1Wet lhamel ichäj Arca tä Lhawuk lhämet lehi, wet itichufwi lewukwe tä wesaj tä David pajche iwaklhatho. Wet lhamel yen Lhawuk lew'ayhata häp tshätäy tä õ'wunhomche, lhäy'e iyhäj tä õ'länhen häpkhilek wichi lha'isyene Dios. 2-3Tä David ileyej, tahuye Israel lhayis wet yok:
–Is chik Lhawuk ikäpfwayej amehen lakäpfwayajay tä isen.
Wet hiw'enho elh weihalhapej lhamel, hin'o lhäy'e atsinha, häp pan lhäy'e t'isan lhip, lhäy'e uvas tä tamchäyhen.
4Wet itshupyene iyhäj Leví lhayis yämlek hich'ote Lhawuk lechumet tä ihi tä Arca tä Lhawuk lhämet lehi itayche. T'uhläk lhamel iwo t'alhyajaye Lhawuk tä häpe Israel laka Dios wet iwo graciasa wet iwunit. 5Elh tä lhamel laka niyat häpe Asaf, wet elh tä hich'ote häpe Zacarías. Iyhäj tä y'ajiche arpas häpe Jeiel, Semiramot, Jehiel, Matatías, Eliab, Benaías, Obed-edom, lhäy'e Jeiel elh. Wet Asaf häp tä y'ajwek chinaj lhipey, 6wet sacerdotes Benaías lhäy'e Jahaziel yafwutchehenpej lefwolis trompetas tä ihi tä Arca tä Dios lhämet lehi itayche.
7Wet ifwalatso nech'e tä David ne'tek Asaf lhäy'e lepuhfwas iten letenekna tä hiw'enho gracias Lhawuk:
M'ayhay tä ischehen tä Dios iwoyeje p'ante Israel lhayis
8W'enho gracias häp Lhawuk wet änch'oye.
Fwenho wichi tä i'pe honhat
häp m'ak tä lham iwoye.
9Ten atenkay tä lewujyenej.
Enpej ämeta m'ayhay tä ischehen tä iwoye.
10Awujyenejen häp lhey tä t'amajchet.
Käsyenejthä ahusey,
amel tä let'ukwe Lhawuk.
11Hoye Lhawuk tä lakhajyhayaj ihi,
ukwepej ilhokej ifwalas.
12Tichunche m'ayhay tä isen
tä lham yenlhi p'ante,
lhäy'e lhämtes tä iwoyeje wichi.
13Amel ahäpehen lakawo Abraham leles tä lepes lheley,
wet ahäpehen Jacob leles tä lham itshupiye.
14Lham häpe Lhawuk Dios,
wet niyatej imälhewek honhat.
15Wet tek hip'ethathilahlä
lhämet tä iwoye p'ante,
yäk ichäte lepes lheley.
16Häpe t'at lhämet tä iwoyeje p'ante Abraham
lhäy'e tä hit'untejche p'ante Isaac,
17wet äp hit'unhatche tä ifwenho p'ante Jacob
häp lhämet tä lhamya,
häp lhämet tä nitäya
tä ifwenho Israel tä yok:
18“Ow'enla amhohen honhat tä Canaán
yämlek lewuk amel.”
19Tej tä niwuja'pe lhamel,
lhimphaj tä ihi honhat tä kalew'eta,
20wet ihoyehen wichi iyhäj laka honhates
wet iyejpej niyat tä w'enha lhamej,
21Dios t'uyehen wet nehit katsik iwo lewit'äyhyaja.
Wet ifwenho niyatey tä yok:
22“Yej wo m'akayej oka wichi tä otshupiye,
wet amajej oka profetas.”
23Ilhokej wichi, amel tä lhe'pe honhat,
tenay atenek tä lewujyenay Lhawuk.
En asilätyaja ilhokej ifwalas
häp wichi lefwayhyaj tä iwoyeje.
24Fwenho ilhokej wichi tä i'pe honhat
häp lham lewujyaj,
lhäy'e m'ayhay tä iwoye tä wichi iseltejen.
25Tsi Lhawuk häpe N'owujtaj tä Lhamya
wet t'uhawetej chik õ'tiyej lewujyaj.
Is chik wichi itiyej lenowayhyaj,
tsi inu'pe dios lhayis.
