1Qaq 'era da la'aqtac Ñim Nataxala', da ỹa'axata'a da 'eetec qome nam Israel. Ñim Nataxala' maye ỹo'ot co'ollaxa na piguem, qataq ỹo'ot ana 'alhua, qataq ỹanem da lca'alaxa ca shiỹaxaua, da la'aqtac 'eeta': 2«Na Jerusalén so'otec qome da 'eeta'am aca ỹomaxaqui na lataxa, nache itaqchet qome 'enauac nam lauoreuapi ỹotta'a't shiỹaxauapi. Qaq namayepi qom coleesop na Jerusalén, nache nataqa'en na laỹepi huaqta'a't nỹecpi ye Judá qailoquiaxan qome. 3Qaq que'eca na'a'q, na Jerusalén 'eeta'am ñaqa'en ca qapa'atta coma' da talec 'enauac na ỹotta'a't shiỹaxauapi. Nache ique'emaqchet qome cam huotaique da nauaxaỹaxaasheguem. Qaq 'enauac na ỹotta'a't shiỹaxauapi, huaxaỹa't qome da dataỹa'aguet na Jerusalén, 4qalaxaye Aỹem sequichoqchet qome 'enauac nam lalo caipi namayepi, qataq so'otec da qaica ca laỹaanataxanaxac nam netalecpi. Aỹem ñauaatalec qome nam chegoxoguetpi so Judá, qataq so'otec da sa nauaañi na lalopi caipi na ỹotta'a't shiỹaxauapi. 5Qaq qom ỹauaachigui de'era, na lataxala'pi na Judá le'ecpi nache, 'eeta': ‹Ñim Nataxala' maye Qaica ca Ỹaqalanapec nacheñi Ñim Natamnaxala' nam hueta'a na Jerusalén, qataq nacheñi Ñim ỹanem da la'añaxac namayepi.› 6Qaq que'eca na'a'q, nache na lataxala'pi na Judá le'ecpi, so'otec qome da 'eeta'am aca poqo laỹe 'ettangui huetangui na 'epaq, 'eeta'am ca norec da ỹavigaxat ana naqtapi na nañiguishec. Qataq ỹavigaxat na lauoreuapi ỹotta'a't shiỹaxauapi maye pa'aigue da aloic qataq da ne'emaq, qalaxaye na hueta'a ye Jerusalén, ỹe'eguelaxa da hueta'a na maiche lma' huaqta'a't nỹecpi.»
7Qalaxaye Aỹem Nataxala', hua'auñi qome da ñeca'alaxatec na lma' ye Judá, yaqto' saishet da ỹactauec da llo'oxoyec nam chegoxoguetpi so David, qataq nam hueta'a na Jerusalén, saishet da napacalec nam laỹepi maye chegoxoguetpi so Judá. 8Aỹem Nataxala', ñepaxattalec qome na hueta'a na Jerusalén. Qaq nam ỹataqta qaica ca la'añaxac namayepi, qalaq 'eeta'am qome so David da la'añaxac, qaq nam chegoxoguetpi so David, qalaq 'eeta'am qome Ñim Lo'onatac 'Enauacna, qataq 'eeta'am ca lamaxashec Ñim Nataxala' da hua'auta'ague da tata'ague namayepi. 9Que'eca na'a'q, nache camachaqca nam ỹotta'a't shiỹaxauapi, da huotaique iloquiaxan na Jerusalén, nache Aỹem selaxachigui camayepi. 10Qalaxaye nam chegoxoguetpi so David, qataq nam hueta'a na Jerusalén secorelec qome dam saqcha'a 'achecỹaxac qataq da atamnaxac. Huaña nache Aỹem ỹamato'ot, Aỹem maye aỹem ỹalauat, nache nỹen 'eeta'am da nỹeetapeguelec ca 'oonolec llalec, huo'otaq ca llalec ỹe. 11Nache que'eca na'a'q, ỹataqta lta'araic qome ca noinaxac ye Jerusalén, 'eeta'am co'ollaq qanỹeetapeguelec so Hadad Rimón, huaña ye ca'amegue ye Meguido. 12Nache 'enauac ne'ena 'alhua, da nam nhuo' le'ecpi huo'oi qome naua lpa'axaco da nỹeetac, nam chegoxoguetpi so David qataq ana lhuapi; qataq nam chegoxoguet so Natán, qataq ana lhuapi; 13qataq nam chegoxoguetpi so Leví, qataq ana lhuapi; qataq nam chegoxoguetpi so Simí, qataq ana lhuapi; 14qaq 'era da 'eetec qome nataqa'en nam laỹepi nhuo' le'ecpi, da ñim 'oonolec namayepi huo'o da lpa'axac, qataq ana lhuapi.
