Amón lhayis yen w'et m'ayeka David lakachenhay
1Tä paj p'ante y'il Nahas, Amón lhayis laka rey, wet lhäs Hanún tä icheyäjo lajcha leniyatyajw'et. 2Wet David letichunhayaj yok:
–Is chik owoyeje m'ak tä is häp Hanún, Nahas lhäs, mälhyej tä lajcha iwoyej n'oye m'ak tä is wet olhamel och'ot lhamehen.
Wet David ichene lakachenhay yämlek ikhajyen Hanún tä itichunche lewit'äy tä lajcha y'il. Mat tä David lakawos ichäte Amón lhayis kahonhat, 3wet laka niyatey tahuyej p'ante Hanún tä yok:
–¿Hä lematitche tä David ichen ame hin'ol tä lakawos tä ifwen amho tä itichunche awit'äy wet iwujyen ajcha tä y'il? ¡Et lhamel nämhen yämlek itetshan honhat wet iyahinpe yämlek iwasthi!
4Wet Hanún ne'tek õ'tsokanej David lakawos, wet ne'tek õyisitchehen lepäsey lhäy'e tä õyisitchehlä lechowej lew'uyis yäk ichäte lheche lechowej. Tä ileyej, wet ichen lhamel. 5Wet õ'fwenho p'ante täjtso rey David, wet ichene lakawos iyhäj tä ichutlä hin'oltso tsi lhamel wuj tä len'äfwlhi ihi. Wet David ne'tek lhamel imälhehi Jericó yämlek yachajo tä lhaichihelit lepäsey, wet nech'e iwoye chik pilthä lhamel.
Israel lhayis ikalhi Amón lhayis
6Wet Hanún lhäy'e Amón lhayis lhamel ihanej p'ante tä David n'äyihomche lhamel. Tä mälhyejtso, lhamel ichene treinta y cuatro mil (34.000) kilos plata häp wichi tä ihi Mesopotamia, Aram, Maaca, lhäy'e Soba, tä yen hayayej kaletas tä õka'tshayajchal lhäy'e hin'ol tä iche'pe yel'atas. 7Treinta y dos mil kaletas tä lhamel yen hayayej, lhäy'e häp Maaca laka rey lhäy'e laka nifwotas. Wet lhamel nämhen wet iwo lew'etawhäye Medeba. Wet häte Amón lhayis tälhomche laka hupuy wet lhaiwaklhathen yämlek iwo laka'tshayaja. 8Tä David ihanch'oye, wet ichene Joab lhäy'e ilhokej laka nifwotaj yämlek itayhlä lhamel. 9Wet Amón lhayis ihoye p'ante tä iwo laka'tshayaja, wet lhaikanchehchä tä ihi lepe tä ihi hupuy lefwamhat. Wet reyes tä nämhen ihi lhip elh tä tsajphä.
10Wet Joab hiw'en p'ante tä lham tä ihlä õka'tshayaj, lhäy'e tä ifwute lham. Wet ichuma Israel kasip'älis tä lhäy'e lhip tä khajayhen, wet lhaiwaklhat yämlek itayhlä Aram lhayis. 11Wet ichuma sip'älis iyhäj tä imälhehi wet yachaje lech'inij Abisay tä lham tä lhaitumtej yämlek itayhlä Amón lhayis. 12Wet Joab ifwenho Abisay tä yok:
–Chik Aram lhayis khajayhen, inu n'o'pe, wet is chik am leho n'oye tä lech'ot n'oye. Wet chik Amón lhayis inu atape, wet olham ohohla ame tä och'ot ame. 13¡Akhajyen, otle t'un! ¡N'awo lhaka'tshayaja'pe lhaka wichi lhäy'e lhaka Dios kahupuy! Wet is chik Lhawuk iwoye häp m'ak tä lham ihuminche.
14Wet Joab ihoye, lhäy'e laka sip'älis, yämlek itayhlä Aram lhayis, mat tä lhamel hiw'enlä inukwe alhoho. 15Wet tä Amón lhayis hiw'en p'ante tä Aram lhayis inukwe alhoho, wet hätej lhamel inukwe alhoho tä hiw'enlä Abisay, wet lhamel tiyäjo laka hupuy. Wet Joab ileyej tä itayhlä Amón lhayis wet yäple Jerusalén.
Israel lhayis yachajo tä ikalhi Aram lhayis
16Tä Aram lhayis hiw'en p'ante tä Israel ikalhi lhamel, wet lhamel iwo lechenekaye Aram lhayis iyhäj tä ihi lhip elh tewokitaj tä Éufrates. Wet lhamelna yikhen yämlek hich'ote iyhäj, wet elh tä yikchufwi lhamel häpe Sobac, Hadad-ezer laka sip'älis tä laka niyat. 17Wet õ'fwenho p'ante David, wet ihutwek ilhokej Israel lhayis. Wet lhamel yistho tewok tä Jordán wet lhaitott'ayne letayhfwas. Wet David iwaklhat laka sip'älis yämlek itayhlä lhamel, wet Aram lhayis iwo laka'tshayajayej. 18Mat tä lepese lhamel yikhen tä nowaye Israel. Wet David lhäy'e laka nifwotas ilänhen setecientos (700) Aram lhayis kasip'älis tä ihiche kaletas lhäy'e cuarenta mil (40.000) hin'ol tä t'äschehchä. Hätej ilän Sobac, Aram lhayis kasip'älis kaniyat. 19Wet ilhokej reyes tä lhaip'ajtej Hadad-ezer, tä lhamel hiw'en p'ante tä Israel ikalhi lhamel, wet lhamel ileyej tä itayhlä wet iwo letamsekahlä David, wet Israel len'ohyaj i'pe lhamel. Wet tälhe lewhäytso tä Aram lhayis ileyej tä hich'ote häp Amón lhayis.
