Ahías yen lhämeta häp Jeroboam leniyatyaj tä nofwila
1Häp ifwalastso wet Abías, Jeroboam lhäs, t'inhayaj nichäte. 2Wet Jeroboam yäme häp lech'efwa wet yok:
–Lhek chuma n'otteyp'ot, ti'pe ate'pe häpkhilek aw'enha lhamej, häpkhilek wichi nitäfwela amej tä ahäpe och'efwa. Mäh hoye Silo, häp tä Ahías ihi. Häpe profeta tä ifwelte n'oho tä olham tä oniyathiyeja häp Israel lhayis. 3Chuma diez pan, lhäy'e tortillafwas, lhäy'e pinu. Wet hoye lew'et häpkhilek ifwel amho chik ichesla ilhäs wok nichesiyala.
4Wet Jeroboam lech'efwa iwoye häp hin'o lhämet. Lhayenlhi, iwo tate'pe elha wet yik, ihoye Silo. Tä nichäte, ihoye Ahías lew'et. Ahías nemhit hiw'enche honhat, tatelhoy y'omhen tsi häp tä hich'ut. 5Mat Lhawuk pajche ifwenho Ahías wet yok:
–Lhek tetshan, Jeroboam lech'efwa ihohla ame, tay'ätshanhiyeja ame lhäs tä imä katsi.
Wet Lhawuk ifwenho Ahías m'ak tä is chik nichulhejo atsinha chik näme lew'et, lhäy'e tä äp ifwenho tä iwo tate'pe elha, fwitaj atsinha elhpa. 6Tä Ahías iläte atsinha tä näm, ilätlä lenisähes tä tiyäjchufwi hup, yok:
–Jeroboam ch'efwa, lhuu ho kana. ¿Chipte tä alhen atsinha elha? Lhawuk ifwel n'oho lhämet tä t'uhläk ofwel amho, häp lhämet tä äytajche. 7Mäh äple hach'efwa Jeroboam, fwenhola tä Lhawuk tä Israel lhayis laka Dios yok, “Otshupyenehte tä iyej oka wichi Israel lhayis, wet oyen niyatayej lhamel. 8Osoyejte David leniyatyaj tä iyej lew'et lheley wet oyachajehte Jeroboam. Mat lham hätehit'a iwoye okawo David tä iwoye olhämtes wet imälhewek lehusek tä ihänlhin'o. Matche tä is m'ak tä iwoye wet ohumin. 9Mat Jeroboam wet matche, hich'atej lakey tä ni'isa tä iwoye, inu'pe niyatey tä lham icheyäjo häp lew'et lech'isukyajay tä lhamel iwoyepej. Häp tä tamenej tä onchuwete, tsi äp yenchelhi n'ocheyälis lhäy'e iyhäj tä yenejlhi lechinhas, wet yäm matche tä tatay n'ohlä. 10Wet tamenej leles lhäy'e lechetsos tä ow'enhihola lewit'äyhyaj. Y'inhihena nilhokej leles tä hin'ol tä iyej Israel lhayis. Ihichet'ala elh chik imälhehi chik iläy leles, matche tä nofwiyeja t'at lhamel. Otech'aynhiyeja t'at y'amuk tä õ'wom. Wohit'a lhiphaj chik imälhe katsi. 11Iyhäj chik y'inhen tä ihi hupuy, asinhäs tufwihena t'at lep'itseyhay. Wet iyhäj tä newahi wichi chik y'inhen, häp tä tsetwosla t'at chik tufwen. Häp täjtso olhämet tä ofwenho Jeroboam. Ohäpe t'at Lewuk Dios.”
12Wet Ahías ifwenho Jeroboam lech'efwa wet yok:
–Mäh äple haw'et. Häpet chik lechäthiyela haw'et, wet y'inhila t'at han'äfwaj. 13Wet nilhokhiyeja Israel lhayis chik y'äyenhila, wet lhamel tajänlahlä. Wet ts'ilakhila t'at han'äfwajtso tä Jeroboam lhäs chik ihi lep'itsekhi, häp tä ts'ilak lham tä Lhawuk tä Israel laka Dios akäjejlhi.
14-15“Lhawuk yenhilhila Israel lhayis laka rey tä isohiyeja Jeroboam leniyatyaj. Ifwalas tä tatay alhoho Lhawuk isichäthilhila häp Israel lhayis, hätehla iwoye häp leyalh tä isichätwethä häp kanohis tä ihi inät. Yokosichephäla tä ihi honhat tä isna, häp honhat tä yachaje p'ante häp lechätilis. Ifwtsatkatla'pe honhat, ichenla lhip elhe häp tewokitaj tä lhey Éufrates, häp tä lhamel iwäkwyhayen Lhawuk tä lhamel yenchelhi hal'äy tä Asera lepeykas, häp dios tsinha tä kamatache. 16Wet Lhawuk iwomla Israel lhayis, häp Jeroboam lech'isukyaj tä iwoye tä tamenej, lhäy'e lhamel lech'isukyaj tä Jeroboam inityenej lhamel chik iwoye.”
