1~Cor 14

₁Tä mälhyejtso, woyay yiya yämthilek i'amejen n'ohumnhayaj, wet äp let'isej tä lehuminaych'oye n'okhajyhayajay tä tälhe Dios laka Espíritu. Wet häp n'okhajyhayaj tä lhäy'e lhip tä is chik lehuminaych'oye, häpe t'at profeta lechumet, yämthilek ahäpehen iyhäj tä iwo silätayej iyhäj m'ak tä Dios laka Espíritu ifwenhomche.

₂Oyok, elh chik häpe chik yämlhi wet lhämtes häpe n'olhämet tä w'enha lhamej tä tälhe Dios laka Espíritu, kalelhäj tä lham yämhoplhi häp Dios, häpkhit'a wichi tä yämhoplhi, tsi niwohit elh chik ihanej lhämet lhäy'e m'ak tä yäme. Häp m'ak tä yäme tälhe t'at Dios laka Espíritu, mat nehit katsik ihanej. ₃Mat häp elh tä iwo silätayej iyhäj m'ak tä Dios laka Espíritu ifwenhomche, ichihelit m'ak tä lhamel lehusey isej, wet inityenejen lhamel wet ikhajyenhen. ₄Tä mälhyejtso, elh tä lhämet w'enha lhamej tä tälhe Dios laka Espíritu, lham t'at tä ichihelit lhamej. Mat elh tä iwo silätayej iyhäj m'ak tä Dios laka Espíritu ifwenho lhamel, ichiheltej Dios leles.

₅Olham ohuminche chik nilhokej amel lewo ämtesa tä w'enhache lhamej tä tälhe Dios laka Espíritu. Mat lhäy'e lhip tä ohuminche chik ahäpehen iyhäj tä iwo silätayej iyhäj häp m'ak tä Dios laka Espíritu ifwenhomche. Tsi elh tä iwo silätayej wichi m'ak tä Espíritu ifwenho lhamel, laha inu'pe elh tä lhämet w'enha lhamej tä tälhe Dios laka Espíritu, chik newache elh tä ihanej m'ak tä yäme wet ifwenho iyhäj yämthilek lehusey isej.

₆Ipuhfwas, chik olham oho amehen wet olhämet w'enha lhamej tä tälhe Dios laka Espíritu, niwohit m'ak chik aisej tsi tek otäfwnhat amejen m'ak tä Dios ipäyen n'oye, wok m'ak tä ohanyaj, wok n'am wo siläta amejen m'ak tä Espíritu ifwel n'oho, wok n'am chufwen amejen lham lhämet. ₇Lhek tetshan flauta wok arpa wok instrumento chik häpe. Chik niw'enhayache lhamej lechos, kalelhäjit'a música tä häpe. ₈Wok häp n'ofwol tä trompeta, chik nikalelhäja lechos tä häpe, ¿atsihilak lhaiwaklhatej yämthilek tiyäjo n'oka'tshayaj? Ihichet'a. ₉Wet häp tä mälhyej'attso amel, chik kachumyenalhi ämet tä aiyhäj nitäfwelche, ¿chip iwoye chik ihanej m'ak tä lhäme? ¡Laha ihihit'a ämet!

₁₀Iche wujpey n'olhämtes tä ihonhatena, wet iche t'at m'ak tä yäme. ₁₁Mat chik n'am hanej m'ak tä n'olhämet tä w'enha lhamej yäme, oelh tä tahuy n'oyej häpe t'at elh tä w'enha lhamej, wet äp olham häte ohäpe hin'o tä w'enha lhamej. ₁₂Tä mälhyejtso, tä amel lewatayhlä häp n'okhajyhayajay tä tälhe Dios laka Espíritu, wo yiya yämthilek wuj tä i'amejen n'okhajyhayajay tä ichihelthen Dios leles.

₁₃Tä mälhyejtso, elh chik häpe chik ikatej n'olhämet tä w'enha lhamej tä tälhe Dios laka Espíritu, is chik t'alhe Dios yämthilek itäfwnhatej m'ak tä yäme, häpkhilek lham ihanej iwoyneje wet y'ithatho Dios leles. ₁₄Chik olhämet w'enha lhamej tä owo ot'alhyaja, ohusek tä iwo t'alhyaja, ohanhiyejt'a m'ak tä oyäme. ₁₅Tä mälhyejtso, ¿atsi m'ak tä owoye? Oyok, is chik ohusek iwo t'alhyaja, wet häte is chik owo ot'alhyaja mat owoye olhämtes tä iyhäj ihanej. Wet is chik ohusek ichoylhi, wet häte is chik ochoylhi mat owoye olhämtes tä iyhäj ihanej. ₁₆Tsi chik ts'ilak ahusek tä lewunit Dios, wet iche elh tä niwuja tä ihanej Dios lhämet, ¿chip iwoyek yohlak, “Amén”, tä nhanayej m'ak tä lhäme? ₁₇Is, matche tä is tä lewo aka graciasa tä mälhyejtso, mat tach'othiyet'a aelh lehusek. ₁₈Ow'enho gracias Dios tä olham onu'pe nilhokej amel tä ipej n'oyej olhämtes tä w'enhache lhamej tä tälhe lham laka Espíritu. ₁₉Mat m'ak tä owoye, chik oiyej Dios leles tä lhaihutwek, tej chik cincofwas olhämtes tä owoye mat häpe m'ak tä tälho ohanyaj yämthilek lhaichufwenejen, häp tä is. Mat laha ihihit'a chik owoye wujpey olhämtes tä w'enhache lhamej.

