1~Cor 3

₁Ipuhfwas, olham tek okalhihte chik oyämlhi amhohen mälhyej iwoye wichi tä Dios laka Espíritu lechufwenhay. Tsi ahäpehen t'at wichi tä t'ittshanyaj tälhe t'at honhat, wet achayaj tä letiyej Cristo hätet iwoye nä'tshas chayaj, wak'alhit'a. ₂Wet ochufwente amejen n'ochufwenyaj tä ni'thaya, hätet iwoye han'äfwaj tä lako hiw'enho lakat'os, häp lhäk tä isathi, tsi kamaj tek lehanejte chik letuj äk tä t'un. Wet athana kamaj lehanhiyejt'a lewoyneje, ₃tsi kamaj it amejen m'ak tä pajche i'amejen tä ahäpehen honhat leles. Tsi aschenyajay lhäy'e tä letataywek, häp tä hin'älit tä kamaj lelehiyejt'a anech'ethayajay tä ahin'ol t'at, mälhyej tä honhat leles iwoye. ₄Tsi tä elh yok, “Olham ohän Pablo”, wet elh yok, “Ohän Apolos”, täjtso häpe t'at tä kamaj lhehi t'at anech'ethayajay.

₅Mat oyok, ¿atsi tä häpe Apolos, wet atsi tä häpe Pablo? Tajlhama ohäpehen n'okawos t'at, wet häp tä aisej olhamel wet lechayaye t'at Lhawuk. Elhpej olhamel oyenlhi ochumet tä Lhawuk itshupyenej n'oyehen: ₆olham, hätet iwoye tä otutchey, wet Apolos tä itsäype inät, mat Elh tä ichihelit yachuyaj häpe t'at Dios. ₇Tä mälhyejtso, elh tä tutchey lhäy'e elh tä itsäype inät, niwohit m'ak chik tälhe, tsi Dios lham t'at tä ichihelit yachuyaj. ₈Wet häp elh tä tutchey lhäy'e elh tä itsäype inät, ihichet'a elh tä lewujyaj ihi. Elh tefwajpejni lhamel Dios tisila'pe lechumet tä iwoye. ₉Wet olham Pablo lhäy'e ot'unfwas, olhalech'otfwaswekej ochumet tä otch'ote Dios. Wet amel ahäpehen yachuyajw'et tä lham yenlhi, wok oyok, häp hup tä yenlhi. ₁₀Wet olham tä Dios lep'altsenekn'o, yenn'o häpeya lewo tä lhamya yämthilek oyenlhi lefwetes, wet elh hin'o iti'pe olhenek häp m'ak tä yenlhi. Mat elh tefwajpejni is tä itetshan lhenek tä yenlhi tä iti'pe. ₁₁Nehit katsik ihanej iwoyneje chik yenlhi lefwetes elh, tsi pajche wak'alh lefwetes tä häpe t'at Jesucristo. ₁₂Wet i'pe lefwetesna, elh chik häpe ihanej chik iti'pe lhenek tä yenejlhi oro, wok plata, wok tuntey tä isis, wok hal'äy, wok hup, wok ilaj. ₁₃Mat elhpej n'änhila lechumet häp Ifwala tä N'okalelhthayaj, tsi Ifwalatso nämla itäj häpkhilek yelhte n'olhenek tä elhpej yenlhi. ₁₄Wet elh chik häpe chik itäj nikalhahi tä hip'o hup tä yenlhi, ikathiyeja lakaha. ₁₅Mat chik lhenek y'ohila, tatäyhla nilhokej wet lajit lahaya. Mat lham tafwayhla, mat itäj lhämtsekla t'at.

₁₆¿Hä tek lehanayej tä ahäpehen Dios Lew'et, wet lham laka Espíritu i'amhiche? ₁₇Elh chik häpe chik iwasthi Dios Lew'et, lhamlak Dios iwasthi. Tsi Dios Lew'et häpe t'at t'amajchet, wet Lew'ettso häpe t'at amel.

₁₈Yej kan amejen. Chik elh amel yäm lhame tä häpe elh tä ihan m'akej, mälhyej tä honhat leles yäm lhamehen, is chik lhaitech'aynej elh tä nhana m'akej. Wet chik mälhyejtso, häpkhilek häpe elh tä matche tä ihan m'akej. ₁₉Tsi n'ohanyaj tä ihonhatena Dios yen häpeya m'ak tä lajit lahaya. Wet häp tä Dios lhämet tä ihi Lehi yok:

₂₁Tä mälhyejtso, yej alechäjejlhi hin'o chik häpe. Tsi nilhokej m'ayhay alewuhuy t'at, ₂₂tej chik häpe olham Pablo, wok Apolos, wok Pedro, wok häp honhat lhäy'e pule, wok n'ow'atshancheyaj, wok n'ot'ilek, wok häp ifwalasna, wok häp lewhäy tä tatay alhoho. Nilhokej m'ayhay alewuhuy t'at, ₂₃wet amel Awuk Cristo, wet Cristo Lewuk häp Dios.