1Häp tä tumenej tä David yok:
–Ihla kana Lhawuk Dios Lew'et, yämlek Israel lhayis hiw'en altar tä tshätäy tä õ'wunhomche lew'et.
David iwaklhat tä lhäs Salomón tä yenlalhi Dios Lew'et
2Wet David ne'tek lhaihutwek wichi tä w'enha lhamej tä yen lew'eta Israel, wet itshupyenehen iyhäj tä yenlhi tuntey yämlek lhamel yenlhi hup tä Dios Lew'et. 3Wet David iwaklhat wuj chinhas yämlek õyen clavosa tä õ'thatho lepe p'otes lhäy'e chinhas iyhäj. Häte iwaklhat wuj chinaj tä bronce, matche tä choyhat, 4lhäy'e hal'ä tä pino, iwohiyet'a tä õ'tetshanlä. Tsi wichi tä ihi Sidón lhäy'e iyhäj tä ihi Tiro tä lhamel ichäje David wuj hal'äy tä pino.
5Wet David yen tichunhayaja lhäs wet yok, “Olhäs Salomón manse, kamaj tek häpe elh tä thaläkw. Wet owatläk yenlhi Lhawuk Lew'et, iwatläk lhäy'e lhip tä isilataj wet letoyaj ihi yämlek wichi tä ihi ilhokej honhates yenpej lhämeta. Tä mälhyejtso, olham tä owaklhatla m'ayhay.”
Häp tä tumenej tä David wuj p'ante tä iwaklhat m'ayhay tä tott'ayek y'inhila. 6Wet t'äne lhäs Salomón, wet ne'tek yenlhi Lhawuk Lew'et tä Israel laka Dios. 7Wet yok:
–Yäs, olham otichunhayajte tä owatläk oyenlhi Lhawuk Dios Lew'et. 8Mat Lhawuk ifwen n'oho tä yok, “Ow'en tä am wuj aka'tshayaj tä lewoye wet wuj w'oyis tä letsäy. Häp tä tumenej tä kahäpeya am tä lhenlalhi Ow'et. 9Mat am lew'enla äs wet häpehila hin'o tä letamsek ihihla, wet ilhokej letayhfwas iwohla letamseka. Häp tä tumenej tä lheyla Salomón. Wet ow'enhohla letamsek Israel ilhokej ifwalas tä Salomón ihi leniyatyaj, 10wet lham tä yenlalhi Ow'et. Wet lham häpkhila olhäs wet olham ohäpkhila lajcha, wet oyämla t'un leniyatyaj tä ihi Israel yämlek tiyäj'attsiy.”
11Wet David yok:
–Athana yäs, is chik Lhawuk Dios i'amej tä lhenlhi Lew'et, mälhyej tä pajche lhämet tä yäme tä lewohiyela. 12Wet is chik Lhawuk hiw'en amho atichunhayaj tä is alhoho, lhäy'e ahanyaj, yämlek letiyäjo aniyatyaj tä Lhawuk hiw'en amho tä ihi Israel wet lewoye lhämtes. 13Tsi chik lewoye Lhawuk lhämtes lhäy'e lechufwenyajay tä hiw'enho p'ante Moisés tä ne'tek Israel lhayis iwoye, häpkhilek ais alhoho. Akhajyen wet otle t'unhat. Yej noway wet yej t'ayhatchä akhajyhayaj.
14“Lhek yahinya, olham wuj tä olhaikhajyen tä owaklhatej Lhawuk Lew'et tres millones trescientos mil (3.300.000) kilos oro, lhäy'e treinta y tres millones (33.000.000) kilos plata, lhäy'e bronce lhäy'e chinhas tä iwohiyet'a tä õ'tetshanlä tä choyhat tsi lhäy'e lhip tä wuj. Häte owaklhat hal'äy lhäy'e tuntey, wet is chik am lethatpe lhip. 15-16Wet lew'enla wujpe chumhas, häp hin'ol tä yen chumyaja tuntey, lhäy'e iyhäj tä hup lewos, lhäy'e wujpe hin'ol tä wuj tä ihanej tä yen chumyaja oro lhäy'e plata, bronce lhäy'e chinhas. Tä mälhyejtso, akhajyen tä lechumlhi wet is chik Lhawuk i'amej.”
17Wet David ifwenho ilhokej niyatey tä ihi Israel chik lhamel hich'ote lhäs Salomón. Wet yok:
18–Häp Lhawuk Dios i'amejen wet hiw'en amhohen atamsekis yäk tajen lepesey lhaka honhat. Tsi lham tä hich'ot n'oye yämlek okalhi wichi tä lew'et honhatna, wet ifwalasna lhamel ichufwi Lhawuk lakhajyhayaj lhäy'e tä ayen lewuhuya. 19Wet athana a'achajaye Lhawuk Dios, mälhewek ahusek lhäy'e mälhewek atichunhayaj. Mäh enaylhi Lhawuk Dios Lew'et tä T'amajchet yämlek letihi Arca tä Lhawuk lhämtes ihi lhäy'e iyhäj m'ayhay tä t'amajchetes tä õyen n'okhayajayej.
