Aram lhayis lhaiwaklhathen tä inuye Samaria
1Ben-hadad, Aram laka rey, ihutwek nilhokej laka sip'äl, wet treinta y dos reyes tä lhaip'ajtej, lhäy'e lham laka sip'äl tä iche'pe yel'atas, lhäy'e kaletas tä n'oka'tshayajchal. Wet lhamel ihoye Samaria, tä nichäte, lhamel ilunej wet tatayhlä. 2Wet Ben-hadad ichene lakawos häpkhilek iwo silätaye Acab, Israel lhayis laka rey. 3Wet Ben-hadad lhämet yok:
–Nech'e olewuk nilhokej Acab lakäywet, lhäy'e lech'efwas, wet lhäy'e leles tä isis tä takhajayhen.
4Wet Israel lhayis laka rey ichene lhämet tä nichulho wet yok:
–Mälhyet niyat lhämet tä ichen n'oye, olham lhäy'e nilhokej m'ak tä in'oyej lewuk t'at.
5Wet Ben-hadad yachajo tä ichene lakawos Acab. Tä lhamel nichäte, wet yok:
–Ben-hadad lhämet yok, “Fwenho Acab tä olhämet tä ochene mathi oyok, W'en n'oho akäywet, hach'efwas, lhäy'e ales. 6Elh olhämet. Chik ifwala, häp lewhäyna, ochenla lech'otfwas tä itetshan Acab lewukwe tä leniyatyajw'et, lhäy'e lech'otfwas tä ihi leniyatyaj lewukwey. Lhamel tachumhiyela m'ak tä ihumin wet ichäjla, lhayenla lewuhuya.”
7Wet Israel lhayis laka rey, tä iläte wichi tä õ'chene, lham t'äne nilhokej hin'ol tä thänhäy tä ihi laka honhat, wet yok:
–Lhek yahinya, Ben-hadad näm n'oye häpkhilek iwit'äyenn'o. Wet pajche ofwenho mathi tä n'am n'äyejo okäywet, och'efwas lhäy'e oles tä t'uhläk ow'enho.
8Wet hin'ol tä thänhäy lhäy'e nilhokej wichi iyhäj nichulho wet yok:
–Yej tach'ahuye. Yej woye lhämet.
9Wet Acab tahuyej häp Ben-hadad lakawos wet yok:
–Fwenho aka rey tä owohiyela lhämet tä ichun tä ichen n'oye. Mat häp lhämet elh tä ichen n'oye athana, häp tä owohiyet'a.
Wet Ben-hadad lech'otfwas, tä iläte Acab yikhen, wet tä nichäte laka rey, ifwenho Acab lhämet. 10Wet Ben-hadad matche tä lewäkw ihi, wet ifwele lhämet häp Acab wet yok:
–¡Matche tä owasthihila Samaria pajla'tha nofw t'at! ¡M'aklak imälhehi nemla w'awulhej n'otkwech'o lhele chik wichi tä ihänlhin'o ihutwek! ¡Is chik dios lhayis yäm matche tä itasinn'o chik n'am woynejetso m'ak tä owoyeje!
11Wet Israel lhayis laka rey äp ichene lhämet tä nichulho Ben-hadad wet yok:
–¡Yej aj ten atenek! ¡Achoylhila chik lekalh n'ohi!
12Wet Ben-hadad lhäy'e reyes iyhäj tä lhaip'ajtej, lhamel iyä ichufwi hal'ä w'oley tä yen lehupela. Häpet tä iläte Acab lhämet tä ichene tä lakawos ifwenho, tahuyej laka sip'äl wet yok:
–¡Mäh nuye lhamel!
Wet lhamel nechephä, lhaiwaklhathen tä inuye Samaria.
Israel lhayis ikalhi Aram lhayis
13Tä kamaj ayej Aram lhayis ninuyaye häp Samaria, wet profeta ihoye Israel lhayis laka rey Acab wet yok:
–Lhawuk lhämet yok, “Tej tä lew'en tä wujpey atayhfwas tä inu amehen, tha yej nuhat amho. Olhamlak oyachaj amehen häpkhilek amel lelänhen. Wet nech'e am lehanhiyeja tä ohäpe Dios tä matche.”
14Acab tay'ätshane profeta wet yok:
–¿Atsi wichi tä Lhawuk itshupyene tä tamenhiyeja tä okalhi otayhfwas?
Profeta nichulho wet yok:
–Lhawuk yäme tä häp mamses tä sip'äl tä tach'ote gobernadores tä ihiche honhates tä aka honhat.
Wet Acab äp yok:
–¿Wet atsihila tä ichune letayhfwas tä inuye?
Profeta nichulho wet yok:
–Am tä is chik lechune.
