1~Ped 1

_1-2Amtena yaiyhäj tä ahäpehen Dios leles tä ifwtsatpehen honhates tä kahaw'etesa, amel tä lheyayhi Ponto, Galacia, Capadocia, Asia, lhäy'e Bitinia. Olham Pedro ohäpe Jesucristo laka apóstol, wok oyok, lakachenhay tä lhamenya elh, wet ochen amehen olhämetna. Dios pajche tatshupi amehen, häpe t'at lham lenech'ethayaj, wet ayen t'amajchetesa häp tä isej laka Espíritu, yämlek lewoyepej Jesucristo lhämtes wet lham lew'oyis ilej ahusey lech'ohley.

Is che Dios wuj tä iti amejen lep'altsenyaj lhäy'e atamsek.

₃¡N'awunit Lhawuk Jesucristo laka Dios wet äp Lajcha, häp lham tä n'aisej lep'altsenyaj tä wuj! Tsi tä inuhatphä Jesucristo tä tälho n'op'itseyhay, inech'ayen n'amejen yämlek in'amejen lhaniwhayaj tä iläy, ₄häpkhilek alewuhuy Dios lakäpfwayajay tä isen tä t'amajej amhohen tä ipuleye, häp m'ak tä nittäya, wet äp laj lech'ohleya, lhäy'e tä lesilatyaj ninofwa. ₅Wet häp tä isej achayaj tä letiyej Dios, lham t'uyej amehen lakhajyhayaj häpkhilek lesakanej afwayhyaj tä pajche iwaklhat amejen, tä hin'älthila ifwalas che lepese.

₆Häp tä tamenej tä a'akäswethä, tej che leteläytej ayej wujpe m'ayhay tä w'enhahiche tä ailhaklitwethä. ₇Tsi tähestso nichät atapehen yämlek ikalelhät achayajay. Tichunache oro, häp hin'ol tä yen lechumeta ithatho itäj tä yelhte häpkhilek kalelhäj che is. Wet häpet achayajay, lhäy'e lhip laha, inu'pe oro, tsi oro t'unhit'a. Wet häp tä hätet iwoye, Dios t'uhläk hiw'en achayajay che is wet häpkhit'a m'ak tä w'et m'ayek t'at. Wet che Jesucristo yachajo tä näm, achayajaytso tamenhiyeja che Dios aiwunit wet hiw'en amhohen awujyaj.

₈Wet tej tä kaw'ena p'ante Jesucristo, mat lehuminay t'at. Wet athana tej tä kaw'ena'pe, mat lechaye t'at wet lhen akäjyaja häp akäjyaj tä wuj, häp akäjyaj tä n'am hanej che ofwetaj oy'ithat. ₉Wet m'ak tä tamenej tä lewoye akäjyajtso, häpe t'at tä Dios aifwayhthen, häp tä aisej achayaj tä letiyej.

₁₀Ifwalas tä pajche profetas wuj tä itetshan wet lhaichufwenejen häpet n'ofwayhyaj tä iche ifwalasna, wet lhamel yen at lhämeta Dios lep'altsenyaj tä iti amejenna. ₁₁Wet Cristo laka Espíritu tä ihiche lhamel, ihantejen häp m'ak tä lham Cristo iteläythiyeja, lhäy'e lewujyaj tä isi tä imälheche len'äyij häp leteläythayajtso. Wet lhamel wuj tä lhaikhajyenhenpej tä t'uhläk ihanej elh tä häpe häp hin'otso, lhäy'e lewhäy tä Espíritu yäme.

₁₂Mat m'ak tä lhamel yen silätyaja, Dios ifwenho tä lhamenhit'ak isej, mat häpkhila amel che aisej. Wet häpe t'at tä hin'ol tä yen lhämeta Dios Silätyaj tä Is ifwalasna, iwo siläta amejen, häp tä isej Espíritu tä T'amajchet tä tälh puleye. ¡Wet y'aje ángeles tä t'upejläk hiw'en m'ayhay tä oyämetso!

₁₃Tä mälhyejtso, awaklhathen, yej ch'anlhayek ahusey imähen, mat tetshanpej m'ak tä lewoyaye. At'unthiche, wet yej k'efwyenho aniwhayaj tä leniwhich'oye Dios lep'altsenyaj che hiw'enla amhohen che Jesucristo näm. ₁₄Tä ahäpehen Dios leles tä iwoye lhämtes, yej lhäjlhahlä anech'ethayajay tä pajche i'amejen tä kamaj katäfwelayej Jesucristo. ₁₅Mat mälhyej Dios tä t'änte amehen häpe N'ot'amajchet, häte amel is che alhenay lham t'amajchetesahi m'ak at che häpe tä lewoyaye. ₁₆Tsi Dios lhämet tä ihi Lehi yok, “A'enay ot'amajchetesa, tsi olham ohäpe N'ot'amajchet.”

₁₇Tä lhen Ajchaya Dios häp lham tä hiw'awlhatejchä lakalelhthayaj tä itiyej elhpej mälhyej m'ak tä elh iwoye, n'älit anowayhyaj tä letiyej, nilhokej ifwalas tä kamaj lhehi honhatna tä kahaw'eta. ₁₈Tsi Dios pajche aifwayhtej haw'atshancheyaj tä lajit lahaya tä tälhe achätilis lakeyes. Wet lehanej tä n'ofwayhyajna, laha häpkhit'a m'ak tä nit'una, mälhyej iwoye oro wok plata, ₁₉mat häpe t'at Cristo lew'oyis tä lhäy'e lhip laha. Tsi Cristo lhayen n'oläneka, hätet iwoye tson'ataj lhäs tä isilataj tä newache m'ak che iyej. ₂₀Dios pajche itshupyeneje Cristo täjtso, tälhe täjp'ante kamaj nenalhi honhat, wet ifwalas tä lepesena hin'älit yämlek amel aisej. ₂₁Wet häp tä isej lham Cristo, amel let'ekhaye t'at Dios, tä lham inuhatphä Cristo tä tälho n'op'itseyhay wet äp lhäy'e lhip tä iwujyen. Tä mälhyejtso, ekhahyaj lhäy'e aniwhayaj iyeji Dios.

₂₂Häte tä lewoyaye m'ak tä matche tä häpe Dios lhämet, lelejen ahusey wet newache akanyaj yämlek lehumnhen apuhfwas. Tä mälhyejtso, mälhetwek akhajyhayaj lhäy'e ahusek tä alehumnhen. ₂₃Tsi athana anech'ayhis, mat nemhit letälhaye ajchalis, mat letälhaye Dios, häp tä isej lhämet tä iläy wet nittäya yämlek tiyäj'attsiy. ₂₄Mälhyej Dios lhämet tä ihi Lehi tä yok: