Da nauanaqchec co'ollaq qaila'alo soua cuatro naigona maye alaataxaqui'
1Aỹem, qaltaq huo'o so lỹa ỹauanaqchec, sela'alo soua cuatro naigona alaataxaqui', chegoqchiguinguilo soua dos qasoxonaxal maye ndota't na bronce. 2Aso hua'auchiguiñi naigona, lauegaxala'ate soua caaỹol togaxaraiqa; qaq aso lỹa qalaq lauegaxala'ate soua caaỹol lairaxaiqa, 3qaq aso lỹa qalaq lauegaxala'ate soua caỹol lapagaxaiqa, qaq aso pa'atec qalaq lauegaxala'ate soua caỹol ỹapagaqalec da lo'oxoỹaxa'c. 4Nache senat so namaxashec maye aỹem na'aqtaxaatague' sheeta': «'Am Ỹataxala', ¿negue't ca naigui de'era?» 5Qaq so namaxashec aỹem ỹasateguet, 'eeta': «Ne'enaua nachenaua naua cuatro la'a'che, maye chegoqtrot Ñim Nataxala' maye lalamaqte 'enauac ana 'alhua. 6Qaq aso naigona maye lauegaxala'ate soua caaỹo lairaxaiqa, taỹa ye 'alhua maye pa'aigue da sheu', qaq aso lauegaxala'ate soua caaỹo lapagaxaiqa, qalaq taỹa ye 'alhua maye pa'aigue da avit, qaq aso lauegaxala'ate soua caaỹo maye ỹapagaqalec da lo'oxoỹaxa'c, qalaq taỹa ye 'alhua maye pa'aigue da tagueñi.» 7Qaq je'c, soua caaỹo maye ỹapagaqaleguete da lo'oxoỹaxa'c, ỹataqta huo'o da lyaqa' da coleerelec 'enauac ana 'alhua. Nache so namaxashec 'enapegalo soomaye, 'eeta': «Qauconñiilec 'enauac ana 'alhua.» Nache soomaye ỹo'o't de'era na'aqtac. 8Qaq ime de'era, nache so namaxashec aỹem ỹa'alaxalec, 'eeta': «¡Ñaq 'aumeten se'esoua maye nqo'oora ye 'alhua maye pa'aigue da sheu', soomaye ỹa'axanegueta da layeloxo Ñim Nataxala' maye huetalec yi'iye 'alhua!»
Aso aro'o maye taỹa'a da qoỹanaxanaxangui so Josué
9Qaq Ñim Nataxala' aỹem ỹanem de'era la'aqtac maye, 'eeta': 10«'Alaỹona't qome aca ltaunaxanaqte ñeua ncoñetegui'she co'ollaxa, maye chegoqra'a ye Babilonia: Ñim Jelday, Tobías, qataq ñi Jedaías. Qaq nacheca que'eca na'a'q, nache 'anqo'ona ye lma' ñi Josías, maye llalec so Sofonías. 11Qaq cam lcat plata, qataq cam lcat oro, maye 'alapoñiguishec, nache 'auo'onataxana qome da 'auo'ot aca aro'o, qaq qom ime, nache 'aỹa'anaxanaxangui ñim Josué maye lataxala' nam ntaxaỹaxanaxanecpi, ñim llalec so Josadac. 12Qaq nache qonapega qome, qoneta': ‹Ñim Nataxala' maye Qaica ca Ỹaqalanapec, ỹataqta 'eesa da la'aqtac, da ñim ỹale maye le'enaxat Llaxataxa, ñaxatsheguem qome chegoqtoiguilo naua maiche lpa'aye, nache qaltaq no'oxoosheguem qome añi atamnaxaqui maye ỹalamaqte. 13Ñimaye qaltaq no'oxoosheguem qome añi ỹalamaqte atamnaxaqui, nache ỹaconeguet qome da llo'oxoyec da nta'a. Qataq nso'ongui qome aca nso'onaxaqui da damaxasoxon, qaq na laỹe aca nso'onaxaqui nache nso'ootaña qome ca ntaxaỹaxanaxanec, qaq caamaye nache huetraigui qome da l-lagaxayec.› 14Qaq aca'aca aro'o, nache qoỹanaigui qome añi atamnaxaqui maye ỹalamaqte, da yaqto' saishet da qaicoua'aisalo soua, Jelday, Tobías, qataq so Jedaías maye llalec so Sofonías.» 15Qaq anac qome na shiỹaxauapi maye qaỹoqtegue ca chegaqa'ague, da yaqto' qami' itaua'n, da qaltaq qano'oxoñiisheguem añi atamnaxaqui maye lalamaqte Ñim Nataxala'. Qaq huaña qome nache qauaỹacheñi da Ñim Nataxala' maye Qaica ca Ỹaqalanapec, da nacheñi ñi aỹem namaq. Qaq de'era ipacchigui qome, da qami' qana'axaỹaxañiỹa, qataq da qaualaqaiguet Ñim Nataxala' maye Qanatamnaxala'ai.
