Pablo inityenej Dios leles tä ihi Corinto chik iwo t'awayhata Dios yämlek iyhäj tä ihi Judea isej
1Oyäme ayej chinaj t'äj tä is chik lehutwek yämlek lech'otyeneje Dios leles tä ihi Judea. Oyok, is chik lewoyaye mälhyej m'ak tä one'tek Dios laka wichi tä ihi Galacia iwoye. 2Häp domingopej is chik nilhokej amel elh weihalhapej hiw'enhat lhip häp m'ak tä ikalhi tä lechumet laha, wet t'amajej häpkhilek wak'alh chik oho amehen. 3Wet chik onchät amehen, ochenhiyela Jerusalén häp hin'ol chik amel letshupyene yämlek ichäj n'otw'ayhtes. Wet ow'enhihola lhamel cartas yämlek Dios laka wichi tä ihi Jerusalén ihanej tä lhamel häpehen Lhawuk leles lhäy'e tä ichäj m'ak tä tälh amehen. 4Wet chik is t'at chik olhamtej oyikhila, lhamel nekhila n'okwe.
Pablo iwaklhat lew'ekyaj tä fwetaj iwohiyela
5Ofwel amhohen tä onuhikwela Macedonia, wet chik otälhe, ohohiyeja atapehen. 6Elat oi'amejen iyhäj ifwalas, wok elat imälhewek lewhäy tä fwiy'etil, wet häpkhilek amel letach'otay n'oye chik ohoye lhip chik häpe chik oyik hach'oyehen. 7Tsi ohuminhit'a chik oho amehen athana, tsi chik mälhyejtso, pitajit'ala lewhäy chik oi'amejen. Mat ot'uhläk pitaj t'at chik oi'amejen, chik Lhawuk iwahin n'oyej. 8Athana oihihila ayej Éfeso pajla'tha nichäte n'okäjyaj tä Pentecostés. 9Tsi matche tä Lhawuk ifwoyenche n'oho lepe yämlek wuj tä okalhi lechumet wet wichi isej, tej tä iche wujpe lhamel tä tatay n'ohlä.
10Chik nichät amehen Timoteo, is chik let'amajayej häpkhilek newache lenowayhyaj chik lham i'amejen. Tsi tach'ote t'at Lhawuk lechumet, mälhyej iwoye olham. 11Isit'ak elh chik häpe yen w'et m'ayeka. Mat ch'otaye yämlek tujlhache lew'ekyaj wet letamsek ihi, häpkhilek tapil n'oye. Tsi wuj tä onihihlä, lhäy'e iyhäj lhapuhfwas.
12Wet häp lhapuhfwa Apolos, wuj tä olhaip'altsene chik yikche lhapuhfwas tä t'isiyakay amehen. Mat yäm kalelhäj tä yok, “Oyikhit'a ayej.” Chik paj chik len'äyij ihi, ihohiyela amel.
Pablo len'okhayajay tä lepes
13Ipuhfwas, yej tekm'ahatwethä. At'untejiche achayaj, a'enay hin'ola, akhajyenhen. 14Wet m'ak at chik häpe chik lewoye, ísej ahumnhayaj tä letiyej aiyhäj.
15Ipuhfwas, amel lehanej häp Estéfanas lhäy'e lew'et lheley, lhamel häpehen honhat tä Acaya lheley tä ichunte tä iwo lehusey iyhäja, wet lhamel wuj tä tach'otehen häp Dios leles iyhäj. 16Olhaip'altsen amehen chik alep'ajtayej häp iyhäj tä mälhyejenna, lhäy'e elh chik häpe tä tachumlhi wet tach'ote Dios lechumet.
17Okäjyaj ihi tä ihonaj n'oye Estéfanas lhäy'e Fortunato lhäy'e Acaico. Tsi tä amel lekalhihit'a tä lheyay n'oyej, 18mat lhamel nämhen wet ikhajyen ohusek, mälhyej iwoye tä ikhajyenhen amel ahusey. Häp wichi tä mälhyejenna, yej lhenay w'et m'ayhaya.
19Häp Dios leles tä ihi Asia ichen amehen len'okhayaj. Aquila lhäy'e Prisca, lhäy'e Dios leles tä lhaihuthipejwek lhamel lew'et, häte ithat amehen wuj len'okhayaj tä alepuhfwaswekej Lhawuk.
20Nilhokej lhapuhfwas ichen amehen len'okhayaj. N'okwi amejen, tsufwel amejen tä lhen atetneka tä ahäpehen Dios leles.
21Olham Pablo olesayen olhämtes tä on'okhayajna tä ilepese.
22Chik iche elh tä nhumina Lhawuk, is chik lewit'äyhyaj nichätpe.
¡Iwuk, oyok, Lhuu!
23Is chik Lhawuk Jesucristo lep'altsenyaj i'amejen. 24Ohumnhayaj i'amejen nilhokej amel tä y'ap'akej Cristo Jesús.
