹa na qagueta lo'opi,

qataq sauo'o qome ca nhuaxanaguec na lataxala'pi na ỹalamaxat nhuo' le'ecpi.»

Qaq Ñim Nataxala' maye Qaica ca Ỹaqalanapec, maye ilotague' ana lalopi,

maye nachena nam chegoxoguet so Judá. Ñimaye ỹo'otec qome namayepi,

da 'eeta'am da la'añaxac ca caaỹo maye alaataxala'.

₄Qaq namayepi nachena qome na chegaqaigui ca 'eeta'am ca coma'

maye na'attalec ca nỹec, qataq ca 'eeta'am ana lashe ca npe'l,

qataq ca 'eeta'am ca checnec maye alaataxaqui.

Qataq nache chegaqaigui qome 'enauac cam nataxala'pi.

₅Qataq 'eeta'am ca 'añaxaicpi alleppi maye deloctac,

nache ỹasottapigui ca npa'aguenaxauapi da huangui ca nqa'aic,

deloctac qome cha'aye Ñim Nataxala' hueta'aguet namayepi,

nache ỹo'otec da la'aloxo qome cam alleppi maye netalec na caipi.

₆Qaq «Aỹem sa'añaqchet qome nam chegoxoguetpi so Judá,

qataq ñeca'alaxatec nam chegoxoguetpi so José.

Nache saueca'aguet da she'eguelaxata ye maiche na'alhua.

Cha'aye huo'o da ichoxonnataxanaxa namayepi.

Nache ỹe'eguelaxa qome, da 'eeta'am da saỹauano' da so'orauec co'ollaxa,

qaq cha'aye Aỹem Nataxala', maye Natamnaxala' namayepi, sa'axaỹa qome da natamnaxac.

₇Qaq na Efraín, qalaq 'eeta'am qome ca ale, qataq da lquiyaqteỹaxac,

ỹataqta matapiguiñi qome, 'eeta'am ca shiỹaxaua da nỹomtapigui na lataxa.

Qaq na llalaqpi da ilotaigui, nache nataqa'en machiguiñi;

da lquiyaqteỹaxac ỹataqta machiguiñi souaxat Ñim Nataxala'.

₈Aỹem seỹaxanegue qome namayepi, qataq llaỹona't, cha'aye ñeca'alaxatec namayepi.

Nache ỹe'eguelaxa qome da ỹataqta qalota, 'eeta'am so hua'au' vi'iye.

₉Qaq na'aictaxa da Aỹem selagaxat co'ollaxa da taỹa ñaqa'en nam ỹotta'a't shiỹaxauapi,

qalaxaye na'aictaxa da qaỹoqta, qalaq tachigui lauel qome Aỹem,

nache huo'o qome ca na'a'q da ñe'eguelaq nnaictague' na llalaqpi.

₁₀Cha'aye ñe'eguelaxat qome sachegoxotchiguiña ye Egipto,

qataq ye Asiria, nache ñauega ye Galaad qataq ye Líbano,

qaq souaxat da ỹataqta qalota qome, nache qaica ca ldaqa'.

₁₁Qataq ỹa'axasoxongui qome aye auaxai ye Egipto, qaq Aỹem ñepaxateguet ana lapaxa.

Qataq seqaxaỹaxat qome aso tala Nilo, nache selaxachigui da na'amqaanaxac ye Asiria,

qataq nache tachiguiña ñaqa'en da la'añaxac ye Egipto.

₁₂Aỹem sa'añaqchet qome namayepi, qaq namayepi nache quetaigui qome da ỹe'enaxat.

Qaq 'era da ỹa'aqtac Aỹem Nataxala'.»