26Laha ihihit'a wichi iyhäj laka dios lhayis,
mat Lhawuk häp tä lhenek pule.
27Lhawuk lewujyaj tä isi iyej t'at,
wet lakhajyhayaj lhäy'e õkäjyaj
ihi t'at Lew'et tä T'amajchet.
28Ilhokej wichi, amel tä lhe'pe honhat,
wunitay Lhawuk.
Wunitay lakhajyhayaj lhäy'e lewujyaj.
29Wujyenay tsi t'uhawetej t'at häp lham.
Häne m'ak tä lhen lew'ayhata
tä lehoho Lewukwe ka'alhos.
N'okwiyej Lhawuk tä ihi
lesilatyaj tä t'amajchet.
30Is chik ilhokej wichi
itiyej lenowayhyaj häp lham.
Lham hit'unthi honhat wet ihit tä ihi.
31Is chik pule lhäy'e honhat iwo lakäjyaja.
Is chik wichi tä i'pe honhat yok:
“¡Lhawuk häpe rey!”
32Is chik lewomekitaj iwo lepaka,
lhäy'e m'ayhay tä ihi.
Is chik yachuyaj lew'et iwo lakäjyaja,
lhäy'e yachuyaj lhay tä ihi.
33Is chik hal'äy tä ihi tayhi
t'änthä tä lakäjyaj ihi
tä ihi tä itayche häp Lhawuk tä nek.
Matche, lham nek yämlek lhayen Niyatayej honhat.
34¡Lewujyaj ihi Lhawuk!
¡N'awunit Lhawuk tsi lham häp tä p'altsentsaj,
wet lehumnhayaj tek täy!
35¡Fwayhat n'ohen,
Iwuk tä ahäpe olhamel oka Dios!
Tonphä olhamel tä oiyej wichi tä i'pe honhat,
häpkhilek olhamel ow'en amho oka gracias
wet oyenla okäjyaja tä owunitpej ey.
36¡Lewujyaj ihi Lhawuk, Israel laka Dios,
athana wet yämlek tiyäj'attsiy!
Is chik ilhokej wichi yok, “¡Amén!”
¡Lewujyaj ihi Lhawuk!
Häp Leví lhayis lhamel tä ichumhilhi Jerusalén lhäy'e Gabaón
37Wet David hin'äyej Arca tä Lhawuk lhämet lehi häp Asaf lhäy'e iyhäj tä lepuhfwas yämlek lhamel tä yen lechumyaja õn'okhayaj tä õ'tiyej Lhawuk fwalapej fwalapej. 38Häte hin'äyej Obed-edom tä lhäy'e sesenta y ocho iyhäj tä lepuhfwas, lhäy'e Obed-edom elh tä Jedutún lhäs, lhäy'e Hosa. Lhamel häpe lepewos.
39Wet sacerdote Sadoc lhäy'e sacerdotes iyhäj, David ne'tek lhamel w'enhayej lechumyaj tä ihi carpa tä Lhawuk lew'et tä ihi lhip tä tojphä tä ihi Gabaón. 40Lhamel yenlhi Lhawuk lew'ayhat tshätäy tä õ'wunhomche ilhokej ifwalas tä ihi altar, tä nech'e nat lhäy'e tä honaj. Tsi häp täjtso Lhawuk lhämet p'ante tä ne'tek Israel lhayis iwoye. 41Hätej hin'äyej lhamel Hemán lhäy'e Jedutún, lhäy'e iyhäj tä õ'tshupyenehen tä õ'wo lheyisa, yämlek häpe lhamel tä ichoythä tä iwujyen Lhawuk, hiw'enho laka gracias tsi naj lepesa Lhawuk lehumnhayaj. 42Lhamel yafwutchehen lefwolis trompetas wet y'ajwek chinhas lhipey, lhäy'e músicas iyhäj tä y'aji, wet iwujyenej Dios häp letenkay. Wet lhäy'e Jedutún leles tä õ'tshupyenehen lhamel, häpe lepewos, lhamel tä t'uye lepe.
43Wet ilhokej wichi yäple lew'etes. Wet häte David yäple lew'et yämlek t'alhe Dios lakäpfwayaj chik itiyej lew'et lheley.
