Salomón t'alhe Hiram lech'otyaj yämlek õyenlhi Lhawuk Lewukwe tä isilataj
1Häp rey Hiram, honhat tä Tiro laka rey, iläte tä õyen häpeya rey häp Salomón, icheyäjo lajcha David leniyatyaj tä ihi Israel. Wet häp tä Hiram nech'e ichene lakawos, tsi matche tä lakalay'i p'ante häp rey David. 2Wet tä yäpil lakawos, wet Salomón ichenche lhämet tä ichene Hiram, wet yok:
3“Am lehanej tä ojcha David ikalhihit'a p'ante tä yenlhi Lewuk Dios Lewukwe tä isilataj. Tsi häp tä ihi t'at n'oka'tshayajay tä wujpe, wet tä Lewuk Dios tach'ote, wet ikalhi letayhfwas. 4Mat olham wet Dios hiw'en n'oho otamsek, pajtha tajen lepesey oka honhat. Ihichet'a otayhfwas wet newache m'ak tä ni'isa. 5Häp tä tamenej tä ot'uhläk oyenlhi Owuk Dios Lewukwe, mälhyej lhämet p'ante ifwenho ojcha David tä yok, Äslak icheyäjo aniyatyajw'et, häpkhilek yenlhi n'oho Owukwe.
6“Athana sukunej akawos chik yisthen pino tä ihi Líbano. Olham okawos tach'othiyela wet ow'enla amho akawos lakaha. Am tä lehanej m'ak tä t'uhawetej chik letis lhamel. Wet äpte lehanej t'at tä olhamel ohätehit'a iwoye häp amel tä Sidón lheley tä wuj tä lehanej tä lhisthen hal'äy.”
7Tä Hiram hiw'en Salomón lhämet tä ichene, wet wuj tä akäjlhi wet yok:
–¡Otiyej lewujyaj ifwalana Dios tä Israel lhayis Lewuk! Tsi häp tä hiw'enho David häp lhäs tä wuj tä ihan honhatej wet niyatej wichi tä wujpey.
8Wet Hiram nichulho Salomón wet ichene lhämet wet yok:
“Ow'en ämet tä lechen n'oye. Owoye ämet, ochenla ame hal'äy tä lewatlä, pänhichetek lhäy'e pino. 9Okawos talhunhiyeja hal'äy tä tälhe Líbano pajla'tha nichäte lewomekitaj. Lhamel iskonla inäte wet yäythilawek wet yikhilachufwi, ihänhiyela lhip chik lene'tek õ'häne. Chik nichäte lhiptso, wet lhamel ilanhichela t'akay wet letachumhiyela. Wet nech'e am tä lew'enla n'oho m'ak tä owatlä, lechenla n'oye n'olhäk.”
10Wet Hiram ichene Salomón häp hal'äy tä iwatlä, pänhichetek lhäy'e pino. 11Wet Salomón hiw'enho n'olhäk häp Hiram, häpkhilek lhäk ihi häp lakawos. Nekchämpej ichene veinte mil (20.000) lelhuy trigo, wet cuatro mil cuatrocientos (4.400) litros aceite tä matche tä häpe olivos t'i. 12Wet Lhawuk hiw'enho lehanyaj häp Salomón, mälhyej lhämet p'ante ifwenho. Wet Hiram lhäy'e Salomón lhamel letamsekis ihi, wet nech'e lhayen puhfwasa.
13Wet Salomón t'äne treinta mil (30.000) hin'ol tä ihi Israel, wet ichumyenwethä lhamel, 14wet iwel'a tefwaji ichene Líbano diez mil lhamel. Wet chik äp elh iwel'a äp ichen diez mil, wet chik äp elh iwel'a äp ichen diez mil. Iwel'a tefwaji tä lhamel ihi Líbano wet täkwfwas iwel'as tä ihi lew'et. Wet hin'o tä lhey Adoniram häp tä niyatej chumhas. 15Salomón hiw'en p'ante setenta mil (70.000) hin'ol tä talhunej m'ayhay, wet ochenta mil (80.000) hin'ol tä yisthen tuntey tä chenaj lhipey. 16Wet tres mil trescientos (3.300) hin'ol tä t'uye chumhas. 17Wet rey t'uhläk chumhas yisthen tuntey tä wus lhäy'e tä isis, häpkhilek õyen hup fwetesa. 18Wet Salomón laka hupwos, lhäy'e Hiram laka hupwos, lhäy'e Gebal lheley, lhamel yenchelhi hal'äy lhäy'e tuntey tä yenejlhi Lhawuk Lewukwe.