₂₀Ipuhfwas, chik lhen atichunhayaja m'ayhayna, yej aletech'aynej nä'tshas. Häp m'ak chik ni'isa, häp tä atech'aynej nä'tshas, mat a'enay häpeya iyhäj tä thänhäy chik lhen atichunhayaja m'ayhayna. ₂₁Häp N'olesaynek p'ante yok:

₂₂Tä mälhyejtso, wichi tä kachuhantses häp tä tamenej tä n'äl n'otetnek tä häpe n'olhämtes tä w'enhache lhamej tä tälhe Dios laka Espíritu, häpkhit'a Dios leles tä tamenej. Mat häp Dios leles, häp tä tamenej tä n'äl iyhäj tä iwo silätayej iyhäj m'ak tä Dios laka Espíritu ifwenhomche, häpkhit'a kachuhantses.

₂₃Wet häp tä mälhyejtso, chik amel alehutwek wet nilhokej w'enhache lhamej ämtes tä lhämwethä tä tälhe Dios laka Espíritu, wet chik nämhen iyhäj tä wujit'a tä lehanyaj ihi wok häpe iyhäj tä kachuhantses, lhamel yämla amehen wet yok, “Ch'isukis t'at.” ₂₄Mat chik nilhokej amel lewo siläta amejen m'ak tä Dios laka Espíritu ifwel amhomche, wet chik näm elh tä wujit'a tä lehanyaj ihi wok häpe elh tä kachuhantsaj, lham itetshanhila lhamej m'ak tä iläte tä lhenay ämeta, wet nitäfwenhila lhamej tä lech'isukyaj ihi. ₂₅Chik mälhyejtso, n'änhila'pe m'ak tä lhamya tä ihi lehusek, wet takhoslachufwi häp Dios wet n'okwiyej, wet häte yämhiyela tä matche tä Dios i'amejen.

₂₆Tä mälhyejtso, ipuhfwas, ¿atsi m'ak tä y'awoye? Oyok, tä alehutpejwek, is t'at tä iche elh tä iten lhatenek elh chik häpe, wet elh ichäj lechufwenyaj tä häpe Dios lhämet, wet elh iwo silätayej iyhäj m'ak tä Dios hin'ältej, wet elh lhämtes w'enhache lhamej tä yämlhi tä tälhe Dios laka Espíritu, wet elh ihanej n'olhämtesna wet yäme m'ak tä häpe. Mat oyok, tä lewoye nilhokej tähestso, is tä häpe t'at m'ak tä ichihelit m'ak tä ihi Dios leles lehusey. ₂₇Wet chik iche iyhäj tä lhämtes w'enhache lhamej tä t'uhläk yämwethä, oyok, is t'at, mat is chik tajlhama dos wok tres chik yämwethä. Wet chunkat elh tä yämlhi, chik ileyej wet nech'e äp häpe elh, wet chik äp ileyej nech'e häpe elh tä ilepese. Häte is chik iche elh tä ihanej n'olhämtestso, häpkhilek ifwenho iyhäj häp m'ak tä häpe. ₂₈Mat chik newache elh chik ihanej n'olhämtestso, is chik nämawethä iyhäj tä lhämtes w'enhache lhamej, mat is chik iti lhamhi lhämet tä yämhoplhi häp Dios.

₂₉Häte chik iche iyhäj tä iwatläk iwo silätayej iyhäj m'ak tä Dios laka Espíritu ifwenho lhamel, is chik dos wok tres tä yämwethä, wet iyhäj is chik itetshan m'ak tä lhamel yäme. ₃₀Mat chik iche m'ak chik Dios hin'ältej elh tä tatayphä tä iyej iyhäj, is chik elh tä ichun tä yämlhi ileyej, tach'anlhaye elh tä yämlhi. ₃₁Chik mälhyejtso, häpkhilek elhpej ihi t'at laka turno, wet iwo silätayej iyhäj m'ak tä Dios laka Espíritu ifwenhomche, yämthilek nilhokej lhaichufwenejen wet lhaikhajyenejen. ₃₂Häp elh tä iwo silätayej iyhäj Dios laka Espíritu lhämet, is chik t'amajej lhämet tä yämlhi. ₃₃Tsi Dios häpe Dios tä n'otamsek, tek t'uhläk nikalelhäja m'ak tä leles iwoye.

Mälhyej tä nilhokej Dios leles iwoye tä lhaihutpejwek, ₃₄atsinhay is chik yok tam, tsi õ'wahnhiyejt'a chik yämwethä. Is chik ichufwi hin'ol len'ohyaj, mälhyej tä N'olesaynek p'ante yäme. ₃₅Chik iche m'ak chik t'uhläk ihanej, is chik tay'ätshaneje lech'efwa chik lhamel ihi lew'et. Tsi isit'a chik atsinha yämlhi tä Dios leles lhaihutwekhen.

₃₆Is chik lehanej tä tek amel chik tälh amehen Dios lhämet tä iwo tesa, wet häte ts'ilakhit'a amel tä letachumlä. ₃₇Chik iche elh tä yäme tä Dios laka Espíritu tä yämyenlhi, wok yäm lhame tä häpe elh tä iwo silätayej wichi m'ak tä Dios laka Espíritu ifwenhomche, is chik ihanej tä m'ak tä olesayenna Lhawuk lhämet t'at. ₃₈Mat chik yok, “Mathichet'a”, häte is chik wichi ikachuye häp lham.

₃₉Ipuhfwas, is chik ahäpehen profetas, is chik lehanej chik lewo siläta amejen m'ak tä Dios laka Espíritu ifwel amhomche. Wo yiya n'okhajyhayajna tä n'otw'ayhat tä tälhe Dios laka Espíritu. Wet yej n'äyejo häp iyhäj tä lhämtes w'enhache lhamej tä yämwethä. ₄₀Mat is chik let'amajej nilhokej m'ak tä lewoye wet lhäm is alhoho.