15Wet Acab itetshanlä häp mamses tä sip'äl tä tach'ote gobernadores tä ihiche honhates tä lham laka honhat. Wet tä nilhokej, doscientos treinta y dos (232), wet tä nilhok Israel lhayis laka sip'äl, ihi siete mil hin'ol. 16Tä ifwala ihi lechowej lhamel yikhen tä inuye letayhfwas. Wet Ben-hadad lhäy'e treinta y dos reyes tä lhaip'ajtej, kamaj lhamel iyä t'at, w'oknhas, itchufwi lhamel lehupel hal'ä w'oley tä yen lewukweya. 17Wet mamses tä gobernadores lech'otfwas ichunlä iyhäj tä yikhen. Tä õ'fwenho Ben-hadad tä iche wichi tä inuphä tä tälho Samaria, 18tahuyej laka wichi wet yok:
–Chik lhamel iwatlä letamsek, wolak iwatlä laka'tshayaj, tsokawethä mat yej länhen.
19Wet mamses tä gobernadores lech'otfwas lhamel inukwephä tä tälho Samaria wet ichunlä nifwotaj. 20Wet mamsestso elhpej w'enhayej t'at letayhfwa tä ilän. Wet tä Aram lhayis hiw'en täja, wet yikhen wet Israel lhayis ihänwethä lhamel. Wet Ben-hadad, Aram lhayis laka rey, õ'sakanhiyejt'a, yääm, lhäy'e iyhäj laka sip'äl tä iche'pe yel'atas. 21Wet Israel lhayis laka rey yik wet tachuma letayhfwas w'utey yel'atas lhäy'e laka kaletas tä n'oka'tshayajchal. Häp tä mälhyej p'antetso, matche tä õ'kalhi Aram lhayis.
Ben-hadad lhaiwaklhat yämlek yachajo tä tatayhlä Israel lhayis
22Tä tajyäme täjtso, wet profeta äp yachajo tä ihoye Israel lhayis laka rey wet yok:
–Is chik let'isej iyhäj aka sip'äl. Awaklhatej m'ak tä lewohiyela, tsi häp tä chik tajyäme tefwaji nekchäm, wet Aram laka rey yachajihola tä inu ame.
23Wet Aram laka rey ch'otfwas, lhamel lhämet yok:
–Israel lhayis laka dios lhayis, chenhas tä laka dios lhayis. Häp tä tamenej tä ikalh n'amhi. Mat chik y'attayhlä lhamel chik ihi honhat tä w'awulhchä tä kachenhasa, akalelhäj tä y'akalhihla. 24M'ak tä is chik lewoye athana, lehtej reyes tä niyatej nifwotas, wet w'enho sip'äl kaniyatey häpkhilek lhamel t'at tä lhayen lhetekayej nifwotas. 25Wet is chik lewaklhat aka sip'äl, tetshanlä iyhäj tä iche'pe yel'atas, lhäy'e kaletas, is chik w'awulhi t'at aka nifwotajnaj õ'kalhi, wet n'achajola chik y'attayhlä lhamel. Akalelhäj tä y'akalhihla lhamel chik y'ehi honhat tä kachenhasa chik y'attayhlä lhamel.
Wet Ben-hadad iwoye lech'otfwas tichunhayajna wet iwaklhat laka sip'äl.
Aram lhayis lhäy'e Israel lhayis yachajo tä tataywek wet Israel lhayis ikalhi
26Tä tajyäme tefwaji nekchäm, wet Ben-hadad itetshan Aram lhayis kasip'äl wet t'ayho honhat lhip tä lhey N'olafwek, tsi häp tä t'uhläk tatayhlä Israel lhayis. 27Wet Israel lhayis äpte lhamel iwaklhat laka sip'äl lhäy'e lhäk tä tilhäj, wet lhamel yikhen tä yistejlä letayhfwas. Wet lhamel yenlhi lew'et tä takasthi ayej, tatay'atlä häp lhip tä Aram lhayis ihi. Tet häp kayla tä nintäkwa Israel lhayis, tefwas'atn'o tä lhaihutwek, wet letayhfwas tapoyej honhat tä ihi.
28Wet profeta ihoye häp Israel lhayis laka rey wet yok:
–Lhawuk lhämet tä ne'tek ofwel amho yok, “Aram lhayis fwitaj olham ohäpe chenhas laka dios, wet fwitaj olham n'am häpe honhat tä w'awulhchä laka dios. Tä mälhyejtso, olham oyachajila amehen lhamel tä wujpeytso häpkhilek lelänhen, wet nech'e am lehanhiyeja tä ohäpe Dios tä matche.”
