1~Juan 1

₁Ipuhfwas, olhamel ochen amehen olhämetna tä oyämeje m'ak tä häpe Dios lhämet tä n'ow'atshancheyaj. Häp Dios lhämettso pajche tä iche, tälhe tä nech'enyaya. Häpe t'at m'ak tä olhamel olätehte lhäy'e tä ottelhoy hiw'ente. Matche, olhamel otetshante wet otsokejte'pe otkwech'ol. ₂Tsi n'ow'atshancheyajna lhain'älit, wet mälhyej tä oyämena, olhamel ow'ente. Wet nech'e oyen lhämeta wet owo siläta amejen tä häpe t'at n'ow'atshancheyaj tä t'un. Pajche iyej Lhajcha wet tä paj lhain'älitte n'oyejen.

₃Wet olhamel oyachajo tä oyok, häp tä owo siläta amejen häp m'ak tä ow'ente lhäy'e tä olätehte, yämthilek amel alep'ajtitay n'oyejen, mälhyej tä olhamel op'akej Dios Lhajcha lhäy'e Lhäs Jesucristo. ₄Wet olhamel otihi olesaynekna tä ochen amehen yämthilek matche tä lhakäjyaj ihi wet nittäya lhip.

₅Häp täja Dios silätyaj tä Jesucristo ichufwen n'oyejen wet olhamel owo siläta amejen, tä Dios häpe isi wet newache honataj chik ihi. ₆Chik y'afwetaj y'ap'akej häp lham, mat n'äl tä kamaj y'ehi t'at honataj, w'et y'äm'atwethä wet y'awohiyet'a m'ak tä matche. ₇Mat chik y'ehi häp isi mälhyej tä Dios ihi t'at isi, wet nech'e y'ap'ak n'amejen wet Lhäs Jesucristo lew'oyis ilej n'amejen nilhokej lhasukyajay.

₈Chik y'afwetaj newa n'amejen lhasukyajay, y'atkan n'amejen wet m'ak tä matche newa n'amhihen. ₉Mat chik y'alhaifwelejo Dios lhasukyajay, y'ahanej tä kalelhäj tä lham häpe Elh tä iwohiyela m'ak tä is alhoho. Itäyhthila n'amejen lhasukyajay wet ilejla n'amejen nilhokej m'ak tä ni'isachehen. ₁₀Mat chik y'afwetaj newache lhasukyaj chik y'awoye, n'äl tä y'en häpeya Dios tä w'et yämlhi t'at wet lhämtes newa n'amejen.