1Ñim Nataxala' maye Qaica ca Ỹaqalanapec, aỹem ỹanem da la'aqtac, 'eeta': 2«'Era da ỹa'aqtac Aỹem Nataxala' maye Qaica ca Seqalanapec: Aỹem ỹataqta lta'araic da ica'alaxanaxac da seca'alaxaalec na Sión, ỹataqta Aỹem inogoqchet da ica'alaxanaxac. 3Qaq Aỹem ñe'eguelaxa qome ye Jerusalén da qaltaq sonaña. Qaq huaña nache ye Jerusalén, qaỹamata'ac qome da Huaqta'a't Nỹecpi maye hueta'a da Nalaxayec, qaq añi qasoxonaxa maye lalamaqte Ñim Nataxala', qalaq qaỹamata'ac qome da Qasoxonaxa maye Qui'itta. 4Qaq huaña, nache na ỹa'axaiquipi, qataq ana ỹa'axaina'pi, qaltaq nso'ootañi qome hueta'alo naua nqa'aico ye Jerusalén, ñi 'oonolec ỹasheltalec aca lashelte souaxat da lqueroxo. 5Qaq na ñaqpiolec, maye ỹalleppiolec qataq na 'alpiolec, qalaq ỹe'eguelaxa qome da da'aistapeeguelo naua nqa'aico yi'iye huaqta'a't nỹecpi. 6Qaq que'eca na'a'q, nache 'enauac de'era, da 'eco' huo'o naqa'en da lqalaic ca no'onañipi ne'ena nhuo' le'ecpi, qalaxaye Aỹem qaica ñaqa'en ca lqalaic damaye. Qaq 'era da ỹa'aqtac Aỹem Nataxala' maye Qaica ca Saqalanapec: 7Aỹem, sesoueeguesop qome na ỹalamaxatpi nhuo' le'ecpi da la'añaxac na shiỹaxauapi maye lma' ye 'alhua maye pa'aỹa'ague da nala' lliguisheguem, qataq na pa'aỹa'ague da nala' lliguiñi, 8nache ñauega ye Jerusalén da yaqto' nache naña yemaye. Huaña, nache ne'ena nhuo' le'ecpi ỹataqta ỹalamaxatpi qome, qataq Nachaỹem da Aỹem Natamnaxala' qome namayepi, Aỹem maye so'ot da nalochiguiñi lataxac, qataq Aỹem 'eesa.» 9Qaq 'era da la'aqtac, Ñim Nataxala' maye Qaica ca Ỹaqalanapec: «Qana'añaxache qome, qami' maye qaua'aqaichigui se'esoua na'axa'te, da la'aqtaxanaxac so na'aqtaxanaxanecpi, chegoqchiguiña so na'a'q co'ollaq qalapaxañi so lo'oxonaxala', da yaqto' qaltaq qano'oxoosheguem añi atamnaxaqui, maye lalamaqte Ñim Nataxala' maye Qaica ca Ỹaqalanapec. 10Cha'aye choche nvitta'alo ne'enaua na'axa'te, da qaca aca nsheetenaqte na shiỹaxauapi, qataq saishet da qaiquia'axan na shiguiỹacpi. Qataq souaxat na pa'aguenaxauapi, nache qaica ca l-lagaxayec nam hueta'a ne'ena 'alhua; cha'aye aỹem maiche shena'ac da ñi 'oonolec namayepi maiche npa'aguene' ca lỹa. 11Qalaxaye nagui nam no'onañi ne'ena nhuo' le'ecpi, saishet da qaltaq so'otec de'era, da 'eeta'am ñaqa'en soua hua'au' na'axa'te. Qaq 'era da ỹa'aqtac Aỹem Nataxala' maye Qaica ca Seqalanapec. 