M'ak tä is chik iyhäj tä lhalech'efwas iwoyej lhamehen
1Athana otetshan m'ayhay tä letay'ätshanayej n'oye tä lechennaj n'oye aka carta.
Oyok, is t'at chik hin'o newayej atsinha. 2Mat lhek yahinya, tä wuj n'okain'oyaj tä i'pe honhat, oyok, häte is t'at chik hin'o iwo lech'efwaya wet yäm tefwajni lech'efwa, wet atsinha is t'at chik iwo lech'efwaya wet yäm tefwajni lech'efwa. 3Wet nech'e hin'o lhäy'e lech'efwa is tä iwoyej lhamehen m'ak tä t'uhawetej tä lhalech'efwas. 4Tsi atsinha tä lech'efwa ihi, lhamhit'ak lewuk t'isan, mat lewuk hin'o tä lech'efwa. Wet hin'o tä lech'efwa ihi, lhamhit'ak lewuk t'isan, mat lewuk atsinha tä lech'efwa. 5Tä mälhyejtso, yej alefwonlä hach'efwa, tajlhama chik iche lewhäy tä am lhäy'e hach'efwa let'ajayejwek atichunhayaj tä lhok, “Isit'ak achuyaj n'oye, lhäy'e olham, pajla'tha ifwalas iyhäj, tsi is chik y'awo lhat'alhyaja.” Mat chik kahäpeya täjtso, yej alefwonwek. Wet chik tajyäme lewhäytso, achajo tä leti amejen achuyaj, mälhyej tä t'uhawetej iyhäj tä lhalech'efwas. Tsi elat chik katuma ahilä, Satanás yelhat amehen wet aichätyenho asukyaj.
6Häp täja olhämet tä ofwel amhohen, mat hätet iwoyek op'altsenyaj t'at, häpkhit'a n'olhämet tä lhamya. 7Ohumin chik nilhokej wichi hätet iwoye olham. Mat w'enhache lhamej m'ak tä Dios hiw'enhomche, elhpej iwo lech'efwaya, elhpej niwoya lech'efwaya.
8Wet häp amel tä laj hach'efwasa, lhäy'e tesalis, oyok, is chik letujlhache t'at tä laj hach'efwasa, hätet iwoye olham. 9Mat chik katumahlä asan lenech'ethayaj, is t'at chik letawhayey. Tsi wuj tä is chik elh lech'efwa ihi wet lhaknilänayej letichunhayajay.
10Wet häp amel tä pajche hach'efwas ihi, ow'en amhohen Lhawuk lhämetna, olhamhit'ak olhämet. Yok, atsinha, yej leyej hach'efwa. 11Mat chik leleyej t'at, yej wo elha hach'efwa, wok lhäple hach'efwa. Wet häp hin'o hätet iwoye, oyok, yej wom hach'efwa.
12Häp iyhäj ofwel amhohen olham olhämet, häpkhit'a Lhawuk lhämet. Oyok, chik iche hin'o tä t'ekhaye Lhawuk, mat lech'efwa häpe atsinha tä nit'ekhayaye Lhawuk, mat ihumin chik iyej t'at hin'o, isit'ak hin'otso iwom lech'efwa. 13Wet chik äp häpe atsinha tä t'ekhaye Lhawuk, mat hin'o tä lech'efwa nit'ekhayaye Lhawuk, mat ihumin chik iyej t'at atsinha, isit'ak atsinhatso iwom lech'efwa. 14Tsi hin'o tä laj t'ekhahyaja isej lech'efwa tä Lhawuk leles elh, wet nech'e hin'otso häpe Dios t'amajchet. Wet atsinha tä laj t'ekhahyaja isej lech'efwa tä Lhawuk leles elh, wet nech'e atsinhatso häpe Dios t'amajchet. Chik nimälhhiyejtso, leles häpehen iyhäj tä kok'aye. Mat athana häpehen Dios t'amajchetes.
15Mat chik hin'o tä nit'ekhayaye Lhawuk, wok atsinha tä nit'ekhayaye Lhawuk, t'uhläk ileyej lech'efwa tä häpe elh tä Lhawuk leles elh, ch'anlhaye t'at. Chik mälhyejtso, hin'o tä t'ekhaye Lhawuk, wok atsinha tä t'ekhaye Lhawuk, nech'e häpe elh tä nemhit wo m'ak chik nahayej wet letamsek ihi, tsi Dios t'än n'amehen yämlek lhatamsekis ihi. 16Tsi am tä ahäpe atsinha, kalelhäjit'a chik lefwayhthila hach'efwa. Wok tä ahäpe hin'o, kalelhäjit'a chik lefwayhthila hach'efwa.
Elh weihalhapej, m'ak tä häpe tä Dios t'äne p'ante, is chik kamaj häpe t'at
17Tej tä mälhyejtso olhämet, mat ofwenho iyhäj amel, oyok, Is chik elh weihalhapej iwoye mälhyej m'ak tä Dios itshupyeneje, wok oyok, m'ak tä häpe lham tä Dios t'äne p'ante. Häp täja m'ak tä one'tek Dios leles tä ihi lhip chik häpe iwoye. 18Chik Dios t'äne elh tä pajche n'otetnek tä n'olhijtsek iyej, is tä kamaj häpe t'at täjtso. Wet chik äp t'äne elh tä kamaj n'olhijtsektso newayej, isit'ak t'ukwe n'otetnektso. 19Tsi m'ak tä laha ihi häpkhit'a chik n'otetnek iyej elh wok newayej, mat häpe t'at tä elh iwoye Dios lhämtes tä ne'tek iwoye. 20Oyok, elh weihalhapej, m'ak tä häpe tä Dios t'äne p'ante, is chik kamaj häpe t'at. 21Chik ahäpe n'okwenek tä Dios t'än p'ante ame, is t'at, yej lhen alhakliya tä ahäpe n'okwenek. Mat chik chejphä awuk ile amej tä ayen kweneka, wo kotsayej. 22Tsi elh tä Lhawuk t'äne p'ante tä häpe n'okwenek, nech'e hätet iwoyek nem häpe n'okwenek, häp tä Lhawuk ilanhi. Wet häp tä hätet iwoye, elh tä Lhawuk t'äne p'ante tä kan'okweneka, nech'e häpe t'at Cristo kwenek. 23Dios iwo lahaya tä tiskan atapehen. Yej tach'anlhaye chik hin'ol ayen kwenkaya.
