1~Juan 3

₁Lhek yahinya häp Lhajcha Dios lehumnhayaj tä wuj tä iti n'amejen wet n'ayen lheya Dios leles. Wet n'ahäpehen t'at. Häp tä tamenej tä lhamel tä honhat leles nitäfwenhit'a n'amejen, tsi häp tä nitäfwelayej häp Dios. ₂Ipuhfwas tä oalehumnhay, athana n'ahäpehen t'at Dios leles. Wet tej tä kamaj kay'ahanayej m'ak tä n'ahäpehenla chik paj, mat y'ahanej chik Jesucristo n'äl, y'anchäthichela, tsi y'aw'enhila häp lham mälhyej m'ak tä häpe. ₃Wet elh chik häpe tä lenihayajtso iyeji Jesucristo, t'amajpej lhamejlä m'ak tä ni'isa, mälhyej tä Jesucristo häpe elh tä le'isyaj ihi.

₄Mat häp elh chik häpe tä iwoye lech'isukyaj, inäk'äs Dios lhämet, tsi tä inäk'äs Dios lhämet, häpe t'at m'ak tä ni'isa tä iwoye. ₅Amel pajche lehanayej tä Jesucristo näm honhatena yämthilek isoyej n'och'isukyajay, wet lham ihichet'a lech'isukyaj chik häpe tä iyej. ₆Wet häp tä mälhyejtso, elh chik häpe chik hap'akej lham, ileyej lech'isukyaj. Mat elh chik nileyayej lech'isukyaj, n'äl tä niw'ena'pe häp lham wet nitäfwelayej.

₇Ilesas, yej tach'anlhaye chik elh chik häpe ikan amejen. Häp elh tä iwoye m'ak tä is alhoho häpe t'at elh tä is alhoho, mälhyej tä Jesucristo häpe elh tä is alhoho. ₈Mat häp elh tä iwoye lech'isukyaj tälho ahättaj, tsi ahättaj iwoye t'at lech'isukyaj tälhe tä nech'enyaya. Wet häp täjtso tä tamenej tä nämte Dios Lhäs, yämthilek iwasthi m'ak tä ahättaj iwoye.

₉Ihichet'a elh chik häpe tä Dios leles elh wet nileyayej lech'isukyaj. Tsi lham tälho t'at Dios, wet ikalhihit'a chik nileyayej lech'isukyaj tsi Lajcha häpe t'at Dios. ₁₀Y'ahanej ihi lhamel tä häpehen Dios leles lhäy'e iyhäj tä häpehen ahättaj leles. Tsi elh at chik häpe chik niwoyaye m'ak tä is wok nhumina lepuhfwa, tälhihot'a Dios.

₁₁Häp täja Dios lhämet tä lelätaye tälhe tä lewoyay tesa p'ante tä yok, “Humnhen aiyhäj.” ₁₂Isit'ak n'ahäte iwoye Caín p'ante, lham tälho ahättaj wet ilän häp lech'inij. ¿Wet chipte tä ilän? Oyok, häp tä m'ak tä Caín iwoye wuj tä ni'isahen, wet häp m'ak tä lech'inij iwoye wuj tä isen.

₁₃Ipuhfwas, yej seltayej chik lhamel tä honhat leles n'äyi amhomche. ₁₄Häp n'amel pajche y'atfwayej n'ot'ilek wet y'anchätho n'ow'atshancheyaj, wet y'ahanej täjtso tsi y'ahumnhen häp lhapuhfwas. Mat elh tä niwoya lehumnhayaja kamaj imälhehi n'ot'ilek. ₁₅Tsi elh chik häpe chik n'äyiho lepuhfwa häpe n'olhikoy, wet amel lehanayej tä n'ow'atshancheyaj tä t'un ihiyejt'a n'olhikoy chik häpe.

₁₆Mat häpet n'ohumnhayaj, y'antäfwelej t'at m'ak tä häpe, tsi Jesucristo iwom lhatapehen lew'atshancheyaj. Tä mälhyejtso, n'amel häte t'uhawetej chik y'awompe lhaw'atshancheyaj häp lhapuhfwas. ₁₇Tsi chik elh hiw'en m'ayek, mat hiw'en lepuhfwa tä iwatlä m'ayek, wet nip'altsena, ¿chip iwoye chik fwetaj Dios lehumnhayaj ihi lham lehusek? ₁₈Ilesas, is chik m'ak tä y'awoye hin'älit tä matche lhahumnhayaj, isit'ak ts'ilak tä w'et olhämtes t'at.

₁₉Chik y'awoye täjtso, y'ahanhiyeja tä n'ahäpehen iyhäj tä tälhe m'ak tä matche, wet lhatamsekis ihihila tä y'ehi tä Dios tatache. ₂₀Tsi tej chik iche m'ak tä y'enpej lhatichunhayaja n'amejen, mat Dios inu'pe lhatichunhayajay wet ihanej nilhokej m'ayhay. ₂₁Ipuhfwas tä oalehumnhay, chik matche tä newache m'ak tä y'en lhatichunhayaja n'amejen, ihichet'a lhanowayhyaj tä y'ehi tä Dios tatache. ₂₂Wet lham hiw'enla n'amhohen m'ak at chik häpe chik y'at'alheje, tsi y'awoye lhämtes wet y'awoye m'ak tä lham ihuminche. ₂₃Wet lhämtes ne'tek y'at'ekhaye Lhäs Jesucristo wet y'ahumnhen iyhäj, mälhyej tä lham ne'tek y'awoye. ₂₄Wet lhamel tä iwoye lhämtes, iyej t'at häp lham wet lham ihi häp lhamel. Wet y'ahanej tä in'amhihen, häp tä isej Espíritu tä T'amajchet tä hiw'en n'amhohen.