12Qaq qom danaxan namayepi qalaq huo'o da l-lagaxayec. Qataq ana lañiguishe uva huo'o qome ana ala, qataq na na'alhua no'on naqa'en 'enauac nam nañiguishecpi, qataq na piguem chegaqasheguema qome na 'aỹa. Qaq Aỹem so'otec qome da yaqto' hueto'ot 'enauac de'era, nam no'onañipi ne'ena nhuo' le'ecpi. 13Qaq qami' Judá le'ecpi, qataq qami' Israel le'ecpi, maye qami' ỹasaqtegueleguete na qauem nam qaualliquiita'aguet co'ollaxa ỹotta'a't shiỹaxauapi, qaq nache 'eetec nagui da Aỹem qami' ñeca'alaxatrec, qataq qami' chegoqchiguilo ñaqa'en da no'on. ¡Qaq saishet qome da qayi'iitac! ¡Nacherata da qana'añaxache!» 14'Era da la'aqtac Ñim Nataxala' maye Qaica ca Ỹaqalanapec 'eeta': «Aỹem maiche iuennataxac co'ollaxa, da sauo'o da nhuaxanaguec som qauachegoqoiguet qarta'ailpi, co'ollaq aỹem inogoqchet, nache saishet da ñetogottac. 15Qaq nagui, qalaq iuennataxac da so'otec ca ỹaỹamaqchiguiñi na Jerusalén, qataq na Judá. Qaq ỹoqo'oye, saishet qome da qañi'iitac. 16Qaq 'era da iuen da nache 'eetai' qome da qauo'ocheetac, 'eeta': Da qana'aqtaxañiitega't qalaq ỹataqta qami' 'eesora, qaq da huo'o ca qanmiche qalaq qoquiitegue da nalochiguiñi lataxac, qataq qanpogoxoiñapegue' da nlagaxayec da qoviita'a ca huaña da huo'o ca qanmit; 17saishet da qauennacheetega da qauo'ochec ca qauem ca qarỹai, qataq saishet da saq'en ca qaỹa'añi qara'aqtaqui. Cha'aye aỹem ỹataqta seqaiga 'enauac de'era. Qaq 'era da ỹa'aqtac Aỹem Nataxala'.» 18Ñim Nataxala' maye Qaica ca Ỹaqalanapec, aỹem 'enapega, 'eeta': 19«Da qouaqchetaxac maye huaigui naxa so ca'agoxoic cuatro, cinco, siete qataq diez, qalaq nmeneguet qome da tonaxac, qataq da namaicỹaxac da huo'o na lta'araic laponaxacpi nam chegoxoguetpi so Judá. ¡Qami' ỹataqta qauauochec qome da 'eesa lataxac, qataq da nlagaxayec!
20Qaq da la'aqtac Ñim Nataxala' maye Qaica ca Ỹaqalanapec, 'eeta': Ñaq anacta nam shiỹaxauapi maye chegaqa'a nam qalota huaqta'a't nỹecpi. 21Nache namayepi nqo'ona qome na laỹepi nache, 'eeta': ‹¡Qolaq ñimitaqaique Ñim Nataxala', nache seỹaxanaqot qome da qomi' ỹanema ca qana'achecỹaxac!› Nache na laỹepi ỹasat qome, 'eeta': ‹¡Nataqa'en qomi' qolaq!› 22Nache naỹa qome ye Jerusalén na qalota ỹotta'a't sheỹaxauapi, da nmittaique Ñim Nataxala' maye Qaica ca Ỹaqalanapec, nache iỹaxanot Ñimaye ca na'achecỹaxac. 23Qaq que'eca na'a'q, na qalota ỹotta'a't shiỹaxauapi maye ỹotta'a't na la'aqtacpi, ỹacootaua'a qome ca lapo' laỹe ñi 'oonolec judío, nache 'enapega 'eeta': ‹¡Qomi' 'aua'aqta'alo da 'am seca'ataxague, cha'aye saỹatenaq da Ñim Lo'onatac 'Enauacna qami' hueta'agueta!›»