29Wet siete ifwalas tä Aram lhayis lhäy'e Israel lhayis ihi lew'etes tä atott'a lhamhomche. Wet tä taj ifwalatso, wet nech'e häp tä lhamel inuwek. Wet Israel lhayis ilänhen cien mil (100.000) sip'äl tä t'äschehchä, 30wet iyhäj sip'äl lhamel ilethane honhat lhip tä lhey N'olafwek. Mat honhatna lelafwek nichät kanhi, wasi, wet veintisiete mil (27.000) hin'ol tä ichä'pe wet y'inhen. Häpe hin'ol tä yäämhen tä ihi n'oka'tshayaj. Wet Ben-hadad äpte yik p'ante, wet tä nichäte honhattso, w'et y'uchetchufwi hupuy, äp ihoyepej hup elh.
31Wet lech'otfwas tahuyej wet yok:
–Olhamel oläte tä hap'altsentses häp Israel lhayis kaniyatey. Is chik olhamel otw'uyhiche ow'uyis tä yelaj wet oyäytejen ow'ol niyhäy, wet ohoye Israel lhayis laka rey. Ch'athiyejat akniläna.
32Tä mälhyejtso, lhamel taw'uyhiche lew'uyis tä yelaj wet yäytejen lew'ol häp niyhäy. Wet ihoye Israel lhayis laka rey wet yok:
–Akawo Ben-hadad lhaip'altsen ame wet yok, “Yej länan'o.”
Acab nichulho wet yok:
–¿Hä kamaj iläy? Olham otech'aynej chik opuhfwa.
33Tä hin'olna iläte Acab lhämetna, wet letichunhayaj yok, “Häp tä is.” Wet yokwet lhamel nichulho wet yok:
–Matche ämet. Ben-hadad häpe t'at apuhfwa.
Acab yok:
–Mähen ukwe, hän kana.
Tä näm, ihoye Acab wet Acab yok:
–Lhuu, tiyäjo oka kaletaj.
34Wet Ben-hadad yäme häp Acab wet yok:
–Oyachajila ame honhates tä alewuk tä hupuy ihiche tä ojcha isoyejte ajcha. Wet otch'anlha ame chik lechäjen m'ayhay tä ihi oka honhat tä lhamya Damasco, lhäy'e tä lewom m'ayhay, mälhyej tä ojcha iwoyehte tä ihi aka honhat tä lhamya Samaria.
Acab nichulho wet yok:
–Olham wet oaiwahintshi chik lhek. Tsi häp tä nech'e oayen opuhfwaya wet am äpte nech'e lhen apuhfwayan'o.
Wet tä lhamel ileyej täja, wet yik Ben-hadad, nech'e Acab iwahintshi.
Profeta itiyej letes Acab
35Wet hin'o tä profetas elh, Lhawuk ifwenho tä is chik t'alhe elh tä lhäy'e chik y'aj. Wet yäme elh tä lhäy'e wet yok:
–¡Ajn'o!
Mat elh iwohiyet'a, y'ajit'a. 36Wet profeta yok:
–Tä kawoyaye Lhawuk lhämet tä ne'tek ot'alh ame chik let'ajn'o, häpet chik lhek n'och'oye wet t'owalhaj tä fwitsaj ailänla.
Häpet tä yikch'oye profeta, tha t'owalhaj nichutej wet ilän.
37Wet profeta äp hiw'en elh hin'o, wet yok:
–Ajn'o.
Wet hin'otso iwoye, y'aj wet iwo lelätshaya. 38Wet profeta yik. Tä nichäte n'äyij, wet iniwhihlä häp rey, yäytejpe tatey häp amo t'akay. 39Tä rey nekche n'äyij, wet profeta ifwitsenej lechos, t'änpe, yok:
–Ika niyat, olham otiyäjomat n'oka'tshayaj. Wet iche elh sip'ä tä iho n'oye, ichäj n'oye hin'o tä yen kweneka wet yok, “Uye hin'ona. Chik yääm, letiskanhiyeja'pe am haw'atshancheyaj, wok letiskanhiyeja'pe tres mil chinaj t'äj tä plata.” 40Wet tä olham onahayej iyhäj m'ayhay, n'okwenektso yik.
Tä Israel lhayis laka rey iläte, wet yok:
–Am t'at tä ates. Am t'at tä lew'en amho awit'äyhyaj tä kat'uyaye.
41Häpet tä mälhyejtso, wet profeta ilanhi amo t'akay tä i'pe tate'pe, wet rey nitäfwelej tä profetas elh. 42Wet profeta yäme häp rey wet yok:
–Lhawuk lhämet tä ne'tek ofwel amho yok, “¿Chipte tä kaläna, lhäämet häp hin'o tä olham one'tek lelän? Am haw'atshancheyaj tä letiskanhiyeja'pe lew'atshancheyaj tä katäyhata, wet aka wichi häp tä tiskanhiyeja'pe lew'atshancheyaj häp lham laka wichi.”
43Wet Israel lhayis laka rey yik, ihoye Samaria, lefwitajayaj ihi, nemhit lakäjyaj ihi. Wet y'uychufwi lewukwe, yäpil at katsi.