17Tä profeta Ahías ileyej lhämet tä iwoye, wet Jeroboam lech'efwa nephä wet yik, yäple häp Tirsa. Häpet tä nichätho lewukwepe, wet y'il han'äfwaj. 18Wet nilhokej Israel lhayis lhamel tajänlä, wet lhamel y'äyen, hätet iwoye Lhawuk lhämet tä lakawo profeta Ahías ifwenho atsinha.
19Wet m'ayhay iyhäj tä Jeroboam iwoye, lhäy'e laka'tshayajay tä iwoye, lhäy'e leniyatyaj, lhamel ihi t'at n'olesaynekhi tä lhey “Reyes tä ihi Israel.” 20Ihi veintidós nekchämis tä Jeroboam ihi leniyatyaj. Wet y'il p'ante tä nech'e ihoye lechätilis, wet lhäs tä lhey Nadab häp tä icheyäjo lajcha leniyatyajw'et.
Roboam niyatej Judá
21Salomón lhäs Roboam niyatej Judá. Hiw'en cuarenta y un nekchämis tä iwo tesa leniyatyaj, wet diecisiete nekchämis tä ihi Jerusalén tä iwoye niyat lechumet. Jerusalén häpe t'at honhat tä Lhawuk tatshupiye p'ante tä ihi Israel häpkhilek lew'et t'at. Wet Roboam lako lhey Naama, Amón lheley ka'tsinha. 22Wet Judá lheley iwoye m'ak tä ni'isa wet iwäkwyhayen Lhawuk. Inu'pe lechätilis lech'isukyaj, tsi matche tä ni'isa m'ak tä iwoye. 23Lhamel yenwethä lhamhohen n'on'okhayajw'etes, lhäy'e tuntey tä iwo len'okhayajayej, lhäy'e hal'äy tä yen laka dios tsinha Asera lepeykasa. Nilhokej m'ayhaytso itiche'pe chenhas tä atoschephä wet itichechufwi hal'äy lehupelis. 24Wet iche hin'ol tä iwoye lakey tä hich'atej tä ni'isa. Lhamel iwo lakain'oyajahi n'on'okhayajw'etes tä fwitaj ikäjyenlhi laka dios lhayis. Matche tä lhamel iten nilhokej lakeyis tä ni'isa wichi tä Lhawuk yokoschephä p'ante tä ihi honhat tä Israel lhayis nekche.
25Tä cinco nekchämis tä leniyatyaj Roboam, wet Sisac, Egipto laka rey, inuye p'ante häp Jerusalén. 26Tachuma nilhokej m'ak tä laha ihi tä ichufwi häp Lhawuk Lewukwe lhäy'e häp rey lewukwe. Nilhokej tä ichäj lew'ete, wet äpte ichäj n'oka'tshayajchal tä oro tä õ'tumtejlä n'och'ähal, tä Salomón ne'tek lakawos yenchelhi p'ante. 27Wet häp tä rey Roboam ne'tek õyenlhi iyhäj tä bronce tä õ'cheyäjänet lew'etho iyhäj tä õ'chäj, wet y'uhyene sip'äl tä t'uye rey lewukwe lepelis. 28Nilhokej ifwalas tä rey ihoyepej Lhawuk Lewukwe, wet sip'ältso yikche wet ichäj n'oka'tshayajchaltso tä bronce. Wet tä lhamel tälhe Lhawuk Lewukwe wet yäple häp rey lewukwe, wet tä nichäte, lhamel yachajo lhip tä yen lew'eta, häp hupch'o elh tä lhamel ichufwi.
29Häp tä mälhyejtso m'ak tä Roboam iwoye p'ante. Wet m'ayhay iyhäj tä iwoye ihi t'at n'olesaynekhi tä lhey “Reyes tä ihi Judá.” 30Roboam lhäy'e Jeroboam lhamel ilehiyejt'a laka'tshayajay tä iti lhamejen. 31Wet Roboam y'il p'ante tä nech'e ihoye lechätilis, wet tä õtjänlä, õ'tiyej lhamel lep'itseyhay tä ihi David laka Hupuy. Roboam lako lhey p'ante Naama, Amón lheley ka'tsinha. Wet Roboam lhäs tä lhey Abiam häp tä icheyäjo p'ante lajcha leniyatyajw'et.
