N'otw'ayhtes tä häpe n'okhajyhayajay tä tälhe Espíritu tä Dios T'amajchet
1Ipuhfwas, ot'uhläk amel lehanej häpet n'okhajyhayajay tä häpe n'otw'ayhtes tä tälhe Espíritu tä Dios T'amajchet.
2Mälhyej tä lehanej, tä kamaj kachayaye Lhawuk õ'aiwetahatej dios lhayis tä hin'ol kwey lhenhay t'at. 3Häp tä tamenej tä ot'uhläk lehanej athana, tä elh chik häpe chik Dios laka Espíritu ihi wet yämyenlhi, ihanhiyejt'a chik takäpfwayeje lewit'äyhyaj Jesús. Häte ihichet'a elh chik ihanej chik yok, “Jesús häp Lhawuk”, tajlhamat chik Espíritu tä Dios T'amajchet ihi tä yämyenlhi.
4W'enhache lhamej n'okhajyhayajay tä y'akatej, mat tälhe t'at weihalha Espíritu tä hiw'en n'amhomche. 5Wet w'enhache lhamej lhachumtes tä y'atch'oteje Lhawuk, mat tälhe t'at weihalha Lhawuk tä y'atchumhoplhi. 6Häte w'enhache lhamej yämthilek y'ahanej y'awoyneje m'ak tä y'awoye, mat tälhe t'at weihalha Dios tä ichumyenlhi elhpej. 7Elh weihalhapej, Dios hiw'enho lakhajyhayaj tä t'awayhat tä tälhe Espíritu tä T'amajchet, yämthilek iyhäj isej t'at. 8Espíritu hiw'enho elh häp lhämet tä t'uhawetej yämthilek ihanej iwoyneje tä hich'otyeneje iyhäj. Wet Espíritu hiw'enho elh yämthilek hin'älte m'ak tä iyej iyhäj. 9Wet Espíritu hiw'enho elh häp lechayaj tä wuj, wet hiw'enho elh häp lakhajyhayaj yämthilek ichesthen t'inhayaj länhay. 10Elh yenlhi n'otetnhay tä iselkat wichi, elh iwo silätayej iyhäj m'ak tä Dios laka Espíritu ifwenhomche. Elh nitäfwelej m'ak tä tälhe Espíritutso wet äp nitäfwelej m'ak tä tälhe espíritu lhayis tä kamatachehen. Elh ihanej tä iwo n'olhämtesa tä nilätaye tä w'enhache lhamej, wet elh iläte n'olhämtestso wet yäme m'ak tä häpe. 11Mat nilhokej n'okhajyhayajayna, weihalha Espíritu tä lechumet, wet hiw'enho m'ak tä lham ihumnhatej elhpej.
Y'alhokej n'aweihalhahchä, mälhyej iwoye n'ot'isan
12Tä ohäpe hin'o, tej tä wujpe olhipey mat oweihalha t'at. Wet Cristo hätet iwoye, wok oyok, laka wichi. 13Tsi häp tä nilhokej n'amel, tej tä Judío lhayis wok wichi tä kahäpeya, wok n'okwenkay wok häp iyhäj tä kahäpeya, õn'aibautisaynhente yämthilek n'alhayen häpeya weihalhahchä, häp tä isej weihalha Espíritu. Wet y'alhokej õ'yäyen n'amejen m'ak tä tälho Espíritutso.
14Matche, wujpe olhipey mat oweihalha t'at tä ohäpe hin'o. 15¿Chiwoye chik opach'o yok, “Tä n'am häpe n'otkwey, ohäpkhit'a lhip hin'ona”? Kha, täjtso tamenhiyejt'a chik nem häpe olhip. 16¿Wok och'ote yok, “Tä n'am häpe n'ottelho, ohäpkhit'a lhip hin'ona”? Kha, täjtso tamenhiyejt'a chik nem häpe olhip. 17Tsi ¿chip iwoyek omälhewek tä ohäpe ottelho? Oyenek tek olätche honhat. ¿Wet chip iwoyek omälhewek tä ohäpe och'ote? Oyenek niwohit m'ak chik olätche lenij, tsi onhus ihihit'a. 18Mat Dios itihi elhpej olhip lew'et tä lham t'uhläk itihi. 19¡Chik omälhewek tä ohäpe lhip weihalha, oyenek ohin'ohit'a! 20Mat tej tä wujpe olhipey, mat oweihalha t'at.
21Wet häp tä mälhyej'attso, ottelho ihanhiyejt'a iwoyneje chik tahuyej otkwey wet yok, “Tek owat ahilä.” Wok olhetek tahuyej opach'ol wet yok, “Tek owat ahilähen.” 22Matkat olhipey tä tet iwoyek newache lakhajyhayaj, häp tä wuj tä oisej. 23Wet häp olhipey tä tet iwoyek oyen w'et m'ayeka, häp tä wuj tä ot'amajej wet owo lew'uya. Wet olhipey tä on'äfwelhpe, häp tä nem koyhyaj tä ot'uye. 24Tsi olhipey tä isis niwohit m'ak chik iwatlä, mat Dios yenlhin'o wet t'uye wet t'amajej olhipey tä lesilatyaj newayej, 25häpkhilek olhipey nittayawek mat elh weihalhapej yen tichunhayaja yämthilek tach'ote iyhäj. 26Chik iche lhip tä äytaj, nilhokej lhipey iyhäj tan'isej t'at, wuj tä äytaj. Wet chik iche lhip tä lakäjyaj ihi, nilhokej lhipey iyhäj lhamtej lakäjyaj ihi.
27Wet häp tä mälhyej'attso, amel ahäpehen t'at Cristo t'isan, wet elh weihalhapej amel ahäpe t'at lham lhip. 28Wet Dios itihi lew'etes lhamel tä häpe leles: Ichunkat apóstoles, wok oyok, Dios kachenhay tä lhamenya. Wet iche iyhäj tä nech'e häpe profetas, wok oyok, lhamel tä iwo silätayej iyhäj m'ak tä Dios laka Espíritu ifwenhomche. Wet iche iyhäj tä nech'e häpe n'ochufwenyajwos. Wet iyhäj yenlhi n'otetnhay tä iselkat wichi, wet iyhäj ichesthen t'inhayaj länhay, wet iyhäj ihanej tä tach'ote Dios leles, wet iyhäj lhayen lewosayej Dios lechumet, wet iyhäj iwo n'olhämtesa tä nilätaye tä w'enhahiche.
29Tä mälhyejtso, y'aw'en tä nilhokhiyejt'a tä häpe apóstoles, nilhokhiyejt'a tä häpe profetas, wet nilhokhiyejt'a tä häpe n'ochufwenyajwos, wok yenlhi n'otetnhay tä iselkat wichi, 30wok lakhajyhayaj ihi yämthilek ichesthen t'inhayaj länhay, wok iwo n'olhämtesa tä nilätaye tä w'enhahiche, wok iläte n'olhämtestso wet yäme m'ak tä häpe. 31Amel is chik lewo yiya n'okhajyhayajay tä lhäy'e lhip tä laha ihi.
N'ohumnhayaj
Olham opäyenhila amehen m'ak tä lhäy'e lhip tä is.
