1~Crón 5

_1-3Rubén häpe p'ante Israel lhäs tä thaläkw, wet leles häpe Hanoc, Falú, Hesrón, lhäy'e Carmi. Rubén häpe p'ante Israel lhäs tä thaläkw, mat lham tä tumen lhamej tä imäyej atsinha tä lajcha iyej, wet õ'soyej len'ohyaj tä häpe õchunkatsek wet õyachaje José leles. José häpe Israel lhäs elh. Mat tä paj p'ante, wichi tä tälhe letes Judá lhäy'e lhip tä lhaikhajyenhen, wet hin'o tä niyatej ilhokej Israel lhayis tälhe t'at lhamel. Mat José t'at tä len'ohyaj ihi, mälhyej chik häpe elh tä õchunkatsek.

₄Häp hin'o tä lhey Joel häpe p'ante Semaías lajcha, wet Semaías häpe p'ante Gog lajcha, wet Gog häpe p'ante Simey lajcha. ₅Simey häpe p'ante Micaías lajcha, wet Micaías häpe p'ante Reaías lajcha, wet Reaías häpe p'ante Ba'al lajcha, ₆wet Ba'al häpe p'ante Beera lajcha. Beera häpe Rubén lhayis kaniyat wet Asiria laka rey tä lhey Tiglat-pileser yen p'ante kweneka, ihäne laka honhat.

₇Wet Beera laka wichi, häp iyhäjpej tä lhalepuhfwas tä õ'toyen lheyis, lhamel laka niyatey häpe Jeiel, lhäy'e Zacarías, ₈lhäy'e Bela tä Azaz lhäs wet lechätilis Sema lhäy'e Joel. Bela lew'et ihi p'ante Aroer, wet lham tä laka honhat yäk ichäte Nebo lhäy'e Ba'al-meón. ₉Wet tä leläy lhayäm wujpe tä ihi honhat tä Galaad, häte lhamel yen lew'eta honhat tä tumejlä ts'anis tä ihi lhip tä ifwala tälhche yäk ichäte tewokitaj tä lhey Éufrates.

₁₀Häpe p'ante lewhäy tä Saúl ihi leniyatyaj tä Rubén lhayis iwo laka'tshayaja tä lhamel itayhlä Agar lhayis. Wet lhamel ikalhi wet yen lew'eta imälhewek laka honhat tä ihi Galaad lhip tä ihi tä ifwala tälhche.

₁₁Häp wichi tä tälhe p'ante letes Gad lhamel iwo lew'etawhäye Rubén lhayis tä ihi honhat tä Basán, wet laka honhat yäk ichäte Salca. ₁₂Joel häpe lhamel laka niyat, wet lech'otfwas tä ihi leniyatyaj häpehen Safán, Jaanay, wet Safat. ₁₃Wet lepuhfwas iyhäj häpehen p'ante Micael, Mesulam, Seba, Joray, Jacán, Zía, lhäy'e Heber, siete lhamel. ₁₄Lhamel lajcha häpe Abihail, häp Huri lhäs wet lechätilis Jaroa, Galaad, Micael, Jesisay, Jahdo, lhäy'e Buz. ₁₅Häp Ahí tä Abdiel lhäs wet lechäti Guni, häp tä wichitso laka niyat. ₁₆Wet ilhokej lhamel tä yen lew'eta Galaad, lhäy'e Basán, lhäy'e wichi lew'etes tä tott'ahomche, lhäy'e ilhokej honhat tä leläy lhäk ihi tä iwhäye Sarón yäk ifwit lepes honhattso. ₁₇Wet ilhokej lhamel tä õ'toyen lheyis tä ihi lehi, häpe lewhäy tä Jotam ihi leniyatyaj tä Judá laka rey, lhäy'e Jeroboam ihi leniyatyaj tä häpe Israel laka rey.

₁₈Häp Rubén lhayis, lhäy'e Gad lhayis, lhäy'e lechowej Manasés lhayis, iche p'ante lhamel laka sip'älis tä khajayhen. Hiw'uyhiche laka'tshayajp'otes, let'okwep'ot, lakwelheley ihi, lhäy'e lech'ähil, wet wuj tä ihanej tä iwo laka'tshayaja. Ihi cuarenta y cuatro mil setecientos sesenta (44.760) hin'ol tä wak'alh chik iwo laka'tshayaja. ₁₉Wet lhamel itayhlä p'ante Agar lhayis, lhäy'e tä itayhlä Jetur, Nafís, lhäy'e Nodab. ₂₀Wet Dios hich'ote lhamel, wet lhamel ikalhi Agar lhayis lhäy'e iyhäj tä lhaithatche lhamel. Tsi tä lhamel ihi laka'tshayaj, lhamel t'alhe Dios wet Dios hich'ote t'at lhamel, tsi lhamel ichaye. ₂₁Wet lhamel ichumahen letayhfwas leläy tshätäy. Ihi cincuenta mil (50.000) camellos, doscientos cincuenta mil (250.000) tson'atas, lhäy'e dos mil asnolis. Häte lhäy'e cien mil (100.000) hin'ol tä õyen kwenkaya. ₂₂Wet wujpe letayhfwas tä y'inhen, tsi Dios tä hich'ote lhamel laka'tshayaj. Wet Israel lhayis lhamel ihi t'at honhattso yäk ichäte lewhäy tä õyen kwenkaya lhamel wet õ'häne honhat elh.

₂₃Wet lechowej Manasés lhayis wujpe lhamel. Wet häp tä lhamel yen lew'eta p'ante honhat tälhe Basán yäk ichäte Ba'al-hermón lhäy'e Senir, lhäy'e chenaj tä Hermón. ₂₄Wet iyhäj kaniyatey häpehen p'ante Efer, Yisí, Eliel, Azriel, Jeremías, Hodavías, lhäy'e Jahdiel. Lhamel häpe sip'älis tä khajayhen, häpe hin'ol tä len'ohyaj ihi wet iyhäj kaniyatey.

₂₅Mat wichi ileyej letetsel laka Dios wet lhaikänchiyej dios lhayis tä w'enha lhamej tä wichi iyhäj yen lewuhuya. Häpe wichitso tä Dios itäyhthen p'ante tä ihi honhat tä Israel lhayis nekche. ₂₆Wet tä Israel lhayis iwoynejetso, häp tä tumenej tä laka Dios inityenej p'ante Pul tä Asiria laka rey, tä lhey elh Tiglat-pileser. Wet lham tä yen kwenkaya Rubén lhayis, Gad lhayis, lhäy'e lechowej Manasés lhayis. Wet õ'häne honhat lhipey tä lhey Halah, Habor, Hara, lhäy'e tewok tä lhey Gozán, tä lhamel ihi yäk häp fwalasna.