1~Rey 19

₁Acab ifwenho Jezabel nilhokej häp m'ak tä Elías iwoye lhäy'e tä ilänhen Ba'al laka profetas. ₂Tä Jezabel iläte täja, ichen hin'o tä iwo silätayeje häp Elías wet yok:

–Jezabel lhämet yok, “¡Is chik dios lhayis yäm matche tä itasinn'o chik ifwala chik n'am län Elías, te iwoye tä ilänhen Ba'al laka profetas!”

₃Tä Elías iläte tä ihi t'at lewit'äyhyaj, wet lhaifwayhat, yik, ihoye Beerseba tä ihi häp Judá, wet häp tä hin'äyhi lakawo. ₄Lham wet yik, ihoye honhat tä ts'anis, imälhewek ifwala tä iwo w'ekyaja. Tä paj hiw'en hal'ä wet ihochufwi, tatayphä t'at. Wet letichunhayaj ihi tä is chik ileyej honhat, wet yok:

–¡Iwuk, naya t'at m'ak tä in'oyej! ¡So n'oyej ow'atshancheyaj! Tsi tej chik oläy, mat otehit'a iwoye ochätilis.

₅Ileyej lhämet tä iwoye wet lhaithat at katsi pajtha imä, itchufwi hal'ä. Tä paj wet ángel näme wet itsokpe tä hin'omhatlhi, wet yok:

–Nephä, t'ek.

₆Wet Elías nephä wet hiw'en pan tä y'o, i'pe fwiyhol, itwhäye t'alaj, lhäy'e inät tä ihi n'olhäthi. Wet Elías tachuma wet tufw wet iyäyej inät. Tä ileyej tä t'ek, yachajo tä imä. ₇Tä paj wet Lhawuk laka ángel yachajo tä ihoye, wet itsokpe tä hin'omhatlhi wet yok:

–Nephä, t'ek, atofwchey han'äyij.

₈Wet Elías nephä wet t'ek, iyäyej inät. Lhäktso ikhajyen wet iwo w'ekyaja cuarenta ifwalas wet cuarenta honatsis, pajtha nichäte Dios laka chenaj tä Horeb. ₉Tä nichäte, y'uche chowej, ihi t'at imälhewek honatsi.

Wet Lhawuk tahuyej Elías wet yok:

–Elías, ¿atsi m'ak tä lewoye tä lhekana?

₁₀Elías nichulho wet yok:

–Iwuk Dios tä lajit atumfwaya, matche tä olät atape. Tsi häp tä Israel lhayis ileyej tä iwoye ämtes, lhamel iwasthiche aka altares, lhamel ilänhen aka profetas. Ts'ilak olham tä omälhehi, wet äp lhamel t'ut n'okwe, t'uhläk ilänn'o.

₁₁Wet Lhawuk yäme wet yok:

–Nuphä, kasthi tä ottache tä lhe'pe häp chenajna.

Häpet tä iwoyetso, wet Lhawuk inukwe honhattso. Wet näm leyalh tä wuj tä äytajiy, inäk'äs chenaj wet ipofwohen chenhas tä tuntey tä ihi tä Lhawuk tatache. Mat Lhawuk ihihit'a häp leyalhtso. Tä tajyäme leyalh, wet nech'e äp näm häp honhat w'ahu. Mat äpte Lhawuk ihihit'a häp honhat w'ahutso. ₁₂Wet iw'echehi honhat w'ahutso, wet nech'e äp itäj tä näm. Mat äpte Lhawuk ihihit'a itäjtso. Tä tajyäme häp itäj, nech'e pitsaje n'opak tä matche tä ni'äytajahi wet isajya. ₁₃Wet tä Elías iläte täja, inuphä, hip'oyejpe tatey häp lew'uy wet takasthi lepe chowej tä lham ihi. Wet nech'e iläte n'opak tä yok:

–Elías, ¿atsi m'ak tä lewoye tä lhekana?

₁₄Lham nichulho wet yok:

–Iwuk Dios tä lajit atumfwaya, matche tä olät atape. Tsi häp tä Israel lhayis ileyej tä iwoye ämtes, lhamel iwasthiche aka altares, lhamel ilänhen aka profetas. Ts'ilak olham tä omälhehi, wet äp lhamel t'ut n'okwe, t'uhläk ilänn'o.

₁₅Wet Lhawuk yämeje häp Elías wet yok:

–Äpilche han'äyijnaj letälhche wet hoye ts'anis tä iwhäye Damasco. Ukwela häp Hazael, tsäyla'pe aceite häpkhilek häpe Aram lhayis laka rey. ₁₆Wet Jehú, Nimsi lecheyäs, tsäyla'pe aceite häpkhilek häpe Israel lhayis laka rey. Wet Eliseo, Safat lhäs tä lew'et Abel-mehola, tsäyla'pe aceite häpkhilek häpe profeta tä icheyäjo häp am haw'et. ₁₇Elh chik häpe chik Hazael nisakanayej chik ilän, wet Jehú tä ilänla. Wet elh chik Jehú nisakanayej chik ilän, wet Eliseo tä ilänla. ₁₈Olham ot'uhiyela Israel lhayis tä kamaj imälhe n'oyej, siete mil hin'ol tä nin'okwiyayej Ba'al wet nits'uyalhi lepeyak.

₁₉Elías yikch'oye honhattso wet nilhoke häp Eliseo. Isaji honhat, tataype doce weyis lhayis tä õyäyitchepejwek, wet yunun iyhäj tä imälhechehen. Wet Elías ihoye, tä nichäte, wet ikäfwlej häp lew'uy. ₂₀Wet Eliseo yikch'oye häp weyis lhayis tä ichumyenwethä, inu alhoho tä ihän Elías. Wet yäme Elías, yok:

–Wahin n'oyej, ot'uhläk ots'u lech'alo ojcha lhäy'e oko, tsi oyikch'oye häp lhamel. Otpinla ame wet oyikhila amche.

Elías nichulho wet yok:

–Is, hoye t'at lhamel. Mat yej p'ethatlä m'ak tä oyenlhine amej.

₂₁Wet Eliseo yikch'oye Elías, wet tachuma täkwfwas weyis lhayis tä lechumyenhay wet ilänhen. Hich'esajen, wet tachuma hal'ä tä imäyenpejpe lhethey tä isaji honhat, häp tä yen lelheta. Wet ilhäneji itäj, hip'ohen weyis lhayis t'isanis wet hiw'enhomche wichi, wet lhamel tufw. Tä ileyej täja, yikche Elías wet nech'e tach'ote lechumet.