24Häp tä mälhyejtso, ipuhfwas, m'ak tä ahäpe aelhpej tä Lhawuk t'än p'ante amehen, tujlhache t'at.
Pablo yäme iyhäj tä niwoya lech'efwasa, lhäy'e tesalis
25Häp amel tä kawoya hach'efwasa, Lhawuk ipäyenhit'a n'oye lhämet chik ne'tek otshupyenej amehen. Mat ofwel amhohen olham otichunhayaj tä ohäpe elh tä wichi t'ekhayej n'oye och'otyaj, häp tä oisej lep'altsenyaj tä Lhawuk iti n'oyej. 26Oyok, tä y'aw'en tä wuj tä atha lhan'äyij ifwalasna, wet häp tä oyenek isit'a chik hin'o lhaiyatchenlhi. 27Chik atsinha i'amej, yej leyej. Wok chik atsinha newa amej, yej t'ukwe. 28Mat chik letawhayey, tek asukyaj, wet chik atsina tawhayey, tek lesukyaj. Mat lhamel tä tawhayeyhen, wujla'pe m'ayhay tä niwoya letamseka, wet häp täjtso tä onowayhtej ahilähen.
29Ipuhfwas, häp m'ak tä ofwel amhohen, oyok, Tatäy lhimphaj wet noj t'at lewhäy. Tä mälhyejtso, amel tä ahin'ol tä hach'efwas ihi, isit'ak alenahhathi hach'efwas. 30Häp amel tä afwyhayaj ihi, is chik mälhyej at chik lhehi akäjyaj, wet amel tä lewo akäjyaja, is chik mälhyej at chik afwyhayaj ihi. Häp amel tä lechäjpej m'ayhay, is chik mälhyej at chik niwohit m'ak chik alewuk, 31wet amel tä lewo kotsayej tä lehut amejen m'ak tä ihonhatena, is chik mälhyej at chik niwohit m'ak chik lekalhi. Tsi honhat tä y'ehina nofwila.
32Ohumin chik newache m'ak at chik häpe chik lhenay atichunhayaja. Häp hin'o tä laj lech'efwaya yenpej letichunhayaja m'ayhay tä iyej Lhawuk, yämthilek ikänitlhi. 33Mat hin'o tä lech'efwa ihi yenpej letichunhayaja m'ayhay tä ihonhatena, yämthilek ikänitlhi lech'efwa, 34wet mälhyejtso, nitäkwchä letichunhayajay. Wet häp tä hätet iwoye, atsinha tä thaläkw tä laj lech'efwaya, lhäy'e elh tä lhutsha tä kamaj newayej hin'o, lhamel yenpej letichunhayaja m'ayhay tä iyej Lhawuk, yämthilek lhayen Dios t'amajchetesayej t'isan lhäy'e lehusek. Mat häp atsinha tä lech'efwa ihi, lham yenpej letichunhayaja m'ayhay tä ihonhatena, yämthilek ikänitlhi lech'efwa.
35Tä ofwel amhohen m'ayhayna, häpkhit'ak hätet iwoyek onuhtejlä m'ak tä lewoyaye, mat häpkhilek amel aisej wet lewoyaye m'ak tä t'uhawetej, wet nehichet m'ak chik ainahhatlhi tä letach'ote Lhawuk. 36Mat chik iche hin'o tä yen laka isa atsinha lhutsha, mat nowaye chik nitumahlä t'isan lenech'ethayajay, wet nowaye chik iwoye m'ak tä nit'uhawetayej, oyok, is t'at chik yen ch'efwaya laka is, tsi tek lesukyaj täjtso. 37Mat chik iche hin'o tä yok, “Tej tä oka is ihi, mat oyenhit'ala och'efwaya”, wet kalelhäj t'at lehusek, wet newache elh tä inityenej m'ak chik iwoye, wet tumlä lenech'ethayajay, oyok, is t'at letichunhayaj, is tä ileyej lhutshatso.
38Tä mälhyejtso, hin'o chik tawhayey, is t'at m'ak tä iwoye. Wet elh chik nit'uyahläk tawhayey, lhäy'e lhip tä is.
39Häp atsinha tä lech'efwa ihi, ley yäytej lech'efwa tä kamaj lham hin'o iläy. Mat chik hin'o ileyej honhat, atsinha nemhit lewuk ihi. Wet chik ihumin chik yen ch'efwaya hin'o elh, is t'at, mat is tä häpe elh tä t'ekhaye Lhawuk. 40Mat oyok, lhäy'e lhip tä is chik nachajaho tä iwo lech'efwaya.
Eh ipuhfwas, häp täja otichunhayaj, wet oyenek häte olham Dios laka Espíritu in'oyej.
