1~Cor 10

₁Ipuhfwas, tichunache häp n'amel lhachätilis p'ante. Nilhokej lhamel tä inukwe p'ante len'äyij ichufwi pule tä yikche lhamel, wet nilhokej lhamel yistho Lewomekchät. ₂Wet tä ihi puletso lhäy'e lewomektso, hätet iwoye tä õ'bautisaynhen tä hap'akej Moisés. _3-4Wet nilhokej w'awulhejchä tä tuj t'at lhäk lhäy'e m'ak tä iyäyej tä tälhe Dios. Tsi lhamel iyäyej inät tä Dios itälhtho chenaj tä yikche lhamel tä iwo lew'ekyaja. Häp chenajtso õ'tech'aynej Cristo. ₅Mat tej tä mälhyej'attso thayej, wujpey lhamel tä tek ikänitlhi Dios. Häp tä tamenej tä lep'itseyhay imälhe'pe honhat tä ts'anis.

₆Häp tä mälhyej p'antetso m'ayhay, häpkhilek n'amel kay'atena lhamel tä ikän m'ak tä ni'isa. ₇Wet oyok, yej n'okwiyayej dios tä n'otkwey lhenhay, mälhyej iwoye iyhäj lhamel p'ante. Hätet iwoye tä Lhawuk Dios lhämet yäme tä yok, “Häp wichi tatachephä wet t'ekhen lhäy'e tä iyä, wet äp takatinwethä.” ₈Häte isit'a che y'awoye lhakain'oyaj, mälhyej iwoye iyhäj lhamel p'ante. Wet häp ifwalatso iche p'ante veintitrés mil (23.000) lhamel tä y'inhen. ₉Häte isit'a che n'amel y'elhte häp Cristo, mälhyej iwoye iyhäj lhamel p'ante, wet amlhäs ilänhen. ₁₀Wet yej yete Lhawuk, mälhyej iwoye iyhäj lhamel p'ante, wet ángel tä n'ot'ilek ilänhen.

₁₁Mälhyej p'antetso lewit'äyhyaj häp lhachätilis, häpkhilek n'amel kay'atena. Wet õ'lesayen p'ante tähestso yämlek n'amel tä y'ehi ifwalas tä lepesena y'anowaye wet n'aisej. ₁₂Tä mälhyejtso, che elh yäme tä takhajay, is tä t'amaj lhamej häpkhilek nichäta katsi. ₁₃Häp n'olhelhtshayajay tä nichät amehen, häte nichäte t'at elh che häpe. Mat is che lechayaye t'at tä Dios tek tach'anlhahiyela yämlek nichät amehen n'olhelhtshayaj che katumahlä. Mat häte che nichät amehen n'olhelhtshayaj, Dios itäfwnhatla amejen m'ak che lewoye yämlek letumlä.

₁₄Tä mälhyejtso, ipuhfwas tä oalehumnhay, lethanayhlä n'on'okhayaj tä õ'tiyej dios tä n'otkwey lhenhay. ₁₅Otahuy amejen, amel tä ahusey ihi, wet is che letetshanay m'ak tä ofwel amhohenna. ₁₆Che n'amel y'alhaihute Santa Cena, y'awo graciasayej Dios häp n'olhäthi tä y'ayähi. Wet che y'ayähi, y'alhayäm weihalhayejchä Cristo lew'oyis, wet che y'atuj pan tä y'ach'esajen, y'alhayäm weihalhayejchä lham t'isan. ₁₇Wet tej tä n'awujpe, mat n'ahäpehen t'isan weihalha, tsi häp tä y'atchufwiyejwek pan weihalha.

₁₈Lhek yahinya Judío lhayis. Tä lhamel tuj itshäwet tä õhp'o tä õyen n'okhayajayej Dios, lhamel lhayäm weihalhayejchä Dios tä tachumlä n'olänektso. ₁₉Mat chik otech'aynej täjtso häp n'on'okhayaj tä wichi iyhäj itiyej dios tä n'otkwey lhenhay, ¿atsi m'ak tä oyäme? ¿Hä oyok, Laha ihi diostso? ¡Kha! ¿Hä itshäwet tä õ'län, laha inu'pe itshäwet elh che häpe? ¡Kha! Khit'a täjtso m'ak tä oyäme. ₂₀Mat m'ak tä oyäme, häp wichi tä lecheyälis ihi, tä lhamel ilän itshäwet, lhamel n'okwiyejej ahät lhayis, tek n'okwiyejej Dios. Wet tek ot'uhläk alep'ajtayej ahät lhayis. ₂₁Lhek tetshan olhämet, lehanhiyejt'a lewoyneje che leyähi Lhawuk lhäthi, wet nech'e äp leyähi ahät lhayis lhäthi. Wok letatayphäwhäye Lhawuk laka Mesa, wet nech'e äp letatayphäwhäye ahät lhayis laka mesa. ₂₂¿Wok y'aläkwlhi Lhawuk yämlek lewäk nichätpe n'amel? ¿Hä y'afwetaj lhakhajyhayaj inu'pe häp Lhawuk?

₂₃Amel lhoyaykwe, “Nehit katsik n'äyej n'oho m'ak tä owoye. Olewuk t'at.”

Matche, mat iche m'ayhay tä owoye tä oisiyejt'a. Wet tej che olewuk m'ak tä owoye, iche m'ayhay tä nikhajyena n'oyej Lhawuk. ₂₄Yej t'ukwe m'ak tä am aisej, mat ukwe m'ak che aelh isej.

₂₅Tetshan olhämet. Che lechäj itshäwet tä tälhe lewos, yej wo atichunhayaja. Yej tay'ätshaneje m'ak at che häpe häp lewo tä hiw'en amho, mat tuj t'at. ₂₆Tsi Dios lhämet tä ihi Lehi yok, “Imälhewek honhat lhäy'e m'ak tä ihi, lewuk t'at häp Lhawuk.”

₂₇Che elh tä nit'ekhayaye Lhawuk, t'än ame ne'tek lehoye lew'et yämlek letachufwiyej tä tuj lhäk, che lehumin tä lehoye, is t'at. Mat yej wo atichunhayaja, tuj t'at m'ak tä hiw'en amho, wet yej tay'ätshaneje m'ak at che häpe. ₂₈Mat chik iche elh tä yok, “Häp itshäwetna pajche õyen n'okhayajayej dios tä n'otkwey lhenek”, oyok, yej tuj, tsi elat lelhaklit hin'otso wet lekänchi letichunhayaj. ₂₉Tä ofwel amhohen täja, kalelhäj tä oyäme m'ak tä elh letichunhayaj, oyämhiyet'a amel atichunhayaj. Tsi isit'ak m'ak tä letuj ikänchi elh letichunhayaj yämthilek iti amej ates. ₃₀Chik lewo graciasayej Dios häp m'ak tä letuj, isit'ak elh yen tesa amej m'ak tä letuj.

₃₁Tä mälhyejtso, olham oyok, M'ak at che häpe, wok m'ak tä letuj, wok leyäyej, wok m'ak tä lewoye, wuntej häp Dios. ₃₂Isit'ak lekänchi Judío lhayis letichunhayaj, wok wichi tä kahäpeya, wok Dios leles letichunhayaj. ₃₃M'ak tä olham owoye, ot'uhläk okäntejlhi wichi m'ak at che häpe. Ot'uhikwet'a m'ak che olham oisej, mat ot'ukwe m'ak che nilhokej iyhäj isej, yämlek ikatej lefwayhyaj.