1~Cor 11

₁Tenayn'o, mälhyej tä olham oten Cristo.

₂Wuj tä is tä amel letichunchepej m'ak tä owoye tä oihte amejen, lhäy'e tä letujlhache t'at m'ak tä ochufwente amejen.

₃Mat häte ot'uhläk lehanej tä hin'o lhetek häp Cristo, wet atsinha lhetek häp hin'o, wet Cristo lhetek häp Dios. ₄Tä mälhyejtso, che hin'o iwo lep'ota häp lhetek tä iwo t'alhyaja wok yen lhämeta m'ak tä häpe Dios laka Espíritu lhämet, hin'äfwlhat t'at häp elh tä häpe lham lhetek. ₅Mat häp atsinha, che niwoya lep'ota lhetek tä iwo t'alhyaja wok yen lhämeta Dios laka Espíritu lhämet, hin'äfwlhat t'at hin'o tä lech'efwa tä häpe lham lhetek. Tsi tet iwoyek lham atsinha häpe elh tä isatyenlhi lhetek. ₆Wet che atsinha niwoya lep'ota lhetek, tä mälhyejtso, is che isatyenlhi t'at lhetek. Mat che len'äfwlhi ihi atsinha che yisetche lew'ole wok isatyenlhi lhetek, tä mälhyejtso, is che iwo lhetekp'ota.

₇Mat häp hin'o isit'a che iwo lep'ota lhetek, tsi lham häpe t'at Dios lepeyak wet Dios lewujyaj n'äleji häp lham. Mat häp atsinha, hin'o lewujyaj tä n'äleji häp lham, ₈tsi hin'o tälhihot'a atsinha, mat atsinha häp tä tälho p'ante hin'o. ₉Wet häpkhit'a atsinha che tamenej tä Dios yenlhi hin'o, mat hin'o tä tamenej tä Dios yenlhi atsinha. ₁₀Wet täjtso, häp tä tamenej tä atsinha is che iti'pe lhetek lep'ot tä häpe letetnek tä hin'älit tä Dios iwahnej che iwo t'alhyaja lhäy'e che yen lhämeta m'ak tä Dios laka Espíritu lhämet, tä ihi tä ángeles tatache.

₁₁Mat lhek tetshan olhämet elh, oyok, Che newache atsinha, wet ihichet'a hin'o. Wet häp tä tet iwoye, che newache hin'o, wet ihichet'a atsinha. Tsi Dios letichunhayaj yämlek wak'alh täjtso, iwohiyet'ak newache hin'o lhäy'e atsinha. ₁₂Matche, tej tä Dios itälhtho p'ante hin'o häp atsinha tä lham yenlhi, mat häte y'ahanej tä hin'o tälho t'at atsinha lakachowej. Wet nilhokej tälhe t'at häp Dios.

₁₃Tetshan amel: ¿Hä t'uhawetej che atsinha niwoya lep'ota lhetek tä iwo t'alhyajaye Dios? ₁₄Lhek tichunache Dios lechumet tä iwoye tä yenlhi nilhokej m'ak tä ihi honhat. ¿Hä t'uhawetej hin'o che pites lew'ole? Kha. ₁₅Mat häp atsinha, che tach'anlhaye yämlek pites lew'ole, häp tä t'uhawetej. Tsi lewujyaj, wet Dios hiw'enho yämlek lhetekp'ot t'at.

₁₆Che iche elh che t'uhläk tatayhlä olhämetna, is che ihanej tä tej che olhamel wok Dios leles iyhäj, ihichet'a n'okey elh che w'enha lhamej.

_17-18Mat iche m'ak elh tä ofwel amhohen. Oyok, tä alehutpejwek tä ahäpehen Dios leles, isit'a m'ak tä lewoye, tsi tek aisej, mat n'älej tä aiwit'äyenpa. Tsi chunkat ohanch'oye tä tek alew'awlhatejchä atichunhayajay, wet oyenek matche. ₁₉Okachuhit'a, tsi täjtso häpkhilek kalelhäj iyhäj tä matche tä ihän Cristo. ₂₀Lhek yahinya, tä alehutpejwek wet letufway Santa Cena, mat tä niw'awulhahchä atichunhayajay, häpkhit'a m'ak tä matche. ₂₁Tsi elhpej ichunkat lham lhäk tä tuj, mat iyhäj nichuyuhen, wet iyhäj w'oknhas t'at. ₂₂Lhek yahinya, awukwey ihi che let'ekhen lhäy'e tä leyä tä lhehi. ¿Chipte tä lhen w'et m'ayeka Dios leles wet len'äfwlhathen iyhäj tä p'elitses? ¿Atsi m'ak che ofwel amhohen? ¿Hä oyok, is m'ak tä lewoye? ¡Kha, oyok, lhäy'e lhip tä ni'isa!

₂₃Tsi Lhawuk hiw'en n'oho lechufwenyaj tä ofwelte amhohen, häpe täja: Häp Lhawuk Jesús, häp honatsi p'ante tä õyachaj, tachuma pan ₂₄wet iwo graciasayej Dios, wet hich'esajen wet yok, “Häp täja ot'isan häpkhilek amel aisej. Woyayepej täja wet tichunaypej och'oye.” ₂₅Wet häte iwoye, tä lhamel ileyej tä t'ekhen, tachuma n'olhäthi wet iwo graciasayej Dios, wet yok, “Häp vinona häpe t'at ow'oyis tä yäm kalelhäj Dios lhämet tä hit'unteji m'ak tä inech'aynhi tä iwoye. Che leyäyayejpej, tichunaypej och'oye.”

₂₆Wet häp tä mälhyejtso, tä letufwaypej häp panna lhäy'e tä leyäyej vinona, len'älitaypej Lhawuk t'ilek, pajla'tha tapil.

₂₇Tä mälhyejtso, elh che tuj panna lhäy'e tä iyäyej vinona, mat kahäpeya len'okhayaj tä matche, lham letes ihi, tsi tatay'atlä Lhawuk t'isan lhäy'e lew'oyis. ₂₈Häp tä tamenej tä oyok, Elh tefwajpejni, tä kamaj nitufwa panna lhäy'e tä kamaj niyäyayej vinona, is che lhaitetshan che matche letichunhayaj. ₂₉Tsi che tuj wet äp iyäyej, mat nitäfwelayej tä häpe t'at Lhawuk t'isan, hätet iwoyek tuj wet iyäyej t'at lham letes tä Dios itihiyeja. ₃₀Häp tä tamenej tä wujpe amel tä anhayaj ihi wet laj akhajyhayaja, wet iyhäj ileyejen honhat. ₃₁Che y'alhaitetshanhen, Lhawuk itihit'a n'amejen letasnhayaj. ₃₂Mat tej tä iti n'amejen letasnhayaj, häpkhilek y'alhaichufwenhen wet tek y'atn'isiyeja honhat leles tä letes ihi.

₃₃Tä mälhyejtso, ipuhfwas, che alehutwek yämthilek letuj Santa Cena, tay amehen. ₃₄Mat che elh nichuyu, is che t'ek tä kamaj ihi lew'et, häpkhilek Dios aknena tesayej m'ak tä lewoye tä alehutpejwek.

Wet häp iyhäj m'ayhay otetshanhila che oho